Kuyungizya Luzyibo Lwesu Mumulimo​—Kugwasya Bantu Mbotuyiisya Bbaibbele Kusikila Balyaaba Akubbapatizyigwa

KAAMBO NCOCIYANDIKA: Kutegwa bakkomaninwe a Jehova, basikwiiya Bbaibbele beelede kulyaaba kulinguwe akubbapatizyigwa. (1Pet. 3:21) Aabo bapona kweelana akulyaaba kwabo balakwabililwa kumuuya. (Int. 91:1, 2) Munakristo ulyaaba kuli Jehova, kutali kumuntu, kumulimo naa kumbunga. Aboobo, basikwiiya beelede kumuyanda alimwi akumulumba Leza.—Rom. 14:7, 8.

MBOTUKONZYA KUCITA OOBO:

• Ciindi nomwiiya, amubandike ncaayubununa makani kujatikizya Jehova. Amukankaizye kuti kabala Bbaibbele abuzuba alimwi akupaila kuli Jehova “cakutaleka.”—1Tes. 5:17; Jak. 4:8

• Amumukulwaizye sikwiiya wanu kuti alibikkile mbaakani yakulyaaba akubbapatizyigwa. Alimwi amumugwasye kucita zintu nzyakonzya aciindi eeco, mbuli kwiingula kumiswaangano alimwi akukambaukila basimukobonyina ababelesinyina. Kamuyeeya kuti Jehova tasungilizyi muntu uuli woonse kumubelekela. Kulyaaba nkusala nkwayelede kulicitila muntu.—Dt. 30:19, 20

• Amumukulwaizye sikwiiya kucinca bukkale bwakwe kuti kakuyandika kutegwa amukkomanisye Jehova akweelela kubbapatizyigwa. (Tus. 27:11) Akaambo kakuti sikwiiya Bbaibbele inga kajisi bube bumbi atumpenda tukatazya kapati, inga kwayandika kuzumanana kumugwasya kusamununa buntu bwakwe bwakaindi akusama bupya. (Ef. 4:22-24) Amumutondezye zibalo zyakuti “Ibbaibbele Lilakonzya Kubacinca Bantu” izijanika mu Ngazi Yamulindizi

• Amumwaambile lukkomano ndomwajana mukubelekela Jehova. —Is. 48:17, 18