KUPONA BUUMI BWA BUNAKRISTO
Jehova Ulatugwasya Ciindi Notuli Mumapenzi
Muziindi eezyi zyakumazuba aamamanino, tulajana mapenzi manji kapati. Zimwi ziindi, mapenzi alatuvwulila cakuti cilatuyumina akuliyumya. Nokuba boobo, ikuti twazumanana kuswena kuli Jehova, uyootugwasya kuliyumya nomuba mumapenzi aakatazya kapati. (Is. 43:2, 4) Ino mbuti mbotukonzya kuswena kuli Jehova ciindi notuli mumapenzi?
Mupailo. Ikuti twapaila kuli Jehova amoyo wesu woonse, ulakonzya kutupa luumuno lwamumizeezo alimwi anguzu zyakuliyumya.—Flp. 4:6, 7; 1Tes. 5:17.
Miswaangano. Iciyandika kapati lino, ncakulya cakumuuya alimwi akuyanzana a Banakristoma kumiswaangano yesu. (Heb. 10:24, 25) Ciindi notulibambila, kujanika, alimwi akutola lubazu kumiswaangano yambungano, tulagwasyigwa kapati amuuya uusalala wa Jehova.—Ciy. 2:29.
Bukambausi. Kujata bubi mumulimo wabukambausi kuyootugwasya kubikkila maano kuzintu zili kabotu. Alimwi kuyootugwasya kuyumya cilongwe cesu a Jehova abasimilimoma.—1Kor. 3:5-10.
AMWEEBELELE KAVIDIYO KAKUTI JEHOVA UYOOMULANGANYA, MPOONYA MWIINGULE MIBUZYO IITOBELA:
Ncinzi cakamugwasya Malu kuswena kuli Jehova ciindi naakali mumapenzi?
Mbuli Malu, mbuti majwi aajanika kulugwalo lwa Intembauzyo 34:18 mbwaakonzya kutuumbulizya ciindi notuli mumapenzi?
Mbuti cakuluula ca Malu mbocitondezya kuti Jehova ulatupa “nguzu zigambya iziinda zyabantu” ciindi notuli mumapenzi?—2Kor. 4:7