Amusole Kuzyiba Zintu Zipya Ciindi Nomwiiya

Notulibambila kutalika kubala, tulakonzya kulibuzya kuti, ‘Ncinzi ncondiyanda kwiiya?’ Nokuba boobo, tweelede kuyeeya kuti nokuba kuti inga kuli cintu cimwi ncotuyanda kwiiya, tacaambi kuti kunyina zintu zipya Jehova nzyayanda kuti twiiye. Mbuti mbotukonzya kuzyiba zintu zipya Jehova nzyayanda kutuyiisya?

Amupaile kulomba busongo. Amumulombe Jehova kuti amugwasye kumvwisya ncayanda kuti mwiiye lino. (Jak. 1:5) Mutakkutili azintu nzyomuzyi kale.—Tus. 3:​5, 6.

Amulekele nguzu nzyolijisi Jwi lya Leza kumweendelezya. “Jwi lya Leza lilaabuumi.” (Heb. 4:12) Aboobo, kufwumbwa ciindi notubala Bbaibbele, lilakonzya kutuyiisya cintu cimwi cipya alimwi akutugwasya munzila ziindene-indene mubuumi. Pele eeci cilakonzya kucitika lilikke buyo kuti twazyiba kuti kuli zintu nzyotutazyi zyalo nzyotukonzya kwiiya mu Jwi lya Leza.

Amulumbe akaambo kazintu zyoonse Jehova nzyabelesya kutuyiisya. Cakulya cakwe cakumuuya cili mbuli “pobwe lyazyakulya zibotu zyamafwuta.” (Is. 25:6) Amuzibale zibalo zyoonse noziba zyeezyo nzyomuyeeya kuti tamukoozikkomanina. Kuti mwacita oobo, muyoozumizya Leza kumugwasya kuba bantu bali kabotu alimwi muyookukkomanina kapati kwiiya!