Manyongwe Ankondo Mboziyoomana

LEZA UYOOZINYONYOONA MFWULUMENDE ZYABANTU

Leza uyoonyonyoona mfwulumende zyabantu lyankondo ya Amagedoni, iyaambidwe mu Bbaibbele.a (Ciyubunuzyo 16:16) Aciindi eeco, ‘bami bamunyika yoonse bayoobunganizyigwa lyankondo yabuzuba bupati bwa Leza Singuzuzyoonse.’ (Ciyubunuzyo 16:14) Amagedoni ninkondo ya Leza iiyoomana nkondo zyoonse.

Mfwulumende ya Leza iyoonjila mubusena bwamfwulumende zyabantu, iyoolela kuzwa kujulu alimwi taikanyonyoonwi pe. (Daniele 2:44) Leza wakasala Mwanaakwe, Jesu Kristo ikuba Mwami wabwami oobo. (Isaya 9:​6, 7; Matayo 28:18) Oobu mbo Bwamib Jesu mbwaakayiisya basikumutobela kuti kababupailila. (Matayo 6:​9, 10) Aboobo, bantu boonse bayookamantana akuba mukwasyi omwe Jesu kali Mwami.

Kwiindana abeendelezi baliko mazuba aano, Jesu kunyina nayoobelesya nguzu zyakwe kutegwa aligwasye mwini pe. Kuyungizya waawo, mbwaanga Jesu tasalululi naaceya, nkokuti mubulelo bwakwe kunyina muntu uyoolimvwa kudyaamininwa akaambo kamubala wakwe, cisi nkwazwa naa nkwaakakomenena. (Isaya 11:​3, 4) Alimwi buya, abalo bantu kunyina nobayooyandika kulwanina lwaanguluko lwabo. Nkaambo nzi? Nkaambo Jesu uyoobikkila maano kuzintu nzyayandika muntu umwi aumwi kumugama. Kunze lyaboobo, “uyoovwuna mucete uukwiilila lugwasyo, uupengede alimwi amuntu uuli woonse uutajisi mugwasyi. Uyoobavwuna kukudyaamininwa akunkondo.”—Intembauzyo 72:​12-14.

Bwami bwa Leza buyoozinyonyoona zilwanyo zyoonse zili anyika. (Mika 4:3) Kunze lyaboobo, buyoonyonyoona bantu ibatayandi kucileka kulwana naa aabo ibanyonganya luumuno lwabamwi. (Intembauzyo 37:​9, 10) Aboobo, muntu uuli woonse uyoolimvwa kukwabililwa aano anyika, tacikwe makani mwana naa mupati.—Ezekiele 34:28.

Ciindi mfwulumende ya Leza yaakutalika kulela, bantu bayooba abuumi bubotu kapati. Cili boobu akaambo kakuti, mapenzi aabapa kulwana mbuli bucete, nzala akubula kwakukkala ziyoomana. Alimwi bantu boonse banoolya zyakulya zijisi busani akuyookkala mumasena mabotu.—Intembauzyo 72:16; Isaya 65:​21-23.

Bwami bwa Leza buyoozigwisya zintu zyoonse zibyaabi izyakaletwa ankondo. Eezyi zibikkilizya kunyongana mumizeezo alimwi akunyema kuboola azintu zibyaabi zicitika akaambo kankondo. Nobaba baabo ibakafwa bayoobusyigwa akutalika kupona anyika. (Isaya 25:8; 26:19; 35:​5, 6) Kunze lyaboobo, banamukwasyi boonse bayoobonana abayandwa babo ibakafwide. Mpoonya zintu zibyaabi izyakacitika akaambo kankondo ziyooba “zintu zyakaindi.”—Ciyubunuzyo 21:4.

LEZA UYOOCIGWISYA CIBI

Bwami bwa Leza buyookamantanya bantu mukukomba Leza wakasimpe, Jehovac, “Leza siluyando alimwi siluumuno.” (2 Bakorinto 13:11) Bantu bayakwiiya kukkala muluumuno. (Isaya 2:​3, 4; 11:9) Kunze lyaboobo, bantu bamvwida bayoolekelelwa zibi zyabo alimwi bayoolondoka.—Baroma 8:​20, 21.

LEZA UYOOMUNYONYOONA SAATANI AMADAIMONA AAKWE

Bwami bwa Leza, buyoobanyonyoona basikutalisya nkondo, nkokuti Saatani amadaimona aakwe. (Ciyubunuzyo 20:​1-3, 10) Aciindi eeco, “luumuno luyoovwula,” nkaambo tabacinooliko pe.—Intembauzyo 72:7.

Mulakonzya kuba masimpe kuti Leza uyoocizuzikizya cisyomezyo cakwe cakumanizya manyongwe ankondo izicitika munyika. Cili boobo akaambo kakuti ulayandisisya alimwi ulijisi nguzu zyakucita boobo.

• Leza musongo alimwi ulijisi nguzu zyakumana manyongwe ankondo. (Jobu 9:4) Kunyina cintu cikonzya kumwaalila kucita.—Jobu 42:2.

• Leza takkomani kubona bantu kabapenga. (Isaya 63:9) Alimwi “kufwumbwa muntu uuyanda nkondo ulimusulide.”—Intembauzyo 11:5.

• Lyoonse Leza ulazicita nzyaamba; tabeji pe.—Isaya 55:​10, 11; Tito 1:2.