Luyando lwa Leza Nkoluli Lyoonse

1-2. Mapenzi nzi Banakristo banji ngobajana?

AMWEEZEEZYE kujatikizya bwato buli mulwizi ciindi nokuli guwo pati. Akaambo kamayuwe, bwatalika kwiibauka. Bwato oobo bulakonzya kuunka kufwumbwa mayuwe nkwaawunka ikuti kakunyina uubwiimika kubelesya ngobyo. Pele ngobyo ikuti yawaalwa, ilakonzya kubwiimika akupa kuti butazumanani kutonkwa aguwo.

² Ciindi nomujisi mapenzi, mulakonzya kulimvwa mbuli bwato oobo. Mulakonzya kwiibaulwa munzila yacikozyanyo akaambo kakutyompwa. Buzuba bumwi, mulakonzya kusinizya kuti Jehova ulamuyanda alimwi ulamugwasyilizya. Pele buzuba butobela mulakonzya kutalika kudooneka kuti naa buya ulamubikkila maano. (Int. 10:1; 13:1) Ambweni mulongwe ulakonzya kumwaambila majwi aakulwaizya alo aakonzya kumupa kulimvwa kabotu kwaciindi cisyoonto. (Tus. 17:17; 25:11) Pele kalitanalampa, mulakonzya kutalika kudooneka akulimvwa kuti Jehova kunyina namuyanda. Mbuti mbomukonzya kubelesya ngobyo yacikozyanyo kutegwa muliyumye ciindi nomuli mubukkale oobu? Munzila imwi, mbuti mbomukonzya kuba masimpe kuti Jehova ulamuyanda akumugwasya?

3. Ino mabala aakuti “luyando lutamani” aabelesyedwe kulugwalo lwa Intembauzyo 31:7 alimwi a 136:​1, aamba nzi? Nkaambo nzi ncotukonzya kwaambila kuti Jehova nguuyinda kutondezya bube oobu? (Amubone acifwanikiso.)

³ Nzila imwi iikonzya kumugwasya kuliyumya ciindi nomujisi mapenzi, nkuyeeya luyando lwa Jehova lutamani (Amubale Intembauzyo 31:7; 136:1.) Mabala aakuti “luyando lutamani” apa muzeezo wamuntu mbwakonzya kumuyanda kapati muntu umwi. Jehova nguuyinda kupa cikozyanyo cibotu cakutondezya luyando lutamani. Mubwini, Bbaibbele limupandulula kuti “uzwide luyando lutamani.” (Kul. 34:​6, 7) Kunze lyaboobo, Bbaibbele lyaamba boobu kujatikizya Jehova: “Luyando lutamani ndojisi kulibaabo boonse bakukwiilila ndupati.” (Int. 86:5) Amuyeeye buyo eeci ncocaamba: Jehova kunyina nayoobalekelezya babelesi bakwe basyomeka. Ikuyeeya kaambo aaka kakuti Jehova ulijisi luyando lutamani, kulakonzya kutugwasya ciindi notujisi mapenzi.—Int. 23:4.

KAMUYEEYA KUTI LUYANDO LWA JEHOVA NINJIISYO YANTALISYO YAMU BBAIBBELE

4. Amupe zikozyanyo zyanjiisyo zyantalisyo zyamu Bbaibbele alimwi akaambo ncotuzisyoma kapati.

⁴ Cintu cimwi cikonzya kutugwasya ciindi notujisi mapenzi, nkuyeeya luyando lwa Jehova kuti ninjiisyo yantalisyo yamu Bbaibbele. Ncinzi ciboola mumizeezo yanu mwamvwa mabala aakuti “njiisyo yantalisyo yamu Bbaibbele”? Ambweni muyeeya kasimpe kamu Bbaibbele nkomwakaiya. Mucikozyanyo, mwakaiya kuti zina lya Leza ngu Jehova, Jesu Mwana wa Leza simuzyalwaalikke, bafwide tabazyi cintu nociba comwe alimwi akuti kuyooba nyika mpya yaparadaiso mwalo bantu mobayoopona mane kukabe kutamani. (Int. 83:18; Muk. 9:5; Joh. 3:16; Ciy. 21:​3, 4) Ciindi nomwakaziiya njiisyo eezyi, kunyina nomwakalekela muntu uuli woonse kuti amulesye kuzisyoma. Nkaambo nzi? Nkaambo mwakazyiba kuti nzyamasimpe. Amuleke tulange-lange ikubona luyando lwa Jehova kuti ninjiisyo yantalisyo yamu Bbaibbele mbokukonzya kumugwasya kuleka kudooneka kuti Jehova ulamubikkila maano.

5. Amupandulule muntu mbwakonzya kuzikaka njiisyo zyakubeja.

⁵ Ciindi nomwakatalika kwiiya Bbaibbele, ncinzi cakamugwasya kuzikaka njiisyo zyakubeja? Ambweni nkwiinda mukweezyanisya zintu nzyomwakali kuyiisyigwa kucikombelo canu ancaamba Magwalo. Amubone cikozyanyo eeci comwe buyo: Ambweni mwakali kusyoma kuti Jesu ngu Leza Singuzuzyoonse. Nokuba boobo, ciindi nomwakali kuyaabwiiya Bbaibbele, kweelede kuti mwakalibuzya kuti: Mwati njiisyo eeyi njamasimpe?’ Ciindi nomwakaiya ncolyaamba Bbaibbele kujatikizya makani aaya, mwakazyiba kuti Jesu tali Leza pe. Muciindi cakuzumanana kusyoma njiisyo eeyo yakubeja, mwakatalika kusyoma kuti: Jesu “mutaanzi kuzyalwa kuzilenge zyoonse” alimwi akuti “Mwana wa Leza simuzyalwaalikke.” (Kol. 1:15; Joh. 3:18) Masimpe kuti njiisyo zyakubeja ‘ziyumu nta’ tulakonzya kuzikaka. (2Kor. 10:​4, 5) Pele ciindi nomwakaiya kasimpe, mwakalekela limwi kuzisyoma.—Flp. 3:13.

6. Nkaambo nzi ncotukonzya kuba masimpe kuti “luyando lwa Jehova lutamani nkoluli lyoonse”?

⁶ Mulakonzya kucita cintu cikozyenye kutegwa muzyibe ncolyaamba Bbaibbele kujatikizya luyando lwa Jehova. Ciindi nomwajana masunko akutalika kudooneka kuti naa Jehova ulamuyanda, amulibuzye kuti: ‘Sena kuyeeya kwangu kuliluzi?’ Ikuti kamudooneka kuti naa Jehova ulamuyanda, amubone ncolwaamba lugwalo lwa Intembauzyo 136:1 alo aayeeme cibalo eeci. Nkaambo nzi Jehova ncaambila kuti luyando lwakwe ‘talumani’? Nkaambo nzi mabala aakuti “luyando lwakwe lutamani nkoluli lyoonse mane kukabe kutamani” ncaayindulukwa ziindi zili 26 muntembauzyo eeyi? Kweelana ambotwabona kale, luyando Jehova ndwajisi kubantu bakwe ninjiisyo yamu Bbaibbele iiyandika kapati yalo iikozyenye anjiisyo zimwi nzyotwakaiya kuzwa mu Bbaibbele. Makani aakuti Jehova tatuyandi ngakubeja. Aboobo amwaakake makani aaya mbubonya mbomukonzya kukaka njiisyo zimbi zyakubeja!

7. Amwaambe zikozyanyo zyamu magwalo zitondezya kuti Jehova ulamuyanda.

⁷ Bbaibbele lilijisi zikozyanyo zinji zitondezya kuti Jehova ulatuyanda. Mucikozyanyo, Jesu wakaambila basikumutobela kuti: “Nywebo mulayandika kwiinda tutiiti tunji.” (Mt. 10:31) Alimwi Jehova lwakwe wakaambila bantu bakwe kuti: “Ndilakuyumya, inzya ndilakugwasya, ncobeni ndinookujatilide ajanza lyangu lyalulyo lyabululami.” (Is. 41:10) Amubone mbwaali aamasimpe majwi aaya. Jesu kunyina naakaamba kuti ‘Ambweni mulayandika’ alimwi Jehova kunyina naakaamba kuti ‘Ambweni ndilakugwasya.’ Muciindi caboobo, Jesu wakaamba kuti: “Mulayandika” mpoonya Jehova wakaamba kuti “ndilakugwasya.” Ikuti mwatalika kudooneka kuti naa Jehova ulamuyanda akaambo kakuti mujisi masunko, magwalo aali boobu taakonzyi kumupa buyo kulimvwa kabotu, pele alakonzya kumugwasya kuzyiba kuti ulamuyanda. Mulakonzya kwaasyoma makani aaya akaambo kakuti ngamasimpe. Kuti mwapaila kuli Jehova akuzinzibala kuyeeya kujatikizya magwalo aaya, muyoocikonzya kwaamba majwi aali kulugwalo lwa 1 Johane 4:16 aakuti: “Swebo lino twaluzyiba alimwi twalusyoma luyando ndwajisi Leza kulindiswe.”a

8. Ncinzi ncomukonzya kucita ikuti zimwi ziindi kamudooneka kuti naa Jehova ulamuyanda?

⁸ Ncinzi ncomukonzya kucita ikuti zimwi ziindi kamudooneka kuti naa Jehova ulamuyanda? Amweezyanisye mbomulimvwa kuzintu nzyomuzyi. Muntu ulakonzya kucinca mbwalimvwa, pele makani aamu Bbaibbele aamba kujatikizya luyando lwa Jehova taacinci, lyoonse ngamasimpe. Ikuti katudooneka kuti naa Jehova ulatuyanda, nkokuti inga caamba kuti twatalika kubudooneka bube bwakwe bwaluyando.—1Joh. 4:8.

AMUZINZIBALE KUYEEYA JEHOVA ‘MBWAMUYANDA’

9-10. Ino Jesu wakali kupandulula nzi ciindi naakaamba majwi aakuti: “Taata mwini ulamuyanda,” alo aalembedwe kulugwalo lwa Johane 16:​26, 27? (Amubone acifwanikiso.)

⁹ Tulakonzya kwiiya zinji kwiinda mukulanga-langa majwi Jesu ngaakaambila basikumutobela aakuti: “Taata mwini ulamuyanda.” (Amubale Johane 16:​26, 27.) Jesu tanaakaamba majwi aaya kutegwa abape kulimvwa buyo kabotu basikwiiya bakwe. Mubwini majwi aayengelede tupango ootu atondezya kuti tanaakali kwaamba mbobakali kulimvwa aciindi eeco. Muciindi caboobo, wakali kwaamba kaambo kaindene, nkokuti mupailo.

¹⁰ Jesu wakazwide aakwaambila basikwiiya bakwe kuti bakeelede kupaila kwiinda mulinguwe pele ikutali kulinguwe. (Joh. 16:​23, 24) Makani aaya bakeelede kwaazyiba nkaambo naakabusyigwa, basikwiiya bakali kukonzya kusunkwa kupaila kulinguwe. Amana buya, Jesu wakali mulongwe wabo. Akaambo kaceeci, bakali kukonzya kuyeeya kuti akaambo kakuti wakali kubayanda kapati, wakali kukonzya kwiiswiilila mipailo yabo akulomba Bausyi kuti babagwasye. Pele Jesu wakakululamika kuyeeya kwabo. Nkaambo nzi? Nkaambo wakabaambila kuti: “Taata mwini ulamuyanda.” Makani aaya aamasimpe ali akati kanjiisyo zyantalisyo zyamu Bbaibbele kujatikizya mupailo. Amuyeeye buyo makani aaya ncaamba kulindinywe: Kwiinda mukwiiya Bbaibbele, mwakamuzyiba akumuyanda Jesu. (Joh. 14:21) Pele mbubwenya mbuli basikwiiya bamumwaanda wamyaka wakusaanguna, mulakonzya kupaila kuli Leza kamusinizyide kuti walo “mwini ulamuyanda.” Mulatondezya kuti mulaasyoma majwi aaya ciindi cili coonse nomupaila kuli Jehova.—1Joh. 5:14.

AMUZYIBE CIMUPA KUDOONEKA

11. Nkaambo nzi Saatani ncakonzya kukkomana ikuti twatalika kudooneka naa Jehova ulatuyanda?

¹¹ Ino kudooneka luyando lwa Jehova kuzwa kuli? Mulakonzya kwiingula kuti kuzwa kuli Saatani, amana buya aayo masimpe. Diabolosi ‘uyanda kutumena buumbulu’ alimwi ulakonzya kukkomana ikuti twatalika kudooneka naa Jehova ulatuyanda. (1Pet. 5:8) Nokuba boobo, luyando Jehova ndwajisi kulindiswe lwakamukulwaizya kuti atupe cinunuzyo, cintu calo Saatani ncalimvwa kuti tacitweeleli. (Heb. 2:9) Pele ino nguni uukkomana kuti twalimvwa kuti Jehova tatuyandi? Ngu Saatani. Alimwi ino makanze aani aazuzikizyigwa ikuti twatyompwa akaambo kamapenzi? Nga Saatani ngomunya. Saatani uyanda kuti katulimvwa kuti Jehova tatuyandi pele ooko nkubeja. Amana buya walo ngonguwe uutayandwi a Jehova. Nokuba boobo, akati ‘kanzila zyabucenjezu’ nzyabelesya, usola kutupa kulimvwa kuti taakwe notuyandwa a Jehova akuti ulitusulide. (Ef. 6:11) Ikuti twacizyiba Saatani ncasola kucita, tuyooyumya makanze eesu aakuti tuzumanane ‘kumukazya.’—Jak. 4:7.

12-13. Mbuti cibi ncotwakakona mbocikonzya kutupa kudooneka kuti naa Jehova ulatuyanda?

¹² Kuli acimbi cikonzya kutupa kudooneka kuti naa Jehova ulatuyanda. Ino ncinzi eeco? Ncibi ncotwakakona. (Int. 51:5; Rom. 5:12) Cibi cakanyonganya cilongwe akati ka Jehova alimwi abantu. Kunze lyaboobo, cakanyonganya mbotuyeeya, mbotulimvwa alimwi abuumi bwesu.

¹³ Cibi cilatujatikizya toonse. Citupa kulimvwa bubi mbuli kulipa mulandu, kulibilika, kulimvwa kutakwabililwa akufwa nsoni. Tulakonzya kulimvwa boobo ciindi notwacita cibi. Pele alimwi tulakonzya kulimvwa boobo akaambo kakuti tulizyi kuti tuli basizibi mukwiimpana amakanze aa Leza aakusaanguna kujatikizya bantu. (Rom. 8:​20, 21) Mbubwenya moota mboitakonzyi kweenda kabotu akaambo kavwili liponcede, andiswe mbwaanga tatulondokede tatukonzyi kucita zintu cakumaninina kweelana ambotwakalengwa. Nkakaambo kaako, tacigambyi kuti zimwi ziindi tuladooneka kuti naa Jehova ulatuyanda. Ikuti eeci cacitika, tweelede kuyeeya kuti ‘Leza mupati, ulayoosya alimwi ulatondezya luyando lutamani kulibaabo bamuyanda abaabo babamba milawo yakwe.’—Neh. 1:5.

14. Mbuti kuzinzibala kuyeeya kujatikizya cinunuzyo mbokukonzya kutugwasya kuleka kudooneka kuti naa Jehova ulatuyanda? (Baroma 5:8) (Amubone akabbokesi kakuti “Amulikwabilile ‘Kukweenwa Anguzu zyacibi.’”)

¹⁴ Masimpe kuti zimwi ziindi, tulakonzya kulimvwa kuti tatweeleli kuyandwa a Jehova. Amana buya oobo mbocibede. Eeci ncecipa kuti luyando lwakwe kulindiswe kalulibedelede. Nokuba boobo, Jehova wakapa cinunuzyo kutegwa tukonzye kulekelelwa zibi zyesu akaambo kakuti ulatuyanda. (1Joh. 4:10) Alimwi kamuyeeya kuti, Jesu wakaboolela kufwutula basizibi ikutali bantu balondokede. (Amubale Baroma 5:8.) Kunyina akati kesu uukonzya kucita zintu cakulondoka alimwi Jehova talangili kuti tucite boobo. Ciindi notwazyiba kuti cibi cilakonzya kutupa kudooneka kuti naa Jehova ulatuyanda, tulakonzya kuba amakanze aakulwana kuyeeya kuli boobo.—Rom. 7:​24, 25.

AMUZUMANANE KUSYOMEKA

15-16. Ikuti twazumanana kusyomeka kuli Jehova, ncinzi ncotukonzya kuba masimpe? Nkaambo nzi? (2 Samuele 22:26)

¹⁵ Jehova uyanda kuti tupange zyakusala zili kabotu kwiinda ‘mukukakatila kulinguwe.’ (Dt. 30:​19, 20) Ikuti twacita oobo, tulakonzya kuba masimpe kuti uyoozumanana kusyomeka kulindiswe. (Amubale 2 Samuele 22:26.) Ikuti twazumanana kusyomeka kuli Jehova, tulakonzya kuba masimpe kuti uyootugwasya kuliyumya mubukkale buli boonse motukonzya kulijana.

¹⁶ Kweelana ambotwabandika mucibalo eeci, tulijisi twaambo tutupa kuzumanana kuliyumya kubuyumuyumu mbotukonzya kujana lino alimwi akumbele. Tulizyi kuti Jehova ulatuyanda alimwi unootugwasya. Amana buya eeco ncoliyiisya Bbaibbele. Ikuti twatalika kudooneka kuti naa Jehova ulatuyanda, tweelede kubikkila maano kuzintu nzyotuzyi kuti nzyamasimpe muciindi cakubikkila maano kujatikizya mbotulimvwa. Aboobo, aabe makanze eesu aakuzumanana kusyoma kuti luyando lwa Jehova nkoluli lyoonse mane kukabe kutamani kweelana a Bbaibbele mbolyaamba.