Nzila Zikonzya Kumugwasya Kutegwa Kamubala Bbaibbele Abuzuba

Akaambo kakuti tujisi zintu zinji zyakucita, tulakonzya kujana buyumuyumu bwakubala Bbaibbele abuzuba. (Jos. 1:8) Ikuti naa oobo mbocibede, amusole nzila imwi akati kazyeezyi:

• Amubikke cintu cinoomuyeezya. Amubikke alamu afooni naa atabbuleti yanu kutegwa kaimuyeezya kubala Bbaibbele.

• Amubikke Bbaibbele aawo mpomukonzya kunoolibona. Ikuti kamubelesya Bbaibbele lisimbidwe, amulibikke abusena mpomukonzya kunoolibona abuzuba.—Dt. 11:18.

• Amuswiilile ku Bbaibbele lyakalekkoodwa. Mulakonzya kucita oobo ciindi nomucita milimo imwi yabuzuba abuzuba. Muzyali wazina lya Tara alimwi mupainiya, uubeleka mulimo wakumubili ciindi camasiku wakaamba kuti, “Kuswiilila ku Bbaibbele lyakalekkoodwa ciindi nondicita tulimo tumwi twaaŋanda, cilandigwasya kutobela mulongo wangu wakubala Bbaibbele abuzuba.”

• Mutatyompwi pe. Ikuti kwaba cintu cimwi canyonganya bubambe bwanu bwakubala Bbaibbele, amubale tupango tusyoonto buyo kamutanoona. Ikubala tupango notuba tusyoonto buyo abuzuba; kulakonzya kumugwasya kapati.—1Pet. 2:2.