Sena Ndeelede Kucileka Kweenzya?

Sena muli mubukkale bwaambwa atala aawa? Ikuti kacili boobo, ncinzi cikonzya kumugwasya kubona naa mweelede kuzumanana kweenzya moota naa honda?

Mumasi amwi ikutegwa muntu iwainda aciimo cimwi azumanane kweenzya, weelede kupimwa naa kupegwa pepa limuzumizya adokota. Banakristo ibakkala mumasi aaya balaitobela milawo yamfwulumende. (Rom. 13:1) Nokuba boobo, ikuti mucisi momukkala taakwe milawo iili boobu, kuli mizeezo iikonzya kumugwasya kuzyiba naa mucili badilaiva beenzya kabotu.

AMULANGE-LANGE MBOMWEENZYA

Mbunga imwi yaku United States iitegwa National Institute on Aging (NIA) yakaamba kuti bacembeede beelede kulibuzya mibuzyo eeyi iitobela kutegwa babone naa balakonzya kuzumanana kweenzya:

• Sena ndijisi buyumuyumu bwakubala zikwankwani zyamumigwagwa naa kubona masiku?

• Sena ndijisi buyumuyumu bwakucenguluka kutegwa ndilange mugilazi alimwi akulanga masena aatalibonyi mugilazi?

• Sena ndijisi buyumuyumu bwakucita zintu cakufwaambana mbuli kulonzya kuulu kuzwa kupedo yamungwimba akukutola kupedo yamabbuleki?

• Sena ndeenzya aasyoonto-syoonto cakuti ndilabanyonganya banditobela?

• Sena kuli ciindi nondakali kuyanda kucita ntenda alimwi sena moota wangu naa honda ilijisi zikwambukwambu akaambo kakulimba zintu?

• Sena kuli ciindi nobakandiimikide kale bakapokola akaambo kakuteenzya kabotu?

• Sena kuli nondakaguna kale naa kuumfwula kumwi kandeenzya?

• Sena kuli misamu iili yoonse njondinywa yalo iikonzya kunyonganya mbondeenzya?

• Sena bamukwasyi wangu naa balongwe balalibilika kujatikizya mbondeenzya?

Ikuti mwaingula kuti inzya kumubuzyo omwe naa yobilo iili atala aawa, nkokuti inga mwayandika kupanga kucinca. Mucikozyanyo, inga mwayandika kucesya ciindi ncomweenzya kwaambisya ciindi camasiku. Ciindi aciindi mweelede kulilingula kujatikizya mbomweenzya. Mulakonzya kubuzya munamukwasyi naa mulongwe kutegwa amwaambile kujatikizya mbomweenzya. Kunze lyaboobo, mulakonzya kunjila cikolo cakwiiya kweenzya kabotu. Nokuba boobo, ikuti naa mwaingula kuti inzya kumibuzyo yiinda kuli yobilo yabuzyigwa atala aawa, nkokuti inga caba camaano kucileka kweenzya moota naa honda.a

AMUSOLOLELWE ANJIISYO ZYAMU BBAIBBELE

Tacili cuubauba kuzyiba kuti tamuceenzyi kabotu moota naa honda mbuli mbomwakali kucita kaindi. Alimwi makani aakucileka kweenzya alakonzya kumunyemya. Aboobo, mbuti njiisyo zyamu Bbaibbele mbozikonzya kumugwasya kuzilanga kabotu zintu alimwi akusala cabusongo? Amubone njiisyo eezyi zyobilo.

Amuzumanane kulibombya. (Tus. 11:2) Mbomuyaabucembaala, mulakonzya kuba apenzi lyameso, kumvwa, milambi alimwi akubula nguzu. Mucikozyanyo, bantu banji mbobayaabucembaala balacileka kusobana zisobano zimwi akaambo kakuti balizyi kuti ncuubauba kulicisa. Njiisyo njomunya ilabeleka caboola kumakani akweenzya moota naa honda. Muntu uulibombya ulakonzya kusala kucileka kweenzya kutegwa akwabilile buumi bwakwe. (Tus. 22:3) Alimwi ciindi bamwi nobalibilika kujatikizya nguwe, muntu uulibombya ulilibambilide kuswiilila.—Amweezyanisye a 2 Samuele 21:​15-17.

Amweelebe kuba amulandu wabulowa. (Dt. 22:8) Ikuti muntu kateenzyi kabotu, ulakonzya kucisa naa kujaya bantu. Muntu uuzumanana kweenzya moota naa honda nokuba kuti tacicikonzyi kweenzya kabotu, ulakonzya kubikka buumi bwakwe alimwi abwabamwi muntenda. Amana buya ulakonzya kuba amulandu wabulowa ikuti wajaya muntu.

Ikuti kacimukatazya kusala kuleka kweenzya, tamweelede kuyeeya kuti bamwi balakonzya kuleka kumulemeka akaambo kakuti tamuceenzyi. Jehova ulamuyanda akaambo kabube bubotu mbomujisi mbuli kulibombya, kulicesya alimwi akubikkila maano kubuumi bwabamwi. Usyomezya kumulanganya alimwi akumuumbulizya. (Is. 46:4) Kunze lyaboobo, takamulekelezyi pe. Aboobo, amumulombe kuti amugwasye kubelesya busongo alimwi akumvwisya ciindi nomusala kuleka kweenzya moota naa honda.