Ino Bbaibbele Lyaamba Nzi Kujatikizya Kukkala Antoomwe Amuntu Ngomutakwetene Limwi?
Bwiinguzi bwamu Bbaibbele
Bbaibbele lyaamba kuti Leza uyanda kuti bantu boonse ‘kabalilesya kubwaamu’ naa kukoonana ikutali kwamumulawo. (1 Batesalonika 4:3) Kweelana ambwaabesyedwe mu Bbaibbele, mabala aakuti “koonana ikutali kwamumulawo,” abikkilizya bumambe, koonana kwabantu bakozyenye zizo, akoonana kwabantu batakwetene.
Nkaambo nzi Leza ncayanda kuti mwaalumi amukaintu bakwatana mumulawo kabatanatalika kukkala antoomwe?
Bubambe bwacikwati buzwa kuli Leza. Wakacitalisya naakaswaanganya banabukwetene bakusaanguna. (Matalikilo 2:22-24) Tanaakali makanze aakwe kuti mwaalumi amukaintu kabakkala antoomwe kabatakwetene.
Leza ulizyi ncotuyandika kutegwa katupona kabotu. Wakatalisya cikwati kuti kacili caanzyo citamani akati kamwaalumi amukaintu akuti banamukwasyi kabakwabilidwe. Amubone cikozyanyo eeci. Mbubwenya mbomukonzya kupegwa malailile asikupanga cintu cimwi kutegwa muciswaanganye, malailile aa Leza alatugwasya mbotukonzya kuyumya mikwasyi. Zyeelelo zya Leza lyoonse zilabagwasya aabo bazitobela.—Isaya 48:17, 18.
Malailile aasikupanga cintu amugwasya kubona mbomweelede kuswaanganya cintu cimwi. Malailile aa Leza atugwasya kuba amikwasyi iizwidilila
Koonana amuntu ngomutakwetene limwi kulakonzya kumubikka muntenda. Mucikozyanyo, kuleta mada aamusyokwe, malwazi aaboola akaambo kakoonana, alimwi amalwazi aajatikizya mizeezo amoyo.
Leza wakabikka bubambe bwakuti bamaalumi abamakaintu kabazyala kwiinda mukoonana. Leza ubona buumi kuti bulisetekene, alimwi akuti kuzyala bana ncipego cibotu kapati. Leza uyanda kuti cipego eeci katucilemeka kwiinda mukulemeka bubambe bwacikwati.—Bahebrayo 13:4.
Ino mbuti kujatikizya kukkala antoomwe kamutanakwatana kutegwa mubone naa muleendelana?
Kutegwa muzwidilile mucikwati takuyandiki kuti mane buya musaangune kukkala antoomwe kamutakwetene akubona kuti naa muleendelana. Muciindi caboobo, cikwati cilayuma kuti boonse bobilo mucikwati kabasyomeka kumweenzinyina akubelekela antoomwe kuzunda mapenzi.a Kukwatana mumulawo kupa kuti kamucibikkila maano cikwati.—Matayo 19:6.
Mbuti banabukwetene mbobakonzya kuyumya cikwati cabo?
Kunyina zikwati zilondokede. Nokuba boobo, banabukwetene balakonzya kuyumya cikwati cabo kwiinda mukutobela lulayo lwamu Bbaibbele. Nzyeezyi zikozyanyo:
Amubikkile maano kuli nzyayandika ngomukwetene limwi kwiinda zyanu.—1 Bakorinto 7:3-5; Bafilipi 2:3, 4.
Amuyandane akulemekana.—Baefeso 5:25, 33.
Amwiiye kuujata mulaka.—Tusimpi 12:18.
Amukkazike moyo alimwi akufwambaana kulekelela.—Bakolose 3:13, 14.
a Amubone cibalo cakuti “Zikonzya Kupa Kuti Mukwasyi Uzwidilile—Kucibikkila Maano Cikwati.”