Kuzwa Kuli Sikwiiya Bbaibbele Omwe Kwaba Basikwiiya Banji

Ba Marta, Bakamboni ba Jehova baku Guatemala, baiya mwaambo waci Kekchi kutegwa kabacikonzya kukambaukila bantu mumwaambo ooyu makani aamu Bbaibbele. Bumwi buzuba, bakabona mwaalumi iwakali kuzwa mucibbadela. Kweelana ambwaakali kulibonya, ba Marta bakayeeyela kuti wakali kuzwa kumunzi uuli kumalundu kwalo nkobabelesya mwaambo ooyu, alimwi nkobatavwuli kukambaukila Bakamboni ba Jehova. Bakamutobela akukanana anguwe mumwaambo waci Kekchi ngobatakazyi kabotu.

Ba Marta bakamwaambila bubambe bwaciiyo ca Bbaibbele. Cikkomanisya ncakuti, wakazumina kwiiya, pele wakaamba kuti tanaakajisi mali akunoobbadela. Aboobo ba Marta bakamupandulwida kuti Bakamboni ba Jehova balaiya abantu Bbaibbele kakunyina kubbadelesya. Bakayungizya kumwaambila kuti balakonzya kwiiya kwiinda mukubelesya fooni akuti mukwasyi wakwe woonse inga wamusangana. Mwaalumi ooyu wakazumina. Akaambo kakuti wakali kukonzya kukanana alimwi akubala mwaambo waci Spanish, ba Marta bakamwaabila Bbaibbele lya Busanduluzi Bwanyika Mpya lyamu mwaambo ooyu. Alimwi bakamwaabila bbuku lyakwiiya lyakuti, Ino Ncinzi Cini Bbaibbele Ncolituyiisya? lyamu mwaambo waci Kekchi. Nsondo yakatobela, mwaalumi ooyu amukaintu wakwe kubikkilizya abana bakwe bobilo bakatalika kwiiya Bbaibbele aba Marta kubelesya fooni. Bakali kwiiya ziindi zyobilo mumvwiki. Ba Marta bakaamba kuti, “Akaambo kuti tiindakauzyi kabotu mwaambo waci Kekchi, twakali kubelesya ci Spanish, kumane mwaalumi ooyu wakali kumusandulwida mukaintu wakwe nzyotwakali kubandika. Pele bana bakwe bakaluuzyi mwaambo waci Spanish.”

Mwaalumi ooyu wakali musololi kucikombelo nkwaakali kunjila. Wakatalika kuyiisya basicikombelonyina zintu nzyaakali kwiiya muciiyo ca Bbaibbele. Basicikombelonyina bakazikkomanina nzyobakamvwa aboobo bakamubuzya nkwaakazijana njiisyo eezyo zipya. Naakabaambila kujatikizya ciiyo ca Bbaibbele, bakatalika kumusangana mukwiiya. Mumazuba buyo masyoonto, ibantu batandila ku 15 bakali kuswaangana nsondo-ansondo kwiiya Bbaibbele aba Marta kubelesya fooni. Mukuya kwaciindi, bakatalika kubikka maikkulofooni munsi-munsi afooni kutegwa boonse kabacikonzya kumvwa.

Ciindi ba Marta nobakaambila baalu bakumbungano yabo kujatikizya ciiyo ca Bbaibbele eeci, umwi wabaalu wakaswaya kumunzi nkobakali kukkala basikwiiya aaba. Aboobo wakabatamba kuti bakajanike kumakani aabuleya aakali kuyoopegwa amulangizi wabbazu,a kumunzi kwakali kweendwa woola lyomwe kubelesya moota, mpoonya akuzumanana kweenda amaulu kwamawoola obilo. Basikwiiya aaba bakakuzumina kutambwa ooku, aboobo ibali 17 bakajanika.

Munsondo izyakatobela, mulangizi wabbazu a Bakamboni bamwi bakabaswaya basikwiiya aaba kwamazuba one. Mafwumofwumo, bakali kweebelela mavidiyo aamba zyamu Bbaibbele amumwaambo waci Kekchi aali a jw.org, alimwi akwiiya mubroshuwa yakuti Ino Mbaani Bacita Kuyanda Kwa Jehova Mazuba Aano? Mpoonya kumazuba, bakali kweebelela zibeela zimwi a JW Broadcasting. Kumane, mulangizi wabbazu wakapanga bubambe bwakuti sikwiiya umwi-aumwi abe asikumuyiisya Bbaibbele uumugeme.

Mumazuba aayo one, Bakamboni bakakambauka munsi-munsi aamunzi ooyu akubatamba bantu kumuswaangano waalubazu. Kumuswaangano ooyu, bakwesu bakatamba boonse bali 47 ibakajanika kuti umwi aumwi abe asikumuyiisya Bbaibbele. Mikwasyi iili 11 yakazumina kuyiisyigwa Bbaibbele.

Mumyezi misyoonto yakatobela, baalu bakapanga bubambe bwakuti kabanoosololela miswaangano mumunzi ooyu nsondo ansondo. Mazuba aano, ibantu batandila ku 40 balajanika lyoonse kumiswaangano. Alimwi ciindi bakwesu nobakacita Ciibalusyo calufwu lwa Jesu mumunzi ooyu, bakakkomana kapati akaambo kamweelwe wabantu ibali 91 ibakajanika.

Ciindi nobayeeya kujatikizya mbwaakatalika makani aaya, ba Marta bakaamba kuti: “Ndilamulumba kapati Jehova. Zimwi ziindi ndilimvwa kuti inga tiindacita zinji. Pele Leza ulakonzya kutubelesya kutegwa tugwasye bantu. Wakalizyi icakali mumyoyo yabasimunzi abaya, aboobo wakabakwelela kubantu bakwe. Ulabayanda kapati.”