Bana Amafooni Mapati—Cibeela 1: Sena Mwanaangu Weelede Kuba Afooni Mpati?

Ibana banji mazuba aano balijisi mafooni mapati,a alimwi balaabelesya kuunka aintaneti ciindi nobali balikke. Ino mbubi nzi buliko bwakulekela mwanaanu kuba afooni iili boobu? Ino mbubotu nzi buliko? Ino ncinzi cikonzya kucitika kuti mwanaanu kabelesya ciindi cinji afooni?

• Ncomweelede kuzyiba

• Ncomweelede kubuzya

• Amulibuzye naa mulilibambilide

Ncomweelede kuzyiba

Bubotu

• Bana balakwabililwa, kumane bazyali tabalibiliki. Ba Bethany, imuzyali uujisi bana bakubusi bobilo bakaamba kuti: “Tupona munyika mbyaabi. Aboobo cilayandika kuti bana kabakwabana abazyali babo.”

  Imuzyali wazina lya Catherine wakayungizya kuti: “Mafooni amwi ajisi ma aapu aatondezya nkwabede mwana ikuti mwacita kkonekiti anguwe. Alimwi kuti keenzya moota, ilakonzya kumutondezya naa ubalika buti.”

• Alagwasya muzintu zyakucikolo. Ba Marie, imuzyali umwi wakaamba kuti: “Bana balatuminwa zyakucita kucikolo afooni yabo kubelesya e-mail naa tumeseji, mpoonya bamana balabatumina bamayi munzila njimunya eeyo.”

Bubi

• Kubelesya ciindi cinji. Bakubusi balaibelesya fooni mawoola manji mubuzuba. Mane buya, ciindi bazyali ncobabelesya amafooni inga ceelana aciindi ncobabelesya kubandika abana babo. Sikulaya uumwi wakaamba kuti mikwasyi yaba mbuli “beenzu ibaswaangana abusena bomwe pele boonse baluujisi kutyanka fooni yabo.”b

• Zintu zibusya muzeezo wakoonana. Kweelana abuvwuntauzi bumwi, bakubusi bainda kucisela bayandaula zintu zibusya muzeezo wakoonana mwezi amwezi. Eeci tacigambyi kayi ncuuba-uba kubelesya fooni kuzijana zintu zili boobo. Ba William, imuzyali uujisi bakubusi bobilo bakaamba kuti: “Kwiinda mukubapa fooni mpati, cakutazyiba bazyali bapa bana babo nzila yakujana zintu zibusya muzeezo wakoonana kuli koonse.”

• Cizibilizi. Bantu banji tabayaanzyi fooni yabo. Ikuti yasweeka, balalibilika kapati, tabazyi cakucita, alimwi buya balimvwa kuciswa. Bazyali bamwi bakaamba kuti bana babo baba ankazi kuti batalika kubelesya fooni. Ba Carmen bakaamba kuti: “Zimwi ziindi ndayanda kubandika amwanaangu, undibbindwida meso naa kunyema kutondezya kuti tayandi kumunyonganya.”

• Ntenda Azimwi. Kubelesya mafooni mapati kuleta ntenda yakusokwa aintaneti alimwi akulemba tumeseji naa kutuma mafwoto aamba zyakoonana, alimwi inga kwasololela kukuciswa akaambo kakukkala munzila imwi kwaciindi cilamfwu naa kutoona. Bakubusi bamwi babelesya ma aapu aamwi kusisa nzyobacita. Mucikozyanyo, balakonzya kubelesya aapu imwi kucita zyabufwubafwuba, mpoonya akulicengeezya kuti babelesya calculator kubazyali babo.

  Ba Daniel, bausyi mukubusi umwi, baamba boobu mubufwaafwi: “Fooni mpati ijalwida nzila mwanaanu yakubona zyoonse zili aintaneti, tacikwe makani naa nzibotu naa nzibi.”

Ncomweelede kubuzya

• ‘Sena mwanaangu uleelede kuba afooni mpati?’

  Bbaibbele lyaamba kuti: “Uucenjede ulakkala ansi kuyeeya ntaamu zyakwe.” (Tusimpi 14:15) Kamwaayeeyede majwi aaya, amulibuzye kuti:

  ‘Sena makani aabukwabilizi aambi buyo apa kuti mwanaangu ayelele kuba afooni mpati? Sena ndalanga-langa kujatikizya bubi abubotu? Sena kuli nzila iimbi kunze aakumupa fooni mpati?’

  Imuzyali wazina lya Todd wakaamba kuti: “Tufooni tusyoonto nkotucili, alimwi tulakonzya kupa kuti kamukwabana amwanaanu kwiinda mukutuminana naa kulembelana tumeseji. Alimwi mulakonzya kuyobola mali manji.”

• ‘Sena mwanaangu ulilibambilide kuba amukuli ooyu?’

  Bbaibbele lyaamba kuti: “Moyo wamusongo umusololela munzila iiluzi.” (Mukambausi 10:2) Kamwaayeeyede majwi aaya, amulibuzye kuti:

  ‘Ncinzi cindipa kuti ndimusyome mwanaangu? Sena ulabandika andime cakwaanguluka? Ino mwanaangu waalipangila zina nzi caboola kukusyomeka, sena ulasisa balongwe bakwe? Sena ulalilesya caboola kuzibelesyo zimwi mbuli TV, tabbuleti naa laputopu?’ Imuzyali wazina lya Serena wakaamba kuti: “Fooni mpati nimbotu kapati, pele alimwi ilakonzya kuleta mapenzi. Amuyeeye buyo mukuli ngomuyanda kupa mwanaanu kacili mwana.”

• ‘Sena ndililibambilide kuba amukuli ooyu?’

  Bbaibbele lyaamba kuti: “Koyiisya mwana inzila njayelede kweendela.” (Tusimpi 22:6) Kamwaayeeyede majwi aaya, amulibuzye kuti:

  ‘Sena ndiliizyi kabotu fooni cakuti inga ndamugwasya mwanaangu kuzyiba ntenda zikonzya kuba? Sena ndilizyi mboisetiŋwa fooni kutegwa kaitatondezyi zintu zitali kabotu? Ino inga ndamugwasya buti mwanaangu kusala kabotu caboola kukubelesya fooni?’ Ba Daniel, imuzyali waambwa kale wakaamba kuti: “Cuusisya ncakuti, bazyali banji balabapa mafooni mapati bana babo pele tababalangilili kubona mbobaabelesya.”

Masimpe ngakuti: Bana bayandika kuyiisyigwa kutegwa bazyibe kwiibelesya kabotu fooni. Bbuku litegwa Indistractable lyakaamba kuti: “Bana banji babelesya ciindi cinji afooni, kwaambisya kuti bazyali kabatabikkili maano kuzyiba cicitika naa kuti tababapi busolozi.”