Ino Mbuti Kuti Kandifeela Kucikolo?

“Kucikolo ndilababona basicikoloma bamwi mukkilasi kabatajisi mabbuku alimwi kabaswiilila nyimbo muma headphones, kumwi bayi kabayiisya. Mpoonya basicikolo aaba tabacizyi cibapa kufeela! Kumane kuli bali mbuli ndime, ibasolekesya canguzu, ibalijaya buya kubala, pele balafeela. Kwaamba masimpe, tandizyi ncocili boobu. Cilatyompya kaka kufeela ikuti walikumuka koona kwansondo yoonse koile kubala buyo kulibambila misunko.”—Yolanda.

Sena kuli nomwakalimvwide mbuli Yolanda? Kwaamba masimpe, cilatyompya kapati kufeela.

Bakubusi bamwi ibafeela kucikolo balakonzya kutyompwa akucileka kubikkila maano. Mane buya, ibamwi balakonzya kucilekela limwi cikolo. Nzila zyoonse eezyi zyobilo tazili kabotu, pele kuli nzila iimbi iikonzya kumugwasya kulimana penzi eeli. Amubone nzila izili 6 izikonzya kumugwasya kutegwa mutanoofeeli.

• Ncomweelede kucita

• Nzyobaamba beenzinyoko

Ncomweelede kucita

• Mutanoolovwi kucikolo. Muntu uuli woonse ulizyi kuti kutalovwa nkokupa kuti kapasa, pele kulovwa-lovwa kupa kufeela.

  “Kucikolo nkondakali kwiiya, basicikolo ibatakali kukombelela olo bafeela mbabakali kulovwa kapati kucikolo, pele eeci tiicakali kubagwasya.”—Matthew.

  Njiisyo yamu Bbaibbele: “Kufwumbwa cintu muntu ncasyanga, ncencico eeco ncayootebula.”—Bagalatiya 6:7.

• Amubikkile maano kapati nomuli mukkilasi. Nokuba kuti kujanika mukkilasi kulayandika kapati, mweelede kubikkila maano kutegwa mumvwisye zili mukuyiigwa. Kamulemba twaambo tupati-pati. Amusole kumvwisya nzyobayiisya bayi. Amubuzye mibuzyo ciindi nomwiiya ikuti kamuzumizyidwe.

  “Ndilaakubuzya mibuzyo minji ciindi cakwiiya kayi ndilizyi kuti bayi balapandulula kabotu ikuti bazyiba kuti kuli sicikolo watamvwisya.”—Olivia.

  Njiisyo yamu Bbaibbele: “Amubikkile maano mbomumvwa.”—Luka 8:18.

• Mutanookkopeli. Kukkopela nkutasyomeka. Kuli nzila zinji zyakutasyomeka kucikolo. Imwi nzila njakukkopela nzyobalemba bamwi. Ooku takuli buyo kutasyomeka pele alimwi kupa kuti mube badaalu.

  “Ikuti kamutamvwisyi, tamweelede kukkopela nzyobalemba basicikolo bamwi ciindi camusunko. Ikuti kamukkopela nkokuti mwiile kulicenga nobeni. Muciindi cakubelesya bongo bwanu, muliyiisya buyo kusyoma bongo bwabamwi.”—Jonathan.

  Njiisyo yamu Bbaibbele: “Umwi aumwi alingule nzyacita lwakwe mwini, mpoonya ulajana kaambo kamupa kukondwa.”—Bagalatiya 6:4.

• Kamukubikkila maano kucita homuweki. Ikuti kacikonzyeka, amusaangune kucita homuweki kamutanatalika kucita zintu zimwi, kwaambisya zyakulikondelezya.a Kwiinda mukucita boobo, munakulyookezya kakunyina kulibilika!

  “Ndakali kusaanguna kucita homuweki, aboobo eeci cakali kundipa kucita kabotu. Ndasika kuŋanda, kanji-kanji ndakali kusunkwa koona asyoonto naa kuswiilila nyimbo. Pele ndakali kusaanguna kucita homuweki mpoonya nondiya ndilyookezye.”—Calvin.

  Njiisyo yamu Bbaibbele: “Musinizye zintu ziyandika kapati.”—Bafilipi 1:10.

• Amulombe lugwasyo. Tamweelede kufwa nsoni kulomba lugwasyo. Amulombe lulayo kubazyali banu. Amubuzye bayi banu kuti bamugwasye mbomukonzya kupasa. Mane alimwi mulakonzya kugwasyigwa abayi bakuma tuition.

  “Amubagame bayi. Amubabuzye kuti bamugwasye kumvwisya ncomwiiya ambomukonzya kupasa. Bayi bayookkomana akaambo kamakanze aanu aakuyanda kupasa aboobo bayoomugwasya.”—David.

  Njiisyo yamu Bbaibbele: “Ikuti kakuli basikulaya banji kulaba kuzwidilila.”—Tusimpi 15:22.

• Amucibelesye coolwe cili coonse. Muzisi zimwi, mumisunko imwi inga kulaba mibuzyo iiyungizyidwe iigwasya. Alimwi mulakonzya kulisungula kulemba misunko imwi kutegwa muyaambele. Ikuti mwafeela musunko, mulakonzya kulembulula naa mwalomba kucita boobo.

  

  “Ikuti kandiyanda kunoopasa muziiyo, ndeelede kusaanguna kubweza ntaamu. Ndilababuzya bamayi bangu ikuti naa kuli misunko yakulisungula njondeelede kulembulula kutegwa ndisumpuke.”—Mackenzie.

  Njiisyo yamu Bbaibbele: “Mulimo uuli woonse uubelekwa canguzu ujanya mpindu.”—Tusimpi 14:23.