Sena Inga Ndazwidilila Alwiiyo Lwakuyiila Aŋanda?

Basicikolo banji lino tabacuunki kucikolo kwini kuyakwiiya pele bayiila aŋanda. Ikuti naa mbocibede oobo kulindinywe, ino mbuti mbomukonzya kugwasyigwa kapati anzila eeyi? Njeeyi mizeezo imwi.a

• Nzila zyosanwe izikonzya kumugwasya kuzwidilila

• Nzyobaamba beenzinyoko

Nzila zyosanwe izikonzya kumugwasya kuzwidilila

• Amube amulongo. Amusolekesye kuutobela lyoonse mulongo wanu, mbuli mbomwali kunoocita kuti nomwali kucikolo. Amube aciindi cigaminide cakucita zyakucikolo, milimo yaaŋanda, alimwi azimwi ziyandika kapati. Ikuti kwayandika mulakonzya kuucinca mulongo wanu.

  Njiisyo yamu Bbaibbele: “Zintu zyoonse azicitwe . . . kweelana abubambe.”—1 Bakorinto 14:40.

  “Amucite zintu mbuli kuti muli kucikolo. Mweelede kucita zintu acimwi aciindi cancico.”—Katie.

  Ncomweelede kuyeeya: Nkaambo nzi ncociyandika kulemba mulongo akuubikka waawo mpomukonzya kufwambaana kuubona?

• Kamulyeendelezya. Kuba muntu uusimide cibikkilizya kucita milimo yanu, nokuba kuti tamulimvwi kuyanda kwiicita. Mutanoosumpyi pe!

  Njiisyo yamu Bbaibbele: “Amube bankutwe, mutabi batolo pe.”—Baroma 12:11.

  “Kulyeendelezya ncintu ciyumu kapati. Ncuuba-uba kupa zilitamizyo akwaamba kuti, ‘Ndilaicita aakale milimo yakucikolo.’ Kumane tamwiiciti, calo cipa kuti musyaalile.”—Alexandra.

  Ncomweelede kuyeeya: Ino mbuti kucita milimo yanu yakucikolo buzuba abuzuba, aciindi nciconya alimwi aabusena mbubonya mbokukonzya kupa kuti muyaambele mukulyeendelezya?

• Amujane busena nkomukonzya kubalila. Amube azibelesyo zyoonse ziyandika. Amububambe busena bwanu bwakubalila munzila iikonzya kumupa kulikwaya, pele iitakonzyi kumuletela ŋonzi. Makanze aanu ngakubala kutali koona pe! Ikuti kamutajisi busena bugaminide bwakucitila zyakucikolo, ambweni mulakonzya kubelesya ncikini naa bbedilumu.

  Njiisyo yamu Bbaibbele: “Makanze aabankutwe masimpe apa kuzwidilila.”—Tusimpi 21:5.

  “Amwiibikke ambali bbola, mageemu, aziimbyo, alimwi fooni amwiisetiŋe mpoitakonzyi kumunyonganya. Kutegwa mwiiye kabotu, tamweelede kuba azintu zikonzya kumunyonganya munsi lyanu.”—Elizabeth.

  Ncomweelede kuyeeya: Ino nzintu nzi nzyomweelede kubikka kabotu kutegwa kazitamunyonganyi nomubala?

• Amwiiye kubikkila maano. Amubikkile maano kuciiyo ncomwiiya aciindi aawo kutali kucita zinji aciindi comwe. Ikuti mwasola kucita zinji aciindi comwe, mulalangilwa kulubizya mpoonya akutola ciindi cinji kumanizya mulimo wanu.

  Njiisyo yamu Bbaibbele: “Kamucibelesya kabotu ciindi coonse ncomujisi.”—Baefeso 5:16.

  “Tiindakali kubikkila maano kuti naa fooni kaili afwaafwi. Ndakali kusowa ciindi cinji kucita zintu zitagwasyi.”—Olivia.

  Ncomweelede kuyeeya: Sena mulakonzya kuyungizya asyoonto-syoonto ciindi ncomubelesya kuciiyo cimwi acimwi?

• Kamulyookezya. Amweendeende, kuccovwa ncinga, naa kunyanyaansya mubili. Akwalo kucita cintu ncomukkomanina kulakonzya kumukatalusya. “Pele amusaangune kucita mulimo wanu,” mbolyaamba bbuku litegwa School Power. “Muyoocikkomanina kapati ciindi cakulyookezya kuti kamutajisi mulimo uumulindila.”

  Njiisyo yamu Bbaibbele: “Kulyookezya kusyoonto nkubotu kwiinda kulijaya kubeleka mulimo muyumu akutandaanya muwo.”—Mukambausi 4:6.

  “Kanji-kanji kucikolo mulakonzya kwiiya mbozilizigwa ziimbyo naa kuzekaula. Ciindi nondakajisi coolwe cakuzicita zintu eezyi, tiindakacibelesya. Cilayandika kucita cintu ncomukkomanina kunze buyo lyakubala.”—Taylor.

  Ncomweelede kuyeeya: Ino nkulyookezya kuli buti kuyoomugwasya kuti mucikonzye kucita milimo yakucikolo kamujisi mizeezo iikkalikene?