BAKUBUSI BALABUZYA
Ncinzi Ncondeelede Kuyoocita Ndaakubbapatizyigwa?—Cibeela 1: Amuzumanane Kucita Milimo Mibotu
Muyandika kuzibamba kabotu zintu zyanu ziyandisi, mbuli ŋanda yanu alimwi amoota. Ncimwi buyo acilongwe canu a Leza. Mbuti mbomuyoocibamba cilongwe eeco mwaakubbapatizyigwa?
Mucibalo eeci tulalanga-langa makani aatobela:
Amuzumanane kubala Jwi lya Leza
Lugwalo luyandika: ‘Amuzumanane kuzyala micelo mumilimo mibotu iili yoonse akuyungizya luzyibo lwini-lwini lwa Leza.’—Bakolose 1:10.
Bupanduluzi: Mwaakubbapatizyigwa, muyooyandika kuzumanana kubala Bbaibbele alimwi akuzinzibala kuyeeya nzyomubala.—Intembauzyo 25:4; 119:97.
Ncomweelede kuzyiba: Aziindi zimwi, tamunooyandi kubala. Mulakonzya kuyeeya kuti tamuciti kabotu caboola mumakani aakubala.
Ncomukonzya kucita: Amwiiye zinji kujatikizya makani aamukkomanisya mu Bbaibbele. Amubambe pulogilamu iili kabotu yakubala, yalo eeyo iitakamuminyi. Ciindi nomubala, makanze aanu ayelede kuba aakuyumya luyando lwanu kuli Jehova a Jwi lyakwe. Kubala kuli boobu kulagwasya alimwi kulakkomanisya.—Intembauzyo 16:11.
Muzeezo: Kutegwa mugwasyigwe kapati anzyomubala, amusole kubalila abusena aatakwe coongo aawo mpomutakonzyi kunyonganizyigwa azintu zimwi.
Sena mulayanda lugwasyo alumbi?
Amubale zibalo zyakuti:
“Ino Bbaibbele Inga Lyandigwasya Buti?—Cibeela 2: Mbondikonzya Kukukkomanina Kubala Bbaibbele”
Amweebelele kavidiyo kakuti:
Amudaunilode cibalo cakuti:
Amuzumanane kupaila kuli Jehova
Lugwalo luyandika: “Mutalibiliki acintu nociba comwe, pele muzintu zyoonse, kwiinda mumupailo akukombelezya antoomwe akulumba, amumuzyibye Leza nzyomulomba.”—Bafilipi 4:6.
Bupanduluzi: Kubandika a Leza kuli mumbazu zyobilo: Mulamuswiilila ciindi nomubala Jwi lyakwe; mulaambaula anguwe ciindi nomupaila. Amuzyibe kuti mipailo yanu ilakonzya kubikkilizya akulomba zintu nzyomuyandika alimwi akulumba akaambo kazilongezyo nzyomujisi.
Ncomweelede kuzyiba: Aziindi zimwi, mipailo yanu ilakonzya kuba yakwiinzya buyo mulawo. Mane buya, mulakonzya kutalika kudooneka naa Jehova ulaswiilila ncobeni akuti ulayanda kumuswiilila.—Intembauzyo 10:1.
Ncomukonzya kucita: Buzuba boonse amuyeeye zintu nzyomukonzya kupailila. Ikuti bukkale bwanu kabutamuzumizyi kupaila mipailo milamfwu, amujane ciindi cimbi mubuzuba mbubwenya oobo kutegwa mupaile cakuliiba. Amupailile zintu ziyandika kapati kulindinywe alimwi akupailila bamwi.—Bafilipi 2:4.
Muzeezo: Ikuti kamupaila cakwiinzya mulawo, amumwaambile Jehova kujatikizya makani aaya. Ulayanda kumvwa zyoonse nzyomulibilika, kubikkilizya azeezyo zijatikizya mipailo yanu.—1 Johane 5:14.
Sena mulayanda lugwasyo alumbi?
Amubale cibalo cakuti:
Amudaunilode cibalo cakuti:
Amuzumanane kwaambila bamwi zyalusyomo lwanu
Lugwalo luyandika: “Lyoonse kolibamba omwini akubikkila maano kapati kukuyiisya kwako. . . . kwiinda mukucita boobo uyoolifwutula omwini alimwi abaabo bakuswiilila.”—1 Timoteyo 4:16.
Bupanduluzi: Ciindi nomwaambila bamwi kujatikizya nzyomusyoma, lusyomo lwanu lulayuma alwalo. Kwiinda mukucita boobo, mulakonzya kufwutula buumi bwabaabo bamuswiilila alimwi abuumi bwanu.
Ncomweelede kuzyiba: Aziindi zimwi, mulakonzya kulengaana kwaambila bamwi nzyomusyoma. Ambweni mulakonzya kuyoowa kucita boobo, kwaambisya kucikolo.
Ncomukonzya kucita: Mutazumizyi kulimvwa bubi naa kuyoowa kumweendelezya. Mwaapostolo Paulo wakalemba kuti: “Pele ikuti [nondaambilizya makani mabotu] ndilisinikizya buya, alyalo eelyo ndilijisi bubanzi mbondakapegwa.”—1 Bakorinto 9:16, 17.
Muzeezo: Kwiinda mukuzumizyigwa abazyali banu, amujane muntu umwi uukonzya kumugwasya. Muntu ooyo weelede kuba Kamboni uucita kabotu mumulimo wamumuunda.—Tusimpi 27:17.
Sena mulayanda lugwasyo alumbi?
Amubale cibalo cakuti:
“Why Am I Afraid to Share My Faith?” icili mucikuwa
Amuzumanane kujanika kumiswaangano ya Bunakristo
Lugwalo luyandika: “Katubikkilana maano ikutegwa tukulwaizyanye kutondezya luyando akucita milimo mibotu, tutanooleki kuswaangana antoomwe.”—Bahebrayo 10:24, 25.
Bupanduluzi: Kaambo kapati ncotuswaanganina, nkukomba Jehova. Pele alimwi kuli bubotu bobilo abumbi ciindi nomujanika kumiswaangano. Bwakusaanguna, bakwesu alimwi abacizyi balamukulwaizya. Bwabili, mulabakulwaizya ciindi nomujanika alimwi akutola lubazu.—Baroma 1:11, 12.
Ncomweelede kuzyiba: Ziindi zimwi lyamiswaangano, mulakonzya kutalika kuyeeya zintu zimbi. Eeci inga capa kuti mwiindwe izili mukuyiisyigwa. Naa ambweni mulakonzya kutalika kusotaukila miswaangano imwi, akaambo kakuti mubikkila maano kuzintu zimbi, mbuli homuweki.
Ncomukonzya kucita: Nokuba kuti tamweelede kuleka kucita milimo iijatikizya cikolo, amube amakanze aakujanika kumiswaangano lyoonse, akuba masimpe kuti mulagwasyigwa kapati. Mweelede kutola lubazu lyamiswaangano. Yamana miswaangano, amulumbaizye naba muntu omwe akaambo kakutola lubazu.
Muzeezo: Amulibambile kamutanaunka kumiswaangano. Amucite daunilodi aapu ya JW Library®, mpoonya akubelesya cibeela cakuti “Meetings” kutegwa mubone zintu ziyiigwa lyamuswaangano umwi aumwi.
Sena mulayanda lugwasyo alumbi?
Amubale cibalo cakuti:
“Nkaambo nzi Ncindeelede Kuunka Kumiswaangano ya Bunakristo?”