Sena Bugwebenga Kuli Nobuyoomana?

Ciindi zigwebenga nozyamana kulwana bantu, mulakonzya kulibuzya kuti: ‘Mwati Leza ulatulanganya? Nkaambo nzi zintu zili boobu ncozicitika? Sena bugwebengaa kuli nobuyoomana? Mbuti mbondikonzya kupona abuyoofwu mbondijisi?’ Bbaibbele lilapa bwiinguzi bukkazika moyo kumibuzyo yoonse eeyi.

Ino Leza ulimvwa buti kujatikizya bugwebenga?

Leza ulaisulaika nkondo alimwi abugwebenga. (Intembauzyo 11:5; Tusimpi 6:16, 17) Alimwi Jesu, mwiiminizi wa Leza, wakabakalalila basikwiiya bakwe nobakalwana basinkondonyina. (Matayo 26:50-52) Nokuba kuti bamwi balitaminina kulwana beenzinyina muzina lya Leza, walo taizumizyi micito yabo pe. Alimwi buya, taiswiilili amipailo yabo.—Isaya 1:15.

Leza ulababikkila maano aabo boonse bapengede, kubikkilizya abaabo bakalwanwa azigwebenga. (Intembauzyo 31:7; 1 Petro 5:7) Bbaibbele alimwi litondezya kuti uyoobweza ntaamu yakwiimana nkondo cakumaninina.—Isaya 60:18.

Cipa kuti kakuli bugwebenga

Bbaibbele lilayubununa cipa kuti kakuli bugwebenga: ‘Muntu weendelezya muntunyina munzila iimuletela mapenzi.’ (Mukambausi 8:9) Kuzwa kaindi, bantu balaanguzu balikubelesya bugwebenga kudyaaminina bamwi. Akaambo kaceeci, aabo ibakali kudyaamininwa, abalo baba zigwebenga.—Mukambausi 7:7.

Mamanino aabugwebenga

Leza wakasyomezya kumana buyoofwu ankondo. Alimwi akuleta luumuno anyika. (Isaya 32:18; Mika 4:3, 4)

Uyoogwisya zintu zipa kuti kakuli bugwebenga. Leza uyoogwisya mfwulumende zyabantu akuleta mfwulumende yakwe inakweendelezya nyika yoonse. Mweendelezi wamfwulumende eeyi, Jesu Kristo, uyoobeendelezya kabotu bantu boonse, alimwi akugusya kudyaamininwa ankondo. (Intembauzyo 72:2, 14) Aciindi eeco, taakwe muntu uyooba cigwebenga. Bantu “bayoobotelwa kapati muluumuno lunji.”—Intembauzyo 37:10, 11.
Uyakwaamanizya mapenzi oonse aaboola akaambo kabugwebenga. Leza uyoobaponya bantu boonse bajatikizyidwe amapenzi aaboola akaambo kabugwebenga, kube kumubili naa mumizeezo. (Isaya 65:17; Ciyubunuzyo 21:3, 4) Alimwi buya wasyomezya kuyoobabusya bafwide, akupa kuti bakapone alimwi anyika iizwide luumuno.—Johane 5:28, 29.

Bbaibbele lilaamba twaambo tumvwika tutupa kusyoma kuti ino-ino Leza uyoobweza ntaamu. Nokuba boobo, ambweni mulakonzya kulibuzya kuti, ‘Nkaambo nzi Leza ncatabugwisyili bugwebenga?’ Kutegwa mujane bwiinguzi, amweebelele kavidiyo kakuti Nkaambo Nzi Leza Ncalekelede Kupenga?

a Ibbala lya “bugwebenga” kanji-kanji lyaamba kukonga kulwana naa kubalwana buya bantu buyo batakwe amulandu kutegwa bayoowe alimwi akupa kuti kube kucinca mumakani aamwi aajatikizya mapolitikisi, bukombi naa bukkale bumbi buyo. Nokuba boobo, bantu balakonzya kwiimpana mbobabona micito imwi ikuti mbugwebenga naa pe.

Bbaibbele lilabagwasya bantu kuliyumya

Njeeyi mizeezo yobilo iizwa mu Bbaibbele iikonzya kumugwasya.

Amupaile kuli Leza.—Bafilipi 4:6, 7.
Amubikkile maano kubulangizi Bbaibbele mbolimupa.—Bahebrayo 6:19.

Kutegwa mujane mizeezo aimbi iizwa mu Bbaibbele, amubone cibalo cakuti “Mbomukonzya Kulwana Kulibilika.”

Bakamboni ba Jehova ibaliyumya kubugwebenga bagwasyigwa kapati abakombinyina. Amulange-lange zikozyanyo zyobilo:

Ba Natalya amwanaabo musankwa Aslan uujisi myaka iili 9, bakali acikolo ku Beslan, Russia, ciindi zigwebenga izyakajisi ntobolo nozyakanjila akujata bantu bainda ku 1,000. Cuusisya ncakuti, banji bakafwa alimwi bunji bwabo bakali bana. Nokuba kuti ba Natalya amwanaabo Aslan bakafwutuka, bakanyongana kapati mumizeezo. Amubone icabagwasya kuba kabotu alimwi.
Ba Pablo aba Sophie bakafwidwa mwanaabo musankwa ciindi mayake aakali kwiitwa kuti Twin Towers ku New York naakanyonyoonwa. Amweebelele kavidiyo aaka kutegwa mubone icakabagwasya balo alimwi abamwi ibakajatikizyigwa muntenda eeyi.