AMULANGILE!
Bukombi Alimwi Ankondo Iili ku Ukraine—Ino Bbaibbele Lyaamba Nzi?
Amulange-lange makani aatobela kujatikizya basololi bazikombelo badumide alimwi ankondo iili ku Ukraine:
“Musololi wacikombelo ca Orthodox ku Russia, wazina lya Kirill, kunyina ncaambide kujatikizya kulwana nkwacita Russia. . . . Cikombelo cakwe cazumanana kumwaya makani aakubeja kujatikizya Ukraine, kumane Putin wabelesya makani aaya kukulwaizya nkondo.”—EUobserver, March 7, 2022.
“Musololi wazina lya Kirill . . . watondezya kuti ulakuzuminizya kulwanwa kwa cisi ca Ukraine kwiinda mukwaamba kuti nkondo eeyi ncibeela camulimo wakumana cibi.”—AP News, March 8, 2022.
“Mumuhulo, musololi wacikombelo citegwa Ukrainian Orthodox Church, Epiphanius I waku Kyiv, wakalongezya bantu bakwe kutegwa ‘balwane basikalumamba bana Russia’ . . . kumane [wakayungizya] kuti tacili cinyonyoono kujaya basikalumamba bana Russia.”—Jerusalem Post, March 16, 2022.
“Swebo notuzulilwa mumbunga ya [Ukrainian Council of Churches and Religious Organizations (UCCRO)] tuli kulubazu lwabasikalumamba bana Ukraine alimwi aboonse ibatukwabilila, twaulongezya mulimo ngobacita alimwi tulabapailila.”—Majwi aaba UCCROa, February 24, 2022.
Ino muyeeya buti? Sena zikombelo izilitaminina kutobela Jesu Kristo zyeelede kukulwaizya bantu bazulilwa mulinzizyo kutola lubazu munkondo? Ino Bbaibbele lyaamba nzi?
Makani aakaindi aamba zikombelo mbozyali kutola lubazu munkondo
Makani aakaindi atondezya kuti, bunji bwaziindi zikombelo zyali kwaamba kuti cili buyo kabotu kutola lubazu munkondo, kunyina cilubide mukucita boobo, naa kuti cileelela buya, kumwi kazilicengeezya kuyanda kuleta luumuno. Kwamyaka minji, Bakamboni ba Jehova bali kugwasya bantu kubona kuti ooku nkuupaupa ameso.
Sena zikombelo zya Bunakristo zyeelede kutola lubazu munkondo?
Ncaakayiisya Jesu: “Weelede kuyanda simukobonyoko mbubonya mbuli mboliyanda omwini.” (Matayo 22:39) “Amuzumanane kuyanda basinkondonyoko.”—Matayo 5:44-47.
Amulange-lange: Sena cikombelo cilakonzya kulitaminina kuti cilaitobela milawo ya Jesu iijatikizya luyando mpoonya aciindi ncoona akukulwaizya basicikombelo kujaya bamwi lyankondo? Kutegwa mujane bwiinguzi amubale cibalo camu Cikuwa cakuti, “True Christians and War” alimwi acakuti “Sena Muntu Ulakonzya Kubayanda Basinkondonyina?”
Ncaakaamba Jesu: “Bwami bwangu tabuli bwanyika eeyi. Ikuti Bwami bwangu nobwali bwanyika eeyi, ibabelesi bangu nobalwana kutegwa nditaabwi.” (Johane 18:36) “Boonse aabo babweza panga bayoojaigwa apanga.”—Matayo 26:47-52.
Amulange-lange: Ikuti Banakristo tiibakalwana kukwabilila Jesu, sena kuli kaambo kali koonse keelede kubapa kulwana? Amubale cibalo camu Cikuwa cakuti “Is War Compatible With Christianity?” kutegwa mubone Banakristo bakusaanguna basyomeka mbobakatobela cikozyanyo ca Jesu alimwi azintu nzyaakali kuyiisya.
Ino ncinzi ciyoocitikila zikombelo zikulwaizya nkondo?
Bbaibbele liyiisya kuti Leza ulazikaka zikombelo zilitaminina kuti ziiminina Jesu kakuli tazitobeli njiisyo zyakwe.—Matayo 7:21-23; Tito 1:16.
Bbuku lya Ciyubunuzyo litondezya kuti Leza ubona zikombelo zili boobu kuba amulandu walufwu lwa “bantu boonse buyo ibakajaigwa anyika.” (Ciyubunuzyo 18:21, 24) Kutegwa muzyibe kaambo ncocili boobo, amubale cibalo cakuti “Ino Babuloni Mupati Nguni?”
Jesu wakaamba kuti zikombelo zyoonse zitamukkomanisyi Leza ziyoonyonyoonwa akaambo kamilimo yanzizyo, mbubonya mbuli cisamu cibolede cizyala micelo iibolede ‘mbocigonkwa akusowelwa mumulilo.’ (Matayo 7:15-20) Amubale cibalo cakuti “Mamanino Aabukombi Bwakubeja Ali Afwaafwi!” kutegwa muzyibe mbociyoocitika eeci.
Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a Mumbunga ya UCCRO, naa Ukrainian Council of Churches and Religious Organizations, kuli zikombelo zili 15 iziiminina Orthodox, Greek a Roman Catholic, Protestant, alimwi aca Evangelical kubikkilizya aba Juda alimwi aba Mozilemu.