AMULANGILE!
Nkondo Iili ku Ukraine Yapa Kuti Kube Penzi Lyakubula Cakulya Nyika Yoonse
Mu May 19, 2022, ba United Nations Security Council bakamvwa malipooti kuzwa kunkume-nkume zyamfwulumende ziinda ku 75 aakuti “penzi lyakubula zyakulya, ilyakaba akaambo kabulwazi bwa COVID-19 alimwi akucinca kwambowuunga muwo, liyaabwiindilila lino nyika yoonse akaambo kankondo iili ku Ukraine. Eeci caamba kuti mumasena aamwi kulalangilwa kuba nzala mpati.” Kuyungizya waawo, magazini iitegwa The Economist yakaamba kuti, “akaambo kankondo, bantu balaindila buya kupenga, kayi munyika muli kale mapenzi manji.” Bbaibbele lyakaambila limwi kuti nzala iili boobu inooliko muciindi cesu, pele alimwi lilatupa lugwasyo lujatikizya mbotukonzya kuliyumya.
Bbaibbele lyakasinsima kujatikizya nzala
Jesu wakasinsima kuti: “Cisi ciyoobukila cisinyina abwami buyoobukila bwaminyina, alimwi kuyooba nzala.”—Matayo 24:7.
Bbuku lyamu Bbaibbele lya Ciyubunuzyo lyaamba kujatikizya basimabbiza bone bamucikozyanyo. Umwi wabasimabbiza aaba wiiminina nkondo. Mpoonya ulatobelwa aumwi iwiiminina nzala. Aciindi eeci cinookatazya kujana cakulya alimwi cinoodula kapati. “Ndakalanga akubona ibbiza lisiya, alimwi ooyo wakatantide alindilyo wakajisi cikkelo mujanza lyakwe. Alimwi ndakamvwa icakali kulimvwisya mbuli kuti ndijwi . . . kaliti: ‘Kkilo lyomwe lyawiiti lilaulwa dinari lyomwe, makkilo otatwe aabbaale alaulwa dinari lyomwe.’”—Ciyubunuzyo 6:5, 6.
Businsimi oobu bwamu Bbaibbele bujatikizya penzi lyakubula zyakulya buli mukuzuzikizyigwa mazuba aano muciindi Bbaibbele ncolyaamba kuti “mazuba aamamanino.” (2 Timoteyo 3:1) Kutegwa mwiiye zinji kujatikizya “mazuba aamamanino” alimwi abasimabbiza bone baambidwe kubbuku lya Ciyubunuzyo, amweebelele kavidiyo kakuti, Nyika Yakacinca Kuzwa mu 1914 alimwi akubala cibalo cakuti “Basimabbiza Bone—Ino Mbaani?”
Bbaibbele mbolikonzya kugwasya
Bbaibbele lilijisi lulayo lukonzya kutugwasya kuliyumya mubukkale bukatazya, kubikkilizya aaciindi zyakulya nolyadula naa kubula buya. Amubone zikozyanyo zimwi mucibalo cakuti “Mbomukonzya Kuubya-ubya Bukkale Bwanu.”
Bbaibbele alimwi lilatupa bulangizi bwakuti zintu ziyoobota kumbele. Lisyomezya ciindi ‘nokuyooba maila manji anyika’ alimwi bantu boonse nobanoojisi zyakulya zinji. (Intembauzyo 72:16) Kutegwa muzyibe zinji kujatikizya bulangizi bwamu Bbaibbele bwakumbele alimwi ancomukonzya kubusyoma, amubale cibalo cakuti “Bulangizi Bwini-bwini Bwabuumi Bubotu Kumbele.”