Sena World Cup Ilakonzya Kubakamantanya Ncobeni Bantu?​—Ino Bbaibbele Lyaamba Nzi?

Bantu babalilwa ku 5 bbiliyoni balalangilwa kweebelela FIFA World Cup iyootalika mu November 20 kusikila mu December 18, 2022. Ibantu banji balimvwa kuti kweebelela bbola antoomwe kulakonzya kucita zinji kunze buyo lyakubakamantanya.

• “Bbola ilijisi nguzu zyakucinca nyika. Ijisi nguzu zyakukulwaizya bantu. Kunze lyaboobo, ilijisi nguzu zyakukamantanya bantu munzila iilibedelede.”​—Ba Nelson Mandela, ibakali baleli ku South Africa.

• “Bbola . . . ilabakamantanya bantu akaambo kakuti balimvwa kuba abulangizi, lukkomano, kuyanda cintu comwe, kuyanda bantu bamwi alimwi akulimvwa kuti bayeeya zintu zikozyenye.”​—Ba Gianni Infantino, beendelezi ba FIFA.a

Sena World Cup naa zisobano zimwi zilakonzya kuzuzikizya makanze aaya? Sena kuli bulangizi buliko kujatikizya luumuno alukamantano?

Sena ncobeni ilakonzya kubakamantanya bantu?

World Cup yamwaka uuno yapa bantu kuyeeya zinji kunze buyo lyabbola. Bbola eeyi yapa bantu kubandika makani aajatikizya lwaanguluko ndobajisi, kwiindana mubala, alimwi akutalulama kuliko mumakani aamali.

Nokuba boobo, kuli banji ibakkomana kweebelela bbola akucibona buyo kuti nkulikkomanisya. Pele nokuba kuti bantu inga bayanda kuti zisobano zili boobu kazibakamantanya, tazikonzyi naaceya kuleta lukamantano lwini-lwini. Muciindi caboobo, kanji-kanji itondezya muuya walwaandaano alimwi amicito Bbaibbele njoyakaamba kuti tuli “kumazuba aamamanino.”​—2 Timoteyo 3:1-5.

Bulangizi bwini-bwini kujatikizya lukamantano lwanyika

Bbaibbele lilapa bulangizi bwini-bwini kujatikizya lukamantano lwanyika yoonse. Lisyomezya kuti bantu boonse anyika banookamantene ansi aamfwulumende yakujulu yiitwa kuti “Bwami bwa Leza.”​—Luka 4:43; Matayo 6:10.

Mwami wa Bwami oobu, Jesu Kristo, uyoobona masimpe kuti kuli luumuno nyika yoonse. Bbaibbele lyaamba kuti:

• “Balulami bayoozwidilila, alwalo luumuno luyoovwula.”​—Intembauzyo 72:7.

• “Uyoovwuna mucete uukwiilila lugwasyo . . . Uyoobavwuna kukudyaamininwa akunkondo.”​—Intembauzyo 72:12, 14.

Noliba lino, njiisyo zya Jesu zyatalika kale kubakamantanya bantu mumasi aali 239. Bakacileka kusulaika bantu mbobaindene mubala. Kutegwa muzyibe zinji, amubale zibalo zijisi mutwe wakuti “Kumana Penzi Lyakusulkaikana.”