Sena Social Media Yamubikka Muntenda Mwanaanu?​—Bbaibbele Mbolikonzya Kubagwasya Bazyali

“Bakubusi banji banyongana kapati mumizeezo cakuti makani aaya ayandika kubikkilwa maano cakufwambaana. Kunze lyaboobo, twajana kuti cintu cimwi cipati capa kuti banyongane ni social media.”​—Ba Dr. Vivek Murthy, U.S. surgeon general, New York Times, June 17, 2024.

Mbuti bazyali mbobakonzya kubakwabilila bana babo kuntenda ziboola akaambo ka social media? Bbaibbele lilapa lulayo lugwasya.

Bazyali ncobakonzya kucita

Amulange-lange njiisyo eezyi zyamu Bbaibbele.

“Ooyo uucenjede ulakkala ansi kuyeeya ntaamu zyakwe.”​—Tusimpi 14:15.

Mbwaanga social media ilakonzya kumuletela ntenda mwanaanu, tamweelede kulimvwa kuti ziyume zitete mweelede kumuzumizya kwiibelesya. Kamutanamuzumizya kubelesya social media, amube masimpe kuti wasika aciimo cakuti ulakonzya kwiitobela milawo njomumubikkila kujatikizya ciindi ncayelede kutola, kuzumanana kuba abalongwe bali kabotu, akweeleba zintu zitali kabotu.

• Kutegwa mwiiye zinji, amubale cibalo cakuti “Sena Mwanaangu Uleelede Kubelesya Social Media?” acakuti “Kuyiisya Mwanaanu Mbwakonzya Kwiibelesya Kabotu Social Media.”

“Kamucibelesya kabotu ciindi coonse ncomujisi.”​—Baefeso 5:16.

Ikuti mwamuzumizya kubelesya social media mwanaanu, amumubikkile milawo yambwanakwiibelesya, akumupandulwida milawo eeyo mboiyakumukwabilila. Amubikkile maano kukucinca kuli koonse mumwanaanu kukonzya kutondezya kuti uyandika kucesya kubelesya social media.

• Amubelesye vidiyo iitondezya zyakudulowiŋa abboodi yakuti Amubacenjelele Aabo Mbomwiizya Limwi a Intaneti kugwasya mwanaanu kumvwisya ncayandika kubikkilwa milawo.

Amwiiye zinji

Bbaibbele lyaamba kuti tupona “muziindi zikatazya ncobeni.” (2 Timoteyo 3:1-5) Aciindi nciconya, litupa lulayo lukonzya kutugwasya kuliyumya. Mulongo wazibalo ziinda ku 20 ziyeeme aa Bbaibbele izyabazyali abana zilakonzya kujanwa mucibalo eeci cijatikizya malwazi aamumizeezo aabakubusi.