Nzila Zigwasya Kuba Alukkomano Muziindi Eezyi Zikatazya​—Ino Bbaibbele Lyaamba Nzi?

Muziindi eezyi zikatazya, tulakonzya kucitikilwa zintu zibyaabi. Nokuba boobo, lukkomano lwesu luyeeme azintu nzyotucita notwalijana mubukkale bumwi. Bbaibbele lyaamba kuti tacikwe makani amapenzi ngobajisi bantu, ‘ibantu bakkomene balaapobwe ciindi coonse.’ (Tusimpi 15:15) Ncinzi ncotukonzya kucita kutegwa tuzumanane kukkomana? Bbaibbele lilakonzya kutugwasya. Munzila nzi?

Mbomukonzya kucesya kulibilika

Bbaibbele lyaamba kuti: “Zintu nzyalibilika muntu nzyezipa kuti moyo wakwe utyompwe.”​—Tusimpi 12:25.

• Bbaibbele lilakonzya kumugwasya kutaciindizya kulibilika. Kutegwa muzyibe zinji, amubone cibalo cakuti “Ncolyaamba Bbaibbele Kujatikizya Kulibilika.”

Kulwana penzi lyakulendelelwa

Bbaibbele lyaamba kuti: “Mulongwe mwini-mwini ulatondezya luyando ciindi coonse alimwi ngomunyoko wakazyalilwa kuti akugwasye muziindi zyamapenzi.”​—Tusimpi 17:17.

• Bbaibbele lilaamba mbotukonzya kulwana penzi lyakulendelelwa, nkokuti nkwiinda mukuba aabalongwe. Amubone cibalo cakuti “Amujane Balongwe Kutegwa Mulwane Penzi Lyakulendelelwa​—Bbaibbele Mbolikonzya Kugwasya.”

Amuyande Leza alimwi abantu

Bbaibbele lyaamba kuti: “Weelede kuyanda Jehova Leza wako amoyo wako woonse, abuumi bwako boonse alimwi amizeezo yako yoonse. . . . Weelede kuyanda simukobonyoko mbubonya mbuli mboliyanda omwini.”a​—Matayo 22:37-39.

• Mupailo ulakonzya kutugwasya kumuyanda kapati Leza. Kutegwa muzyibe zinji, amubale cibalo cakuti “Sena Leza Ulaimvwa Mipailo Yesu?”

• Tulatondezya kuti tulabayanda bamwi kwiinda mukutobela Mulawo Wabukkale Bubotu. Kutegwa muzyibe zinji amubone cibalo cakuti “Ino Mulawo Wabukkale Bubotu Ninzi?”

Inga mwaiya zinji kujatikizya Bbaibbele mbolikonzya kumugwasya kuba alukkomano muziindi eezyi zikatazya. Kutegwa mubone mbomukonzya kucita oobo, tumutamba kuti musole pulogilamu yesu yaciiyo ca Bbaibbele citabbadelelwi.