Nkondo Iili ku Middle East​​—Ino Bbaibbele Lyaamba Nzi?

Bantu munyika yoonse balilibilikide kujatikizya ciyoocitika akaambo kamanyongwe aali akati ka United States, Israel a Iran. Sena bukkale bunooyaabwiindila kubija cakuti kuyoobuka nkondo iiyoojatikizya zisi zinji? Sena mfwulumende zilakonzya kulesya manyongwe akupa kuti kube luumuno munyika?

Aabo bazyi businsimi bwamu Bbaibbele balakonzya kuyeeya kuti ambweni manyongwe aali ku Middle East matalikilo aankondo ya Amagedoni yaambidwe kubbuku lya Ciyubunuzyo.

Ino Bbaibbele lyaamba nzi?

Sena mfwulumende ziyooyimana nkondo iili ku Middle East?

Bbaibbele lyaamba kuti: “Mutasyomi bami pe naba mwanaamuntu uutakonzyi kuleta lufwutuko.”​—Intembauzyo 146:3.

Tatuzyi naa mfwulumende ziyoocikonzya kwiimana nkondo iili ku Middle East. Nokuba boobo, Bbaibbele lilacisalazya kuti kunyina muleli wacisi naa kabunga kabantu kakonzya kumana nkondo akuleta luumuno lwini-lwini. Alikke Leza nguukonzya ‘kumanizya nkondo munyika yoonse mboizulwa.’​—Intembauzyo 46:9.

• Kutegwa muzyibe zinji, amubale magazini ya Ngazi Yamulindizi iijisi mutwe wakuti “Sena Manyongwe Ankondo Kuli​—Noziyoomana?”

Sena nkondo iili ku Middle East izuzikizya businsimi?

Bbaibbele lyaamba kuti: “Muyoomvwa nkondo mumasena aalaafwaafwi alimwi amasena aali kule. . . . Cisi ciyoobukila cisinyina abwami buyoobukila bwaminyina.”​—Matayo 24:6, 7.

Manyongwe aali mukucitika ku Middle East alaakati kazintu zitondezya kuti tuli ‘kumamanino aabweende bwazintu’ alimwi apa bumboni bwakuti tupona “kumazuba aamamanino.” (Matayo 24:3; 2 Timoteyo 3:1) Nkondo nzyotubona mazubaano zitondezya kuti ino-ino Leza uyoobweza ntaamu yakumana nkondo amapenzi aali munyika.

• Kutegwa muzyibe zinji, amubale cibalo cakuti “Ino Citondezyo ‘Camazuba Aamamanino,’ naa ‘Ciindi Camamanino’ Ninzi?”

Sena Amagedoni iyootalikila ku Middle East?

Bbaibbele lyaamba kuti: “Akababunganya antoomwe kubusena butegwa Amagedoni mu Chihebrayo.”​—Ciyubunuzyo 16:16.

Amagedoni taili nkondo iili akati kamfwulumende zyabantu iiyootalikila ku Middle East. Ninkondo yanyika yoonse iili akati kamfwulumende zyabantu a Leza.

• Kutegwa muzyibe zinji, amubale cibalo cakuti “Ino Nkondo ya Amagedoni Ninzi?”

Ino ncinzi cikonzya kutugwasya kubatama ciindi zintu zilibilisya nozicitika?

Bbaibbele lyaamba kuti: “Mutalibiliki acintu nociba comwe, pele muzintu zyoonse, kwiinda mumupailo akukombelezya antoomwe akulumba, amumuzyibye Leza nzyomulomba.”​—Bafilipi 4:6.

Jehovaa Leza uyanda kuti katupaila kulinguwe. Uyakuyiingula mipailo yesu akutugwasya kuliyumya ciindi notulibilikide, akaambo kakuti ulatubikkila maano. (1 Petro 5:7) Nzila imwi mbwacita oobo nkwiinda mukutugwasya kumvwisya kaambo ncokuli nkondo alimwi ancayoocita kutegwa azimane calo ciyoopa kuti kakucinoonyina macise akupenga.​—Ciyubunuzyo 21:3, 4.

• Kutegwa muzyibe zinji kujatikizya Leza mbwatugwasya, amubale cibalo cakuti “Mulakonzya Kujana Majwi Aawumbulizya mu Bbaibbele.”