Sena Kuli Uukonzya Kumuzyiba Mwini Wakalemba Bbaibbele?

Bwiinguzi bwamu Bbaibbele

Bantu banji baambilwa kuti tatukonzyi kumuzyiba ncobeni wakalemba Bbaibbele. Pele Bbaibbele lilasalazya kwaamba kujatikizya wakalilemba. Zibeela zimwi zilatalika amajwi mbuli aakuti “majwi aa-Nehemiya,” “cilengano ca-Isaya,” alimwi aakuti “majwi aa-Jehova aakasika kuli-Joeli.”​—Nehemiya 1:1; Isaya 1:1; Joeli 1:1.

Bunji bwabasikulemba Bbaibbele bakazumina kuti bakalemba muzyina lya Jehova, Leza wakasimpe alikke, alimwi akuti bakasololelwa anguwe. Basinsimi ibakalemba Magwalo aa Chihebrayo bakaambilizya ziindi ziinda ku 300 kuti: “Mbuboobu mbwaamba Jehova.” (Amosi 1:3; Mika 2:3; Nahumu 1:12) Basikulemba bamwi bakautambula mulumbe wa Leza kwiinda mubangelo.​—Zekariya 1:7, 9.

Ibbaibbele lyakalembwa abantu bali 40 kwamyaka iinda ku 1,600. Bamwi bakabelesyegwa kulemba mabbuku aamu Bbaibbele aainda ali lyomwe. Masimpe, Bbaibbele nilaibbulali iijisi mabbuku masyoonto-syoonto aali 66. Lijisi Magwalo aa Chihebrayo aali 39, banji ngobaita kuti Cizuminano Cakale, alimwi lijisi mabbuku aa Magwalo aa Banakristo aa Chigiliki aali 27, kanji-kanji aaitwa kuti Cizuminano Cipya.