Sena Leza Mbutatu?

Bwiinguzi bwamu Bbaibbele

Mbunga zinji zya Bunakristo ziyiisya kuti Leza Mbutatu. Nokuba boobo, amubone ncolyaamba bbuku lyakuti Encyclopædia Britannica: “Ibbala lyakuti Butatu naa njiisyo yabutatu taijaniki mu Cizuminano Cipya . . . Njiisyo yakatalika aasyoonto-syoonto mukati kamyaanda yamyaka iili mbwiibede nokuba kuti bantu bakali kukazyanya kapati.”

Mubwini, Leza mukamwini Bbaibbele kunyina naambwa kuti ncibeela ca Butatu. Amubone tupango ootu twamu Bbaibbele:

“Jehova ngu-Leza wesu, Jehova ngumwi.”​—Deuteronomo 6:4.

“Nduwe olike oojisi izina lya-Jehova, nduwe Mupatikampatila atala anyika yoonse.”​—Intembauzyo 83:18.

“Eeci caamba buumi butamani, ikuti bakuzyiba yebo O Leza mwini-mwini ooli olikke, ayooyo ngookatuma, Jesu Kilisito.”​—Johane 17:3.

“Leza uli buyo omwe.”​—Bagalatiya 3:20.

Nkaambo nzi mbunga zyabukombi zinji ncozyaamba kuti Leza Mbutatu?