Ino Bbaibbele Lyaamba Nzi Kujatikizya Kkilisimasi?

Bwiinguzi bwamu Bbaibbele

Ibbaibbele talibwaambi buzuba mbwaakazyalwa Jesu, alimwi kunyina mpolyaamba kuti katusekelela kuzyalwa kwakwe. Mabbuku aa McClintock a Strong’s Cyclopedia aamba kuti: “Leza kunyina natulailila kusekelela Kkilisimasi, alimwi Kkilisimasi tayaambidwe mu [Cizuminano Cipya].”

Muciindi caboobo, kulanga-langa mboyakatalika Kkilisimasi kwayubununa kuti yakatalikila mubukombi bwakubeja. Bbaibbele litondezya kuti tulamunyemya Leza kuti twasola kumukomba munzila njatayandi.​—Kulonga 32:5-7.

Mboyakatalika Kkilisimasi

1. Kusekelela buzuba mbwaakazyalwa Jesu: “Banakristo bakusaanguna tiibakali kusekelela buzuba mbwaakazyalwa [Jesu] nkaambo bakali kubona kusekelela kuzyalwa kwamuntu uuli woonse kuti ncilengwa cabantu batali Banakristo.”​—The World Book Encyclopedia.

2. December 25: Kunyina bumboni butondezya kuti Jesu wakazyalwa mubuzuba oobu. Basololi bazikombelo ambweni bakasala buzuba oobu kutegwa kabweendelana amapobwe aabukombi bwakubeja aakali kucitwa lyamupeyo, eelyo zuba nolitalika kubala kapati.

3. Kupana zipego, kupobola: Bbuku lya Encyclopedia Americana lyaamba kuti : “Pobwe lyabana Roma litegwa Saturnalia, ndyobasekelela akati kamwezi wa December, ndelyakaba cikozyanisyo cabunji bwazilengwa zyakusekelela Kkilisimasi. Mucikozyanyo, kupobwe eeli, nkokwakazwa kupobola, kupana zipego, alimwi akuyasya nkendulu.” Bbuku lya Encyclopædia Britannica lyaamba kuti “milimo alimwi amakwebo oonse zyakali kwiima” ciindi capobwe lya Saturnalia.

4. Malaiti aa Kkilisimasi: Kweelana abbuku lya The Encyclopedia of Religion, bantu baku Europe bakali kusakatizya maanda aabo “amalaiti alimwi azisamu zitayumi zyamisyobo yoonse” nobakali kusekelela kubala kwazuba alimwi akutanda myuuya mibi.

5. Mistletoe, holly: “Ba Druid bakali kwaamba kuti cisamu ca mistletoe cakajisi nguzu zyamasalamuzi. Cisamu ca holly cakali kukombwa kusyomezya kuti zuba liyoojoka.”​—The Encyclopedia Americana.

6. Cisamu ca Kkilisimasi: “Cilengwa cakukomba zisamu, icakadumide kubana Europe batakali Banakristo, cakazumanana nibakaba Banakristo.” Nzila imwi yakukomba zisamu iiciliko asunu, ncilengwa “cakubikka cisamu ca Yule kumanjililo naa muŋanda ciindi camupeyo.”​—Encyclopædia Britannica.