Ino Bbaibbele Lyaamba Nzi Kujatikizya Kulembaulwa Nsimbo naa Kugantwa?
Bwiinguzi bwamu Bbaibbele
Kulembaulwa nsimbo kwaambwa buyo ciindi comwe mu Bbaibbele mulugwalo lwa Levitiko 19:28, lwaamba kuti: “Mutalinengi amibili yanu . . . nanka kulilembaula insimbo.” Leza wakapa mulawo ooyu kubana Israyeli kutegwa abaandaanye kubantu bakabazingulukide ibakali kulilembaula amibili yabo mazyina naa zitondezyo zyabaleza babo. (Deuteronomo 14:2) Nokuba kuti Banakristo tabeendelezyegwi a Mulawo wakapegwa kubana Israyeli, injiisyo iili mumulawo ooyu ilayandika kwiibikkila maano.
Sena Munakristo weelede kulembaulwa nsimbo naa kugantwa?
Tupango twamu Bbaibbele tutobela tulakonzya kumugwasya kusala cakucita mumakani aaya:
“Bamakaintu kabalisakatizya . . . cabulemu.” (1 Timoteyo 2:9) Njiisyo eeyi ilabeleka kubamakaintu alimwi abamaalumi. Tweelede kubikkila maano mbobalimvwa bamwi ikutali kulitondezya.
Bamwi bantu balagantwa akaambo kakuyanda kulitondezya kuti mbaandaba naa kutondezya kuti balaangulukide, kakuli bamwi balagantwa kutegwa batondezye kuti balijisi nguzu zyakweendelezya mibili yabo. Pele Bbaibbele likulwaizya Banakristo kuti: “Mutuule mibili yanu kiili cipaizyo cuumi, cisalala, cizuminwa a Leza, nkokuti imulimo uusetekene ngomubeleka kwiinda mukubelesya maano.” (Baloma 12:1) Amubelesye “maano” aanu kulanga-langa ncomuyandila kugantwa. Kuti naa muyanda kucita oobo akaambo kakuyanda kwiiya bantu naa kutegwa munjile mukabunga kamwi, kamuyeeya kuti mwaakucinca maano, tamukacikonzyi kugwisya ciganto ncomwakagantwa. Kulanga-langa ncomuyanda kucitila boobo kulakonzya kumugwasya kusala kabotu.—Tusimpi 4:7.
“Makanze aabasungu alaleta zilyo zinji, pele uufwanzya makani ulajana bucete buyo.” (Tusimpi 21:5) Kusala kugantwa kanji-kanji kulacitwa cakubinda, pele kulakonzya kunyonganya zilongwe alimwi amilimo. Ziganto ziladula alimwi zilacisa kuzigwisya. Kuvwuntauzya kwakacitwa alimwi akuvwula kwabasimakwebo bagwisya ziganto kutondezya kuti bantu banji ibakagantwa mukuya kwaciindi balaliyeeya.