Sena Bbaibbele Inga Lyandigwasya Kuba Amukwasyi Uukkomene?

Bwiinguzi bwamu Bbaibbele

Inzya. Ndoolu lulayo lugwasya lwamu Bbaibbele ilwagwasya bamaalumi alimwi abamakaintu banji kujana lukkomano mumukwasyi:

1. Amulembye cikwati canu. Kuba alukkomano mumukwasyi kuyeeme aakulyaaba mucikwati cizumizyidwe amulawo.​—Matayo 19:4-6.

2. Amuyandane akulemekana. Eeci cilabikkilizya akulanganya ngomukwetene limwi mbubwenya mbomuyanda kuti awalo kamulanganya.​—Matayo 7:12; Baefeso 5:25.

3. Mutanoobelesyi majwi aabukali. Amwaambaule calubomba, nokuba kuti ngomukwetene limwi waamba naa wacita cintu cinyemya. (Baefeso 4:31, 32) Mulugwalo lwa Tusimpi 15:1, Bbaibbele lyaamba kuti: “Kuvuwa kabotu kulalesya bukali, pele majwi mabi alabusya inkondo.”

4. Kamusyomeka. Mumakani aakoonana amubikkile buyo maano muntu ngomukwetene limwi alikke. (Matayo 5:28) Bbaibbele lyaamba kuti: “Lukwatano alulemekwe abantu boonse, alimwi abulo bwalukwatano butasofwaazyigwi pe.”​—Bahebulayo 13:4.

5. Amubayiisye bana banu caluyando. Mutabalendekezyi pe nokuba kubakalalila.​—Tusimpi 29:15; Bakolose 3:21.