Ino Bbaibbele Lyaamba Nzi Kujatikizya Zyintu Ziletela Muzeezo Wakoonana? Sena Ncibi Kutuminana Zyintu Ziletela Muzeezo Wakoonana Kubelesya Intaneti?

Bwiinguzi bwamu Bbaibbele

Bbaibbele talyaambi cacigaminina kujatikizya zyintu ziletela muzeezo wakoonana, kutuminana zyintu ziletela muzeezo wakoonana kubelesya Intaneti, naa micito iikozyenye ayeeyi. Nokuba boobo, Bbaibbele lilaamba cakusalazya mbwalimvwa Leza kujatikizya micito iikulwaizya koonana kwabantu batakwetene naa kuba amizeezo iitaluzi kujatikizya koonana. Amulange-lange tupango ootu twamu Bbaibbele:

• “Aboobo, amujaye zizyo zyamubili wanu eezyo zili anyika kujatikizya zisusi mbuli bwaamu, busofwaazi, luunyaunya.” (Bakolose 3:5) Muciindi cakujaya kulombozya kubyaabi, kweebelela zyintu ziletela muzeezo wakoonana kubusya kulombozya ooku. Kupa kuti muntu asofwaale kuli Leza.

• “Kufwumbwa muntu uulangisisya mukaintu cakuti wamunyomenena, wacita kale bumambe anguwe mumoyo wakwe.” (Matayo 5:28) Izifwanikiso zitondezya micito yakoonana ziletela mizeezo mibyaabi yalo ikonzya kusololela kumicito mibyaabi.

• “Bwaamu abusofwaazi bwamusyobo uuli oonse naa busyaacivwulemwangu tazyeelede nokuba kwaambwa akati kanu pe.” (Baefeso 5:3) Tatweelede kwaamba cabuyo, kweebelela naa kubala makani aajatikizya koonana.

• “Milimo yamubili ili antangalala, njeeyi: bwaamu, busofwaazi, bukkale busesemya, . . . alimwi azyintu zimbi zili boobu. Ndimucenjezyela limwi kujatikizya zyintu eezyi, mbubonya mbondakamucenjezya kale, kuti bantu bacita zyintu zili boobu tabakabukoni Bwami bwa Leza pe.” (Bagalatiya 5:19-21) Aabo ibeebelela mavidiyo naa zifwanikiso ziletela muzeezo wakoonana, naa ibalembelana naa kutuminana zyintu ziletela muzeezo wakoonana kubelesya fooni naa Intaneti, Leza ubabona kuti tabasalali alimwi akuti balisofweede. Ikuti twaba acilengwa cakucita zyintu zili boobu, tulakonzya kusweekelwa cilongwe cesu a Leza.