Ino Bbaibbele Lyaamba Nzi Kujatikizya Bukoko? Sena Kunywa Bukoko Ncibi?
Bwiinguzi bwamu Bbaibbele
Kutaciindizya kunywa bukoko takuli kubisya. Bbaibbele lyaamba waini kuti ncipego cizwa kuli Leza cipa kukkomana mubuumi. (Intembauzyo 104:14, 15; Mukambausi 3:13; 9:7) Alimwi Bbaibbele lilaamba kuti waini ulabelesyegwa mubusilisi.—1 Timoteyo 5:23.
Jesu naakali anyika, wakanywa waini. (Matayo 26:29; Luka 7:34) Akati kamaleele aazyibidwe ngaakacita Jesu, wakasandula meenda kuba waini kacili cipego kupobwe lyabwiinga.—Johane 2:1-10.
Ntenda yakuciindizya kunywa bukoko
Nokuba kuti Bbaibbele lilaamba bubotu bwawaini, lilakasya kuciindizya kunywa akukolwa. Aboobo, kuti naa Munakristo wasala kunywa bukoko, teelede kuciindizya pe. (1 Timoteyo 3:8; Tito 2:2, 3) Bbaibbele lilapa twaambo tuli mbotubede ncotuteelede kuciindizya kunywa bukoko.
Kupa muntu kutayeeya kabotu. (Tusimpi 23:29-35) Muntu uukoledwe takonzyi kuzuzikizya mulawo wamu Bbaibbele wakuti “mutuule mibili yanu kaili cipaizyo cuumi, cisalala, cizuminwa a Leza, nkokuti imulimo uusetekene ngomubeleka kwiinda mukubelesya maano.”—Baroma 12:1.
Kuciindizya kunywa bukoko kupa kuti nsoni zimane alimwi akumana “luyandisisyo lwakucita cintu cibotu.”—Hosea 4:11; Baefeso 5:18.
Kuciindizya kunywa bukoko kuletela bucete alimwi amalwazi mapati.—Tusimpi 23:21, 31, 32.
Kuciindizya kunywa bukoko alimwi abudakwi takumukkomanisyi Leza.—Tusimpi 23:20; Bagalatiya 5:19-21.
Ino kuciindizya kunywa, nkunywa kusika aali?
Muntu ulakonzya kwaambwa kuti ulaciindizya kunywa bukoko ikuti wanywa ubikka buumi bwakwe naa bwabamwi muntenda. Kweelana ambolyaamba Bbaibbele, muntu uuciindizya kunywa ulakopana mumizeezo, uladadalika, ulaankazi, alimwi ulaaliwa kwaambaula. (Jobu 12:25; Intembauzyo 107:27; Tusimpi 23:29, 30, 33) Nobaba baabo ibalikasya kutegwa batakolwi abalo balakonzya ‘kulengaana akaambo kabucakolwa’ alimwi akupenga akaambo kamicito yabo.—Luka 21:34, 35.
Kucilekela limwi
Bbaibbele alimwi lilaamba ciindi Munakristo nateelede kunywida limwi buya bukoko:
Ikuti bamwi balafwumpuzyigwa.—Baroma 14:21.
Ikuti bukoko kabukasyigwa mucisi.—Baroma 13:1.
Ikuti naa muntu ulaalilwa kulikasya kunywa bukoko. Aabo bajisi penzi lyakuciindizya kunywa bukoko beelede kufwambaana kubweza ntaamu.—Matayo 5:29, 30.