BAKUBUSI BALABUZYA
Ino Inga Ndacileka Buti Kuba Akabuko?
“Oobu buzuba ndilimvwide kabotu, pele buzuba butobela ndilimvwide bubi kapati. Zintu nzyondakali kubona kuti taali makani mapati jilo, sunu aba makani mapati.”—Carissa.
Sena mulaakuba akabuko?a Ikuti kacili boobo, cibalo eeci cilamugwasya!
Ikaambo ncocili boobo
Kabuko kalaba ciindi muntu naakubuka. Noliba leelyo nomwainda aciimo cakukubuka, zimwi ziindi kabuko takamani pe.
Ikuti naa mulalibuzya cipa kuti mube akabuko, kamuyeeya kuti mulimvwa boobo akaambo kakucinca kucitika mumubili ciindi nomukomena. Pele makani mabotu ngakuti, mulakonzya kuzyiba mbomweelede kulyeendelezya ciindi nimwaba akabuko.
Kaambo kamasimpe: Nomucili bana, cilayandika kapati kuzyiba mbomweelede kulyeendelezya ciindi nimwaba akabuko akaambo kakuti ciyoomugwasya mubukkale bwiindene-indene mwaakukomena.
Kabuko kali mbuli zilindi mumugwagwa. Ikuti kamujisi luzyibo, inga mwacikonzya kuzyeeleba zilindi akweenda kabotu
Zintu zyotatwe nzyomukonzya kucita
Amubandike. Bbaibbele lyaamba kuti: “Mulongwe mwini-mwini ulatondezya luyando ciindi coonse, alimwi ngomunyoko wakazyalilwa kuti akugwasye muziindi zyamapenzi.”—Tusimpi 17:17.
“Kuli bakaintu mbotumvwana limwi mbondibona mbuli kuti mbaamaama. Balandiswiilila nondibandika ambabo, alimwi ndilalikwaya kubaambila zyoonse zili kumoyo. Ikuti nzyondaamba kaziluzi, balakkomana, pele ikuti kazitaluzi, balandilulamika munzila iili kabotu.”—Yolanda.
Muzeezo: Muciindi cakubandika buyo abamusela wanu, balo ambweni ibali mubukkale mbuli bwanu, amubandike amuzyali naa muntu umwi mupati ngomusyoma.
Amulembe. Bbaibbele lyaamba kujatikizya Jobu, iwakali mumapenzi manji, iwakaamba kuti: “Ndilatongooka. Ndilaamba kandipengede mumoyo!” (Jobu 10:1) Kunze lyakubandika amuntu umwi, nzila imbi mbomukonzya ‘kwaamba’ zili mumoyo nkwiinda mukulemba mbomulimvwa.
“Ndileenda akabbuku kufwumbwa nkondibede. Kuti naa kuli candinyonganya, ndilacilemba. Kulemba kundipa kulimvwa kabotu.”—Iliana.
Muzeezo: Amube akabbuku momukonzya kulemba mbomulimvwa, capa kuti mulimvwe boobo, ancomweelede kucita kutegwa mulimvwe kabotu. Pepa lyakulembela lyeendelana acibalo eeci lilakonzya kumugwasya kucita boobo.
Amupaile. Bbaibbele lyaamba kuti: “Kowaala mukuli wako uuminya mumaanza aa Jehova, eelyo walo uyookulanganya. Kunyina nayoolekela muntu uululeme kuti awe.”—Intembauzyo 55:22.
“Ndilapaila kuli Jehova lyoonse nondityompedwe. Inga ndilimvwa kabotu ndamana kumwaambila zyoonse zili kumoyo.”—Jasmine.
Muzeezo: Nokuba kuti mulityompedwe, amuyeeye zintu zyotatwe nzyomweelede kulumba mubuumi bwanu. Ciindi nomupaila kuli Jehova, mutanoolombi buyo lugwasyo, pele amumulumbe akaambo kazilongezyo nzyomwajana.
a Cibalo eeci cilaamba mbobalimvwa bakubusi banji ibaba akabuko. Ikuti naa muciswa bulwazi bumwi buyo bwakutyompwa naa bwiitwa kuti bipolar disorder, amubone cibalo cakuti “How Can I Deal With Depression?”