Ino Jesu Wakatufwutula Munzila Nzi?
Bwiinguzi bwamu Bbaibbele
Jesu wakabafwutula bantu basyomeka ciindi naakatuula buumi bwakwe kabuli cipaizyo cacinunuzyo. (Matayo 20:28) Aboobo, Bbaibbele lyaamba Jesu kuti “Mufwutuli wanyika.” (1 Johane 4:14) Alimwi lyaamba kuti: “Kunyina lufwutuko mumuntu umbi uuli woonse, nkaambo kunyina zina limbi munyika ilyapegwa kubantu ndyotweelede kufwutulwa andilyo.”—Milimo 4:12.
Jesu ‘wakafwida muntu uuli woonse’ uumusyoma. (Bahebrayo 2:9; Johane 3:16) Kumane, “Leza wakamubusya kuzwa kubafwu,” mpoonya Jesu wakapiluka kujulu kali cilenge camuuya. (Milimo 3:15) Okuya, Jesu “ulakonzya kubafwutula cakumaninina aabo baboola kuli Leza kwiinda mulinguwe, nkaambo walo ulapona lyoonse kutegwa kabakombelezyela.”—Bahebrayo 7:25.
Nkaambo nzi Jesu ncayandika kutukombelezyela?
Toonse twakabisya. (Baroma 3:23) Cibi cilatwaandaanya kuli Leza, alimwi cisololela kulufwu. (Baroma 6:23) Pele Jesu ‘nguubaiminina’ aabo basyoma cipaizyo cacinunuzyo cakwe. (1 Johane 2:1, bupanduluzi buyungizyidwe) Ulabakombelezyela, akulomba Leza kuti aiswiilile mipailo yabo akubalekelela zibi zyabo akaambo kalufwu lwakwe lwacipaizyo. (Matayo 1:21; Baroma 8:34) Leza ulakumvwa kulomba ooku kwa Jesu nkaambo kuleendelana akuyanda kwakwe. Leza wakatuma Jesu anyika kutegwa “nyika ifwutulwe kwiinda mulinguwe.”—Johane 3:17.
Sena kusyoma Jesu ncecintu cilikke ciyandika kutegwa tukafwutulwe?
Peepe. Nokuba kuti tweelede kumusyoma Jesu kutegwa tukafwutuke, nzinji ziyandika. (Milimo 16:30, 31) Bbaibbele lyaamba kuti: “Mbubonya mubili uunyina muuya mbuufwide, alwalo lusyomo lunyina milimo lulifwide.” (Jakobo 2:26) Kutegwa tukafwutulwe, tweelede:
Kwiiya kujatikizya Jesu alimwi a Jehova, Bausyi.—Johane 17:3.
Kuba alusyomo mulimbabo.—Johane 12:44; 14:1.
Kutondezya lusyomo lwesu kwiinda mukumvwida milawo yabo. (Luka 6:46; 1 Johane 2:17) Jesu wakayiisya kuti tabali boonse bamwiita kuti “Mwami” ibayoofwutulwa, pele balikke ‘bacita kuyanda kwa Taata uuli kujulu.’—Matayo 7:21.
Kuzumanana kutondezya lusyomo lwesu nokuba kuti tulapenzyegwa. Jesu wakaamba munzila iisalede kuti: “Ooyo uuliyumya kusikila kumamanino uyoofwutulwa.”—Matayo 24:13.