BAKUBUSI BALABUZYA
Ino Bbaibbele Inga Lyandigwasya Buti?—Cibeela 2: Mbondikonzya Kukukkomanina Kubala Bbaibbele
Mukubusi wazina lyakuti Will wakaamba kuti: “Ikuti Bbaibbele kotalibali munzila iiluzi, lilakonzya kulibonya mbuli kuti talinoneezyi.”
Sena mulayanda kuzyiba mbomukonzya kukukkomanina kubala Bbaibbele? Cibalo eeci cilamugwasya.
Magwalo amwaabale munzila iikkomanisya
Amulibikke mucibeela ncomubala. Mulakonzya kubelesya nzila eezyi:
Amusale cibalo camu Bbaibbele ncomuyanda kubala. Mulakonzya kusala cibalo cili mu Bbaibbele ku Makani Mabotu, naa kusala vidiyo yakubala Bbaibbele naa yakuswiilila buyo iili a jw.org.
Amucibale cibalo. Mulakonzya kulibalila nobeni, naa kubala cakupozya antoomwe abeenzinyoko naa banamukwasyi. Omwe ulakonzya kubala cibeela cakuluula mpoonya bamwi babala zibeela zyabantu baambidwe mucibalo.
Amusole nzila yomwe naa kwiinda waawo akati kanzila zitobela:
Amudulowe zifwanikiso zitondezya cakacitika mucibalo. Naa zifwanikiso zitondezya mbozyakali kutobelana kucitika zintu. Amulembe acifwanikiso cimwi acimwi kupandulula cakali kucitika.
Amudulowe. Mucikozyanyo, ciindi nomubala kujatikizya muntu iwakali kusyomeka, amweendelanye bube amilimo yakwe, kuzilongezyo nzyaakajana.
Amusale cibalo comwe akucibala mbuli kuti makani aali mumo naazwa aakucitika. Amubale munzila iitondezya mbuli kuti mubuzya-buzya bantu bakacitikilwa zintu eezyo abaabo bakalibonena nozyakali kucitika.
Ikuti naa muntu uumwi mucibalo tanaakasala cabusongo, amuyeeyele ncaakeelede kucita. Mucikozyanyo, amulange-lange cibalo citondezya Petro mbwaakakaka Jesu. (Marko 14:66-72) Ino Petro wakeelede kucita buti mubukkale oobu bukatazya?
Ikuti kamujisi busongo bwakweezyeezya zintu, amulilembele cisobano ciyeeme acibalo camu Bbaibbele. Amubikkilizye aziiyo zikonzya kujanika mucisobano eeco.—Baroma 15:4.
Mulakonzya kuzikkomanina zibalo zyamu Bbaibbele!
Kamulanga-langa twaambo tujatikizyidwe!
Ikuti mwatulanga-langa twaambo tujatikizyidwe, mulakonzya kujana mbono zisisidwe mucibalo. Mubwini, zimwi ziindi kuyandika buyo bbala lyomwe naa obilo aali mucibalo camu Bbaibbele.
Mucikozyanyo, amweezyanisye Matayo 28:7 a Marko 16:7.
Ino nkaambo nzi Marko ncaakabikkilizya kaambo kakuti Jesu wakali kuyoolibonya kuli basikwiiya akuli “Petro”?
Kaambo kagwasya: Marko tanaakalibonena zintu eezyi nozyakali kucitika; kweelede kuti makani aaya wakaajana kuli Petro.
Mbono iisisidwe: Nkaambo nzi ncotukonzya kwaamba kuti Petro wakaleka kulibilika naakamvwa kuti Jesu uyanda kumubona? (Marko 14:66-72) Ino mbuti Jesu mbwaakatondezya kuti wakali mulongwe mwini-mwini wa Petro? Ino mbuti mbomukonzya kutobela cikozyanyo ca Jesu akuba mulongwe mwini-mwini kubantu?
Ikuti kamuzikkomanina nzyomubala mu Magwalo akulanga-langa twaambo tujatikizyidwe, mulakonzya kukukkomanina kubala Bbaibbele!