Zyakuzekaula Zyabana Egepita Zyakaindi Zileendelana Amakani Aambidwe mu Bbaibbele

Cakuzekaula eeci icilampa mamita aali 8 kuya mujulu, cijanika afwaafwi amulyango watempele lyabana Egepita lyakaindi lyaleza uutegwa Amun ku Karnak. Kweelana abasyaazibwene, cakuzekaula eeci citondezya nkondo nzyaakali kuzunda Mwami Sisaki waku Egepita mumasi aakali kunyika lwaajwe, kubikkilizya a Juda alimwi abwami bwakunyika bwa Israyeli.

Cakuzekaula eeci citondezya Amun ciindi napa Sisaki naa Sheshonk, baange bainda ku 150.a Mwaange umwi aumwi wiiminina dolopo naa bantu bakazundwa. Mazina aamadolopo alilembedwe amubili wamwaange umwi aumwi. Mazina manji acilibonya, alimwi alizyibidwe kubantu babala Bbaibbele. Mazina aaya abikkilizya Beti-seani, Gibeoni, Megido, alimwi a Sunemu.

Kunyonyoonwa kwa Juda abana Egepita kulaambidwe mu Bbaibbele. (1 Bami 14:25, 26) Mane buya, Bbaibbele lilaamba twaambo tugaminide kujatikizya kulwana kwa Sisaki. Tubala kuti: “Mumwaka wasanu wabulelo bwa Mwami Rehoboamu, Mwami Sisaki wa Egepita wakaboola kuzoolwana Jerusalemu. . . . Wakajisi nkalaki zili 1,200, basimabbiza bali 60,000 abasikalumamba batakonzyi kubalwa mbaakaboola limwi kuzwa ku Egepita . . . Wakaizunda minzi iikwabilidwe ya Juda mane wakazoosika aku Jerusalemu.”​—2 Makani 12:2-4.

Cakuzekaula caku Karnak tabuli mbobumboni bulikke butondezya kuti Sisaki wakalwana bana Israyeli. Cibeela cacibumbwa cabbwe, icakajanika kubusena bwiitwa kuti Megido ibwaambidwe mu Bbaibbele, acalo cilijisi zina lya “Sheshonk.”

Makani aa Sisaki mbwaakazunda Juda akalembwa munzila iiluzi mu Bbaibbele kutondezya buyo kuti balembi bandilyo bakali kusyomeka. Bakalemba cakusyomeka kujatikizya zisi zyabo mbozyakali kuzunda alimwi akuzundwa. Kusyomeka kuli boobu takujaniki kubalembi bambi bakaindi.