Bakamboni ba Jehova Baumuna Buyo Ciindi Bapaizi Nobabalwana
Ba Artur, ibalangizi babbazu ku Armenia, bakaswaide mbungano ya Bakamboni ba Jehova. Kumbungano ooko, bakajana kuti basikumwaya tabanabuzuba bacita bukambausi bwakubuleya, nkokuti kukambauka kubelesya kakubikkila mabbuku kakukuba. Kutegwa babakulwaizye kubelesya nzila eeyi mubukambausi, ba Artur abakaintu babo ba Anna, kubikkilizya aba Jirayr, Bakamboni bakooko, bakabikka kakubikkila mabbuku kakukuba kumbali amugwagwa. Bakasala kukabikka abusena bwiinda kapati bantu.
Tiilyakalampa, basimweenda nzila bakatalika kuleya akubweza mabbuku. Pele abalo basikukazya bakakabona kakubikkila mabbuku aako. Kwakaboola bapaizi bobilo, mpoonya umwi wakakawiisya. Kumane, wakabauma lubayi ba Artur, akulosya magilazi aabo. Ba Artur, ba Anna, aba Jirayr bakasola kubakkazika moyo bapaizi pele bakaalilwa. Bapaizi bakakalyatauka kakubikkila mabbuku akwaasowaila mabbuku. Nobakamana kubatukila Bakamboni akubakonga, bakaunka.
Ba Artur, ba Anna, aba Jirayr bakaunka kupolisi kutola makani aaya. Bakapandulula mbocakabede akwaamba asyoonto kujatikizya Bbaibbele kuli bakapokola ababelesi bamwi buyo. Kumane Bakamboni botatwe aabo bakatolwa kumupati-pati wabakapokola. Kumatalikilo wakali kuyanda kuzyiba buyo cakacitika. Pele naakazyiba kuti ba Artur tiibakabajolela nokuba kuti bakalizyandamene, kapokola ooyo wakaleka kubuzya mibuzyo iijatikizya kaambo kabo, pele wakatalika kubuzya nzyobasyoma Bakamboni ba Jehova. Eeci cakasololela kumubandi iwakatola mawoola one! Kapokola ooyo wakakkomana kapati cakuti wakaamba kuti: “Kubota cikombelo! Andime ndilamusangana!”
Ba Artur aba Anna
Buzuba bwakatobela ba Artur nobakatalika bukambausi bwabo bwakubuleya, kwakabasikila mwaalumi iwakabona zyakacitika buzuba bwakaindide. Mwaalumi ooyo wakabalumbaizya ba Artur akaambo kakutajolela. Wakayungizya akwaamba kuti ncaakabona cakapa kuti aleke kubalemeka bapaizi.
Kumangolezya buzuba obuya kapokola uulya mupati-pati wakabatumina fooni ba Artur kuti baunke kupolisi. Pele muciindi cakubabuzya makani aalya, bakatalika kubuzya mibuzyo aimwi iijatikizya Bbaibbele. Bakapokola bamwi bobilo bakabasangana mumubandi ooyu.
Buzuba bwakatobela, ba Artur bakaunka alimwi kuli kapokola uulya, lino bakaunkide kuyoomutondezya mavidiyo eesu amwi aamba zyamu Bbaibbele. Kapokola ooyo wakaita bakapokola bambi kuti abalo bazyoolangilile mavidiyo.
Akaambo kakutalilemeka kabotu kwabapaizi, bakapokola banji bakakambaukilwa kwaciindi cakusaanguna. Eeci cakapa kuti kababalemeka Bakamboni ba Jehova.