Ino Inga Ndacita Buti Kuti Bantu Kabandibona Kuti Tandeeleli Kubasangana?

“Weelede kweelela kubasangana bamwi, buyo-buyo inga wabula balongwe, buumi inga bwakuyumina. Bantu inga bakuluba kuti nkoli, mpoonya inga waile kuba simweendaalikke.”—Carl.

Sena nkuciindizya kuyeeya boobo? Ambweni. Pele bamwi balakonzya kucita cili coonse kutegwa beelebe bukkale ibwaambwa a Carl. Sena inga mwacita oobo? Cibalo eeci cilapandulula nzila mbotu mbomukonzya kujana balongwe.

• Nkaambo nzi bantu ncobasolekesya kutegwa beelele kusangana bamwi?

• Ncomweelede kuzyiba

• Nzyobaamba beenzinyoko

Nkaambo nzi bantu ncobasolekesya kutegwa beelele kusangana bamwi?

• Akaambo kakuti tabayandi kusyaala. “Aintaneti ndakabona mafwoto aabeenzuma ibakali kuyoolikondelezya. Eeci cakandipa kuyeeya kuti ambweni kuli cakalubide kulindime, mpoonya ndakasakana mumizeezo cakuti ndakayeeya kuti tiindakali kweelela kubasangana.”—Natalie.

  NCOMWEELEDE KUYEEYA: Sena kuli nomwakalimvwa kale mbuli kuti beenzinyoko tabayandi kuti mubasangane? Sena kuli kucinca nkomwakacita kutegwa mweelele kubasangana?

• Akaambo kakuti tabayandi kwiindana abamwi. “Bazyali bangu tabayandi kuti kandijisi fooni. Ciindi beenzuma nobandilomba namba yangu ndibaambila kuti tandijisi fooni mpoonya, baamba kuti: ‘Wati nzi? Ino ujisi myaka yongaye?’ Ciindi nondibaambila kuti ndijisi myaka iili 13, balandilanga mpoonya baleetezyegwa.”—Mary.

  NCOMWEELEDE KUYEEYA: Ino milawo nzi yabazyali banu iikonzya kumupa kulimvwa kwiindana abamwi? Ino mucita buti amilawo eeyo?

• Akaambo kakuti tabayandi kufwubaazyigwa. “Beenzuma kucikolo tababayandi bantu bacita zintu ziimpene, kwaamba zintu ziindene, naa bali mubukombi bwiindene. Ikuti kamutaciti zintu mbuli bamwi, nkokuti bantu banji balabona mpoonya inga bamuseka.”—Olivia.

  NCOMWEELEDE KUYEEYA: Sena kuli nomwatakeendelezyegwa kabotu akaambo kakutabasangana beenzinyoko? Ino mwakacita buti mubukkale oobo?

• Akaambo kakuti tabayandi kuleka kumvwana abalongwe babo. “Ndakasola kucita zintu mbuli beenzuma. Ndakali kwaambaula mbobakali kwaambaula. Ndakali kuseka noziba zintu zitasesyi. Mane buya ndakali kubasangana beenzuma nobakali kunonga muntu umwi, nokuba kuti ndakalizyi kuti eeci tacili kabotu.”—Rachel.

  NCOMWEELEDE KUYEEYA: Ino ciyandika buti kulindinywe kuyandwa abalongwe banu? Sena kuli nomwakacinca bube bwanu kutegwa mweelele kubasangana bamwi?

Ncomweelede kuzyiba

• Kwiiya bamwi akaambo buyo kakuyanda kuti mweelele kubasangana kulaletelela. Nkaambo nzi? Akaambo kakuti kanji-kanji bantu balakonzya kubona kuti mulicengeezya buya. Brian uujisi myaka iili 20 wakaamba kuti: “Tandeeleli kuba mbuli basicikoloma ciindi nondilicengeezya kuba mbonditali mbubo. Aboobo ndakaiya kuti cilainda kubota kuba buyo mbuli mbobede, kayi bantu balakonzya kuzyiba ciindi nolicengeezya.”

  NZILA MBOTU: Amuyeeye zintu ziyandika kapati kulindinywe. Bbaibbele lyaamba kuti: ‘Amusinizye zintu ziyandika kapati.’ (Bafilipi 1:10) Aboobo amulibuzye kuti, ‘Ino ncili ciyandika kapati, kweelela kusangana bantu bamwi balo mbotwiindene zintu nzyondisyoma naa kuba buyo mbuli mbondibede?’

  “Kusola kuba mbuli bantu bamwi tacigwasyi pe. Tacikonzyi kupa kuti bantu bamuyande kapati, alimwi buya tacikonzyi kupa kuti mube bantu bali kabotu.”—James.

• Kusola kucita zintu kutegwa mweelele kubasangana bamwi inga kwamupa kuti mutaanguluki kulicitila zintu. Inga mwaile kuba buyo muntu uucita zintu kutegwa akkomanisye bamwi. Mukubusi wazina lya Jeremy wakati, “Ndakali kucita kufwumbwa ncondakali kukonzya kutegwa ndikkomanisye beenzuma, nokuba kuti kucita boobo cakali kukonzya kundijaila mpuwo. Ndakazumizya beenzuma kuti kabandeendelezya muzintu nzyondakali kwaamba akucita.”

  NZILA MBOTU: Amuzizyibe zyeelelo zyanu mpoonya akupona kweelana anzizyo muciindi cakuba mbuli naluntaambwe walo uucinca-cinca mibala kweelana abusena. Nkakaambo kaako Bbaibbele lyaamba kuti: “Toyelede kutobela buleya mukucita zibi.”—Kulonga 23:2.

  “Ndakasola kuyanda zyoonse nzyobakali kuyanda mbuli nyimbo, zisobano, zisani, zyakweebelela, zintu zyakulibotya . . . Ndakasola kuba mbuli mbabo. Ndiyeeya kuti bakabona kuti ndakali kulicengeezya buyo. Ndiyeeya kuti boonse bakalizyi oobo kubikkilizya andime buya. Kumamanino eeci cakapa kuti ndilimvwe bubi akulendelelwa, alimwi cakapa kuti ndaalilwe kulizyiba bwini mbondakabede. Mane buya ndakaalilwa kuzyiba zintu nzyondakali kuyanda. Aboobo ndakaiya kuti tabali boonse bantu mbotukonzya kusangana naa kuti tabali boonse bakonzya kutuyanda. Aboobo eeci tacaambi kuti mweelede kuleka kujana balongwe bali kabotu, iciyandika buyo nkukkazika moyo alimwi akuzyiba kuti citola ciindi kujana balongwe akuba muntu uusimide alimwi akuzyiba bwini mbomubede.”—Melinda.

• Kusola kucita zintu kutegwa mweelele kubasangana bamwi kulakonzya kunyonganya mbomulilemeka. Mukubusi uutegwa Chris wakabonena kumweeninyina mbwaali aamasimpe majwi aaya. Wakaamba kuti, “Mweenima wakatalika kucita zintu nzyaatakali kucita mbuli kubelesya misamu iikola kutegwa ayeelele kusangana bamwi. Wakatalika kubelesya misamu iikola cakuzwa munzila mane buya eeci cakali kuyanda kunyonganya buumi bwakwe.”

  NZILA MBOTU: Amubatantamuke bantu ibatondezya kuti tabatobeli zyeelelo zibotu kwiinda muzintu nzyobaamba alimwi akucita. Bbaibbele lyaamba kuti: “Ooyo weenda abasongo ulaba musongo, pele ooyo uuyanzana abafwubafwuba ulajana mapenzi.”—Tusimpi 13:20.

  “Zimwi ziindi ncibotu kubeleka canguzu kuti mweelele kusangana bamwi. Pele tamweelede kucita oobo kwiinda mukucita zintu zitaluzi. Bantu bali kabotu bayoomuyanda mbubonya buyo mbomubede.”—Melanie.

  Muzeezo: Ciindi nomusola kujana bantu bapya kutegwa babe balongwe banu, tamweelede kujana buyo bantu ibacita zintu nzyomukkomanina. Amujane bantu mbomweendelana limwi zyeelelo, bukombi, kulilemeka alimwi abukkale.