Mbobalila Bacula Bamuzisamu Baku Japan

Bacula basankwa ibamuzisamu baku Japan balizyibidwe akaambo kambobalila alimwi ambobalila cililelile. Nokuba boobo, cilakonzyeka kubazyiba bacula bamwi noliba leelyo nobalilila antoomwe mukabunga. Basikuvwuntauzya baku Japan mumakani aajatikizya bacula aaba bakaamba kuti, icipa kuti kacikonzyeka kubazyiba ncakuti, bacula basankwa ibali abusena bomwe inga balainzyanya kulila kutegwa baite bacula bazyazi.

Amulange-lange: Bacula basankwa baku Japan balalila kutegwa bakwelelezye bacula bazyazi. Kutegwa balimvwisye, kulila ooku inga kutalikila mukati asyoonto-syoonto nokuya kulimvwisye bafwuta amukosi.

Ino kulila kwabacula aaba basankwa kwiindene buti akati kabo? Basikuvwuntauzya bakajana kuti muciindi cakulila cililelile, bacula basankwa ibali abusena bomwe inga balainzyanya kulila. Kucita boobo kupa kuti batalili cililelile naa kulilila antoomwe, calo cipa kuti kulila kwacula umwi aumwi kakulimvwisya kabotu-kabotu, aciindi nciconya akupa kuti atafwambaani kukatala. Kuyungizya waawo, kwiinzyanya kulila ooku kupa kuti kabacikonzya kuumuna aasyoonto ciindi nobalila.

Nzila mbobalila bacula baku Japan yakabakkomanisya kapati basikuvwuntauzya mumakani aakukwabana kubelesya mayuwe. Basikuvwuntauzya aaba balimukubelesya nzila zisumpukide kapati ikusola kweendelezya mboyeenda mibandi muluwo kutegwa kaitatumwi aciindi comwe naa kaitanjilani. Akaambo kaceeci, mibandi ileenda kabotu-kabotu kakunyina kunjilana alimwi kubelesyegwa buyo malaiti masyoonto.

Ino muyeeya buti? Sena kulila cakwiinzyanya kwabacula baku Japan ibamuzisamu kwakabako kwiinda mukusanduka naa kwakalengwa buya?