TUPANGO TWAMU BBAIBBELE TWAPANDULULWA
Matayo 6:33—‘Amusaangune Kuyandaula Bwami bwa Leza’
“Aboobo, amuzumanane kusaanguna kuyandaula Bwami abululami bwakwe, eelyo zintu zimbi zyoonse eezyi ziyooyungizyigwa kulindinywe.”—Matayo 6:33, Bbaibbele lya Busanduluzi bwa Nyika Mpya.
“Pele amusaangune kuyandaula Bwami bwa-Leza abululami bwakwe, elyo zintu ezi zyoonse mulaziyungizizigwa azyalo.”—Matayo 6:33, The Bbaibbele in Tonga Lyamu 1963.
Bupanduluzi bwa Matayo 6:33
Bwami bwa Leza nimfwulumende yakujulu iyoocita kuyanda kwa Leza anyika. (Matayo 6:9, 10) Muntu uusaanguna kuyandaula Bwami ububona kuti ncecintu ciyandika kapati mubuumi bwakwe.a Eeci inga cabikkilizya kutaba buyo aluyandisisyo lwakwiiya kujatikizya Bwami bwa Leza, pele akwaambila bamwi kujatikizya zintu zibotu nzyobuyoocita. (Matayo 24:14) Muntu uubuyandaula Bwami uleelede akubupailila kuti buboole.—Luka 11:2.
Bululami bwa Leza bubikkilizya zyeelelo zyakwe zijatikizya ciluzi acitaluzi caboola kumakani aakulilemeka. (Intembauzyo 119:172) Aboobo, muntu ulakonzya kubuyandaula bululami bwa Leza kwiinda mukupona kweelana amilawo yakwe iiluleme, alimwi iigwasya lyoonse.—Isaya 48:17.
Majwi aakuti zintu zimbi zyoonse eezyi ziyooyungizyigwa kulindinywe ncisyomezyo cakuti Leza uyoobalanganya aabo ibabikka Bwami azyeelelo zyakwe mubusena bwakusaanguna mubuumi bwabo.—Matayo 6:31, 32.
Makani aayengelede lugwalo lwa Matayo 6:33
Jesu wakaamba majwi aaya kaali cibeela camajwi aazyibidwe kuti Mulumbe waa Cilundu, aalembedwe ku Matayo caandaano 5-7. Tacidoonekwi kuti bunji bwabantu ibakali kumuswiilila Jesu bakali bacete. Ambweni bakali kulimvwa kuti bakeelede kusaanguna kulilanganya kumubili, calo cakali kuyoopa kuti babe aciindi cisyoonto cakuyandaula Bwami. Pele Jesu wakabakulwaizya kulangisya Leza mbwalanganya zisamu alimwi abanyama mbaakalenga. Wakasyomezya kucita mbubonya oobo akubantu basaanguna kuyandaula Bwami bwakwe.—Matayo 6:25-30.
Twaambo Tutaluzi Kujatikizya Matayo 6:33
Kaambo kataluzi: Muntu uuyandaula Bwami uyoovwuba.
Kaambo kamasimpe: Jesu wakaamba kuti aabo babikka Bwami bwa Leza mubusena bwakusaanguna banoojisi zintu nzyobayandika, mbuli cakulya azisani. (Matayo 6:25, 31, 32) Nokuba boobo, tanaakasyomezya zintu zidula, naa kupa muzeezo wakuti cileleko ca Leza cakali kuyoobonwa kwiinda muzintu zyakumubili nzyajisi muntu. Alimwi buya, Jesu wakabacenjezya baswiilizi bakwe mumakani aakuliyandawida lubono, calo cikonzya kupa kuti cituyumine kusaanguna kuyandaula Bwami. (Matayo 6:19, 20, 24) Mwaapostolo Paulo wakabeleka cakulitakata akaambo ka Bwami bwa Leza, pele zimwi ziindi wakali kubula zintu zyakumubili. Mbuli Jesu, awalo wakabacenjezya bamwi kuntenda iiliko mukuyandaula lubono.—Bafilipi 4:11, 12; 1 Timoteyo 6:6-10.
Kaambo kataluzi: Banakristo tabeelede kubeleka mulimo wakumubili.
Kaambo kamasimpe: Bbaibbele lyaamba kuti Banakristo baleelede kubeleka kutegwa kabalilanganya lwabo beni alimwi amikwasyi yabo. (1 Batesalonika 4:11, 12; 2 Batesalonika 3:10; 1 Timoteyo 5:8) Jesu tanaakaamba kuti basikumutobela beelede kuyandaula buyo Bwami; muciindi caboobo, wakaamba kuti beelede kusaanguna kuyandaula Bwami.
Aabo ibasaanguna kuyandaula Bwami bwa Leza alimwi ibalibambilide kubeleka milimo yakumubili balakonzya kusyoma kuti Leza unoobagwasya kujana nzyobayandika mubuumi.—1 Timoteyo 6:17-19.
a Mabala aakuti “Amuzumanane . . . kuyandaula” akasandululwa kuzwa kubbala lya Chigiriki ilyaamba cintu muntu ncacita cakutaleka, alimwi bbala eelyo lilakonzya kwaambwa kuti “yandaula cakutaleka.” Aboobo, Bwami bweelede kubikkilwa maano lyoonse kutali kucita buyo oobo kwakaindi kasyoonto.