Baroma 12:2—“Amusandulwe Kwiinda Mukucinca Mizeezo Yanu”

“Amuleke kutobela ziyanza zyabweende bwazintu obuno, pele amusandulwe kwiinda mukucinca mizeezo yanu, kutegwa muzyibe kuyanda kwa Leza, ikubotu, kutambulika alimwi kulondokede.”—Baroma 12:2, Bbaibbele lya Busanduluzi Bwanyika Mpya.

“Mutakozyanizigwi aziyanza zyaciindi ecino, pele amusanduke kukucitululwa kwamyoyo yanu, kuti mukasimpikile makani ngaayanda Leza, makani mabotu aatambulika aalondokede.”—Baroma 12:2, The Bible in Tonga Lyamu 1963.

Bupanduluzi bwa Baroma 12:2

Aabo ibayanda kukkomaninwa a Leza tabeelede buyo kukaka kuyungwa pele alimwi beelede kucinca bube bwabo. Leza tabasinikizyi kucinca; balacita oobo akaambo kakuti balamuyanda, balizyi kuti zyeelelo zyakwe zyaluzyalo, zilalimvwisya alimwi zilagwasya.—Isaya 48:17.

“Amuleke kutobela ziyanza zyabweende bwazintu obuno.” “Bweende bwazintu,” nkokuti, bantu bamunyika azyeelelo zyanjiyo, micito alimwi akulilemeka, tabutondezyi bulemu bwa Leza naa mizeezo yakwe. (1 Johane 2:15-17) Bulabajatikizya kapati bantu akubapa kucinca mbobalilemeka alimwi abube bwabo. Kutegwa akombe Leza munzila iitambulika, muntu weelede kukaka kuyungwa anyika, akaambo kakuti ulakonzya kutalika kuba atumpenda tukonzya kumubikka muntenda alimwi ntwatakkomanini Leza.—Baefeso 2:1-3; 4:17-19.

“Amusandulwe kwiinda mukucinca mizeezo yanu.” Muntu alimwi weelede kubeleka canguzu kucinca mbwalimvwa mumoyo alimwi azintu nzyabikkila maano. Masimpe kucinca ooku nkupati alimwi kulalibonya mubbala lya Chigiriki lisanduludwe kuti ‘kusanduka,’ lyalo lipandulula kucinca kukozyenye acinkubala nocisanduka kuba nkonkolekwa. Aboobo, aabo bakomba Leza beelede kusama “buntu bupya.”—Baefeso 4:23, 24; Bakolose 3:9, 10.

“Muzyibe kuyanda kwa Leza, ikubotu, kutambulika alimwi kulondokede.” Leza uyanda kuti aabo bamukomba kabatadooneki naaceya kujatikizya nzyobasyoma. Balacita oobo kwiinda mukwiiya Jwi lyakwe, kucita ncolyaamba, alimwi akulibonena zilongezyo ziboola akaambo kakupona kweelana azyeelelo zyakwe. Aboobo, balasinizya lwabo beni kuti nzila zya Leza nzibotu.—Intembauzyo 34:8.

Makani aayengelede lugwalo lwa Baroma 12:2

Lugwalo lwa Baroma caandaano 12 lupandulula zibikkilizyidwe mukukomba Leza munzila iitambulika. Bukombi oobu bulajatikizya mbazu zyoonse zyabuumi bwamuntu alimwi buyanda ‘kubelesya maano’ kutali kwiile kuba alusyomo lutakwe ampoluyeeme. (Baroma 12:1, 3) Caandaano eeci cijisi lulayo lugwasya kutondezya bube bwa Leza, mbotweelede kweendelezya bamwi, alimwi ancotweelede kucita ikuti titweendelezyegwa kabotu.—Baroma 12:9-21.