Johane 14:6—“Ndime Nzila, Kasimpe Alimwi Abuumi”

“Jesu wakati kulinguwe: “Ndime nzila, kasimpe alimwi abuumi. Kunyina uuboola kuli Taata ccita kuti wainda mulindime.’”—Johane 14:6, Bbaibbele lya Busanduluzi Bwanyika Mpya.

“Jesu wakamwaambila kuti, ‘Ndime nzila, ndime bwini, ndime buumi. Takukwe uuza kuli-Taata, pele mulindime.’”—Johane 14:6, The Bible in Tonga, Lyamu 1963.

Bupanduluzi bwa Johane 14:6

Muntu uuyanda kukomba Taata, Jehovaa Leza, weelede kuzyiba lubazu luyandika ndwajisi Jesu.

“Ndime nzila.” Jesu ’ninzila’ iitola muntu kuli Leza munzila iitambulika. Mucikozyanyo, aabo bapaila kuli Leza beelede kucita oobo kwiinda muzina lya Jesu. (Johane 16:23, 24) Lufwu lwa Jesu lupa kuti cikonzyeke kubantu kuyanzana a Leza, naa kumvwana anguwe. (Baroma 5:8-11) Alimwi wakasiya cikozyanyo cibotu ncobeelede kutobela aabo bayanda kukkomanisya Leza.—Johane 13:15.

“Ndime . . . kasimpe.” Jesu lyoonse wakali kwaamba kasimpe kazwa kuli Leza alimwi wakali kupona kweelana ankako. (1 Petro 2:22) Kwiinda mukumuswiilila, muntu ulakonzya kwiiya kasimpe kajatikizya Leza. (Johane 8:31, 32) Jesu alimwi ‘nkasimpe’ mukuti wakazuzikizya businsimi bwamu Bbaibbele. Aboobo wakapa kuti zisyomezyo zya Leza zizuzikizyigwe.—Johane 1:17; 2 Bakorinto 1:19, 20; Bakolose 2:16, 17.

“Ndime . . . buumi.” Jesu wakaaba buumi bwakwe kutegwa aabo bamusyoma bakonzye kuba abuumi butamani. (Johane 3:16, 36) Alimwi ‘mbuumi’ kuli baabo ibakafwa, nkaambo uyoobabusya kuzwa kulufwu.—Johane 5:28, 29; 11:25.

“Kunyina uuboola kuli Taata ccita kuti wainda mulindime.” Aabo bayanda kubamba cilongwe a Leza beelede kuzumina lubazu lulibedelede ndwajisi Jesu. Balapaila kwiinda muzina lyakwe, kutondezya kuti balizizyi nguzu nzyajisi. (Johane 15:16) Alimwi balizyi kuti lufwutuko lukonzyeka buyo kwiinda mulinguwe.—Milimo 4:12; Bafilipi 2:8-11.

Makani aayengelede lugwalo lwa Johane 14:6

Zyaandaano 13 kusikila ku 17 zyabbuku lya Johane zijisi lulayo Jesu ndwaakapa baapostolo bakwe ibasyomeka bali 11 busiku katanafwa. Mucaandaano 14, Jesu wakakulwaizya basikwiiya bakwe kuba alusyomo mulinguwe a Bausyi, kubayanda alimwi akubamvwida. (Johane 14:1, 12, 15-17, 21, 23, 24) Wakayubununa cilongwe ciyumu ncaakajisi a Bausyi alimwi ancacijisi lino ambabo. (Johane 14:10, 20, 28, 31) Nokuba kuti kwakasyeede buyo asyoonto kuti apiluke kujulu, Jesu wakasyomezya basikwiiya bakwe kuti takabalekelezyi pe. (Johane 14:18) Alimwi wakabasyomezya “mugwasyi” akumwaamba kuti “muuya uusalala, ooyo ngwayootuma Taata muzina lyangu.” (Johane 14:25-27) Munzila eezyi alimwi azimbi, Jesu wakabagwasya kulibambila basikumutobela kumapenzi aakali kuyoobola kumbele.