TUPANGO TWAMU BBAIBBELE TWAPANDULULWA
Bahebrayo 11:1—“Lusyomo Mbulangizi Businizyidwe Bwaceeco Cilangilwa”
“Lusyomo mbulangizi businizyidwe bwaceeco cilangilwa, mbumboni busalede bwazintu zini-zini zitanabonwa.”—Bahebrayo 11:1, Bbaibbele lya Busanduluzi Bwanyika Mpya.
“Eno lusyomo ndotupimine kuti luyootujanya ceeco ncotulangila, tulazumina kuzintu nzyotutana kubona.”—Bahebrayo 11:1, The Bible in Tonga, Lyamu 1963.
Bupanduluzi bwa Bahebrayo 11:1
Kapango aaka kalatondezya mubufwaafwi ncolwaamba lusyomo kweelana a Magwalo alimwi akutondezya kuti lujatikizya zintu zinji kutali buyo kusyoma.
“Lusyomo mbulangizi businizyidwe bwaceeco cilangilwa.” Ibbala lya Chigiriki ilyakasandululwa kuti “lusyomo” ku Bahebrayo 11:1, lijisi muzeezo wakusyoma naa kusinizya. Lusyomo oolu taluyeeme acintu ncotuyanda kuti cicitike; muciindi caboobo “mbulangizi businizyidwe.” Mabala aamu Chigiriki aakuti “mbulangizi businizyidwe”a alakonzya alimwi kusandululwa kuti “mapepa aalusinizyo,” aapa muntu lusinizyo lwakuti cintu cimwi ncicakwe.
“Lusyomo . . . mbumboni busalede bwazintu zini-zini zitanabonwa.” Lusyomo luyeeme abumboni busalede. Bumboni buli boobu mbuyumu kapati cakuti muntu ulasyoma nokuba kuti tacibwene cintu eeco.
Makani aayengelede lugwalo lwa Bahebrayo 11:1
Bbuku lyamu Bbaibbele lya Bahebrayo ndugwalo lwakalembwa amwaapostolo Paulo kulembela Banakristo bamumwaanda wamyaka wakusaanguna ibakali kukkala mu Jerusalemu alimwi abaabo ibakali mufwaafwi. Mucibeela eeci calugwalo, Paulo wakaamba mboluyandika lusyomo. Mucikozyanyo, wakalemba kuti: “Ikuti kakunyina lusyomo tacikonzyeki pe kumukkomanisya Leza, nkaambo kufwumbwa ooyo uuswena afwaafwi kulinguwe weelede kusyoma kuti nkwali ncobeni akuti uba sikupa bulumbu kuli baabo bamuyandaula cabusungu.” (Bahebrayo 11:6) Naakamana kulupandulula lusyomo kulugwalo lwa Bahebrayo 11:1, Paulo wakaamba zikozyanyo zyabaalumi alimwi abamakaintu ibaambidwe mu Bbaibbele ibakatondezya bube oobu. Wakaamba mbobakatondezya lusyomo lwabo kwiinda mukucita zintu kweelana akuyanda kwa Leza.—Bahebrayo 11:4-38.
a Bbala lya Chigiriki lyakasandululwa kuti ‘bulangizi businizyidwe’ ndibbala lyakuti hy·poʹsta·sis, lyalo likonzya kwaambwa kuti “cintu ciimvwi antalisyo.”