Baroma 6:23​—“Cakuvwola Cacibi Ndufwu, Pele Cipego Ncapa Leza Mbuumi Butamani”

“Cakuvwola cacibi ndufwu, pele cipego ncapa Leza mbuumi butamani kwiinda muli Kristo Jesu Mwami wesu.”​—Baroma 6:23, Bbaibbele lya Busanduluzi Bwanyika Mpya.

“Cakuvola cazibi ndufu, pele caabilo ca-Leza mbuumi butamani bwamuli-Kristo Jesu Mwami wesu.”​—Baroma 6:23, The Bible in Tonga Lyamu 1963.

Bupanduluzi bwa Baroma 6:23

Kwiinda mumajwi aaya, mwaapostolo Paulo wakapandulula kuti bantu balafwa akaambo kakuti mbaasizibi. Nokuba boobo, Leza usyomezya bakombi bakwe basyomeka bulangizi bubotu nkokuti cipego cabuumi butamani.

“Cakuvwola cacibi ndufwu.” Bantu boonse balazyalwa kabatalondokede nkakaambo kaako balabisya.a (Intembauzyo 51:5; Mukambausi 7:20) Akaambo kakuti balazyalwa kabajisi cibi, bantu boonse balacembaala akufwa.​—Baroma 5:12.

Kupandulula kaambo aaka, Paulo wakakozyanisya cibi kuli simalelo uuvwozya mubelesi wakwe. Mbubwenya mubelesi mbwalangila kuvwola kumulimo wakwe, abalo bantu beelede kufwa akaambo kakutalondoka kwabo.

Nokuba boobo, Paulo alimwi wakapandulula kuti muntu “ooyo iwafwa waangununwa kucibi cakwe.” (Baroma 6:7) Ciindi muntu naafwa, ulaangununwa kuzibi zili zyoonse nzyaakacita. Nkakaambo kaako kunyina kaambo keelede kutupa kuyeeya kuti bafwide balazumanana kupenga kubusena bumwi akaambo kazibi zyabo. Alimwi buya, Bbaibbele lilacisalazya kuti bafwide tabakonzyi kuyeeya, kucita cintu cili coonse naa kumvwa.​—Mukambausi 9:5.

“Pele cipego ncapa Leza mbuumi butamani kwiinda muli Kristo Jesu.” Mukwiimpana ‘acakuvwola’ cacibi, Leza upa cipego cabuumi butamani. Ibbala lyakusaanguna lyakasandululwa kuti “cipego” alimwi lilakonzya kwaambwa kuti “cipego caluzyalo” naa “cipego cibotu.” Lipandulula cipego muntu ncaapegwa nokuba kuti tanaacibelekela. Kunyina muntu sizibi uukonzya kuvwola lufwutuko alimwi abuumi butamani. (Intembauzyo 49:7, 8) Nokuba boobo, Leza ulapa cipego cabuumi butamani kuli baabo batondezya lusyomo lwabo muli Jesu kakunyina kubabbadelesya.​—Johane 3:16; Baroma 5:15, 18.

Makani aayengelede lugwalo lwa Baroma 6:23

Paulo wakalemba lugwalo oolu ku Banakristo baku Roma cakuma 56 C.E. Kulibonya kuti Banakristo bamwi aciindi eeco bakajisi mizeezo iitali kabotu kujatikizya luzyalo lwa Leza. Kwiinda mukuyungwa anjiisyo zyaba Giriki, bakali kuyeeya kuti, ikuti bazumanana kubisya, bakali kukonzya kulekelelwa a Leza. (Baroma 6:1) Bamwi andiza bakali kuyeeya kuti tabakonzyi kusubulwa akaambo kazibi zyabo kayi tiibakacili kweendelezyegwa a Mulawo wa Musa. (Baroma 6:15) Mulugwalo lwakwe, Paulo wakakankaizya kuti Banakristo tabakonzyi kugwasyigwa aluzyalo lwa Leza ikuti bazumizya cibi kweendelezya buumi bwabo.​—Baroma 6:12-14, 16.

Majwi aa Paulo akulwaizya bakombi ba Leza mazuba aano kuti, nokuba kuti balazyalwa mucibi, balijisi bulangizi. Ikuti batobela zyeelelo zya Leza zyakulilemeka akutatyompwa akaambo kazibi zyabo, Leza usyomezya kubapa buumi butamani.​—Baroma 6:22.

Amweebelele kavidiyo aaka kutegwa mubone twaambo tupati-pati ituli mubbuku lya Baroma.