Tusimpi 22:6—“Koyiisya Mwana Inzila Njayelede Kweendela”

“Koyiisya mwana inzila njayelede kweendela; noliba leelyo aakukomena takazwi mulinjiyo pe.”—Tusimpi 22:6, Bbaibbele lya Busanduluzi Bwanyika Mpya.

“Iyisya mwana aende munzila iielede, lino akomena takooyooleya mulinjiyo.”—Tusimpi 22:6, The Bible in Tonga lyamu 1963.

Bupanduluzi bwa Tusimpi 22:6

Bazyali ibayiisya bana babo kuyanda Leza akulemeka milawo yakwe balakonzya kulangila kuti lwiiyo oolu lunoobagwasya bana babo mubuumi bwabo boonse.

“Koyiisya mwana inzila njayelede kweendela.” Majwi aaya alimwi alakonzya kwaambwa kuti “koyiisya mwanaako munzila yeelede.” Cakwiinduluka-induluka, bbuku lya Tusimpi likulwaizya bazyali kuyiisya bana babo kujatikizya ciluzi acitaluzi nobacili bana. (Tusimpi 19:18; 22:15; 29:15) Nokuba boobo, bazyali basiluyando balayeeya kuti bana babo balijisi lwaanguluko lwakulisalila, mbubonya mbuli bapati. Aboobo muciindi cakuti kababaambila cakucita, balabandika ambabo alimwi akubagwasya kutegwa baakukomena bakabe bantu basimide akucikonzya kulipangila zyakusala.—Deuteronomo 6:6, 7; Bakolose 3:21.

Basikwiiya Bbaibbele bamwi baamba kuti majwi aaya aamba kuti “amuyiisye mwana kweelana ambwabede.” Majwi aaya inga alimvwisya mbuli kuti ngamasimpe, pele majwi aa Chihebrayo aakuti “inzila njayelede kweendela” andiza aamba kuyiisya mwana kupona buumi bubotu alimwi bwabululami. Bbuku lya Tusimpi lyaamba nzila zyobilo muntu mwakonzya kweendela. Nzila yakusaanguna yiitwa kuti “nzila yabantu babotu,” “nzila yabusongo,” alimwi ‘anzila iiluzi.’ (Tusimpi 2:20; 4:11; 23:19) Nzila yabili yiitwa kuti “nzila yabantu babyaabi,” “inzila yamufwubafwuba,” alimwi ‘anzila mbyaabi.’ (Tusimpi 4:14; 12:15; 16:29) Aboobo, “nzila njayelede kweendela” mwana yaamba ‘nzila iiluzi,’ nkokuti nzila yabuumi yaambidwe mu Jwi lya Leza, Bbaibbele.—Intembauzyo 119:105.

“Noliba leelyo aakukomena takazwi mulinjiyo pe.” Ciindi bazyali nobayiisya mwanaabo zyeelelo zya Leza zyakulilemeka, tacidoonekwi kuti unakweenda munzila iiluzi mubuumi bwakwe boonse. Nokuba boobo, eeci tacaambi kuti mwana uyiisyidwe kabotu takonzyi ‘kuzwa’ munzila iiluzi naa kuleka kupona kweelana amilawo ya Leza. Mucikozyanyo, ikuti muntu kajanika abantu bakulwaizya beenzinyina kucita zintu zibi, awalo ulakonzya kuzwa ‘munzila ziluleme’ akutalika kucita zintu zibi. (Tusimpi 2:12-16; 1 Bakorinto 15:33) Nokuba kuti eeci cilakonzya kucitika, ciindi bazyali nobayiisya bana babo kutobela zyeelelo zya Leza, babapa coolwe cakuti bakazwidilile mubuumi bwabo.—Tusimpi 2:1, 11.

Makani aayengelede lugwalo lwa Tusimpi 22:6

Bbuku lya Tusimpi caandaano 22 lyaamba twaambyo itutugwasya kwiiya busongo bwa Leza mubukkale bwiindene-indene bwabuumi bwesu. Twaambyo ootu tukankaizya mbociyandika kuba azina libotu kuli Jehova.a Muntu ulakonzya kulipangila zina mbotu kuti kalicesya, kali mwaabi, alimwi kali musungu. (Tusimpi 22:1, 4, 9, 29) Mukwiimpana, tupango tumwi tutondezya kuti aabo batabikkili maano kuzyeelelo zya Leza alimwi akudyaaminina bacete bayoopenga.—Tusimpi 22:8, 16, 22-27.

Nokuba kuti tupango ituli mu Tusimpi caandaano 22 tatwaambi kujatikizya kuyiisya mwana, pele tulaamba bukkale busololela kukukkomaninwa aa Leza alimwi akujana lukkomano lwini-lwini. (Tusimpi 22:17-19) Kwiinda mukuyiisya bana babo kupona munzila eeyi, bazyali batondezya kuti bayanda kuti bana babo bakabe abuumi bubotu.—Baefeso 6:1-3.

Amweebelele kavidiyo aaka kutegwa mubone twaambo tupati-pati ituli mubbuku lya Tusimpi.