Jeremiya 33:3​—“Kondikwiilila, Eelyo Ndilakuvwiila”

“Kondikwiilila, eelyo ndilakuvwiila alimwi cakutasowa ciindi ndilakwaambila zintu zipati nzyotakonzyi kumvwisya alimwi eezyo nzyotazyi.”​—Jeremiya 33:3, Bbaibbele lya Busanduluzi Bwanyika Mpya.

“Kondikwiilila, lino nookuvwiila, nookulwiida makani mapati aasisidwe ngotana kuziba.”​—Jeremiya 33:3, The Bible in Tonga Lyamu 1963.

Bupanduluzi bwa Jeremiya 33:3

Kwiinda mumajwi aaya, Leza utamba bantu kuti kabapaila kulinguwe. Ikuti bantu aabo bakuzumina kutamba ooku akupaila kulinguwe, ulabayubunwida ciyoocitika kumbele.

“Kondikwiilila, eelyo ndilakuvwiila.” Majwi aakuti “kondikwiilila” taambi koompolola naa kukwiilila zina lya Leza. Muciindi caboobo, kukwiilila Leza kwaambwa waawa kubikkilizya kulomba lugwasyo alimwi abusolozi bwakwe kwiinda mumupailo.​—Intembauzyo 4:1; Jeremiya 29:12.

Kutamba ooku kweelede kuti kwakapedwe kucisi cabana Israyeli bansiku. Cisi eeci cakalimuzangilide Leza, alimwi bakali kukongwa abasikalumamba bana Babuloni. (Jeremiya 32:1, 2) Jehovaa wakatamba bana Israyeli kupiluka kulinguwe kwiinda mumupailo.

“Ndilakwaambila zintu zipati nzyotakonzyi kumvwisya alimwi eezyo nzyotazyi.” Zintu Leza nzyayubununa ‘tatukonzyi kuzimvwisya’ lwesu tobeni. Mabala aakuti ‘nzyotutakonzyi kumvwisya’ alimwi alakonzya kwaambwa kuti “zintu zisisidwe.”

Ino ‘nzintu nzi zisisidwe’ nzyaakayubununa Leza? Zintu zyakali kuyoocitika kumbele, nkokuti kunyonyoonwa kwamunzi wansiku wa Jerusalemu, alimwi akuti uyakuyakululwa kutegwa bantu bakakkale mulinguwo alimwi. (Jeremiya 30:1-3; 33:4, 7, 8) Nokuba boobo, Leza wakasyomezya kuti bakombi bakwe tiibakali kuyoonyonyoonwa kabali cisi.​—Jeremiya 32:36-38.

Makani aayengelede lugwalo lwa Jeremiya 33:3

Musinsimi Jeremiya wakatambula mulumbe ooyu kuzwa kuli Jehova mu 608 B.C.E., mumwaka wa 10 wabulelo bwa Mwami Zedekiya. Jeremiya wakasinsima kuti Jerusalemu wakali kuyoonyonyoonwa alimwi akuti Zedekiya wakali kuyootolwa mubuzike. Mbwaanga mwami tanaakaukkomanina mulumbe ooyu, wakamwaangisya Jeremiya.​—Jeremiya 32:1-5; 33:1; 37:21.

Eeci ncecakali kucitika ciindi Leza naakaamba majwi aali ku Jeremiya 33:3. Cuusisya ncakuti, Mwami Zedekiya alimwi abantu banji bamucisi bakazumanana abuzangi bwabo. (Jeremiya 7:26; 25:4) Tiibakapaila kuli Leza kulomba busolozi bwakwe. Nokwakainda mwaka omwe, Zedekiya wakazundwa, Jerusalemu wakanyonyoonwa, alimwi bunji bwabaabo ibakafwutuka bakatolwa mubuzike ku Babuloni.​—Jeremiya 39:1-7.

Majwi aali kulugwalo lwa Jeremiya 33:3 atuyeezya kuti Leza ulakonzya kutupa “luzyibo lwini-lwini lwamakanze aakwe” alimwi akuyubununa “zintu zisisidwe” kuli baabo bapaila kulinguwe alimwi akubala Jwi lyakwe, Bbaibbele. (Bakolose 1:9; 1 Bakorinto 2:10) Zintu eezyi zisisidwe zibikkilizya zintu Leza nzyasyomezya kuyoocita kumbele.​—Ciyubunuzyo 21:3, 4.

Amweebelele kavidiyo aaka kutegwa mubone twaambo tupati-pati ituli mubbuku lya Jeremiya.