Mukwasyi Wakazyikuusa Mbowakakkomana Alimwi

Ciindi notwakaba amwana wakusaanguna musimbi wazina lya Lauren, tiindakazyi cakajatikizyidwe kuba muzyali uuli kabotu. Ncimwi buyo aciindi notwakaba amwana musankwa wabili wazina lya Michael, tiindakalinazyiba cakucita. Nondakali kukomena, bazyali bangu lyoonse bakali kulwana calo cakapa kuti balekane mukuya kwaciindi. Nokuba kuti ndakali kuyanda kuba silutwe wamukwasyi mubotu, tiindakazyi ncondakeelede kucita.

Ciindile, nondakali mukubusi, ndakali acilengwa cakunywa bukoko akubelesya misamu iikola. Aboobo nondakakomena zintu zyakaindila buya kubija. Zilengwa zibyaabi eezyi kubikkilizya anjuka, zyakapa kuti kandipanga zyakusala zitali kabotu. Zintu zyakabija kapati cakuti bakaintu bangu ba Kaye bakandisiya akutolelezya bana. Cakandicisa kapati.

Ndakababuzya bakaintu bangu ncondakeelede kucita kutegwa bapiluke aŋanda. Aciindi eeci balo bakalitalikide kale kwiiya Bbaibbele aba Gloria, aboobo bakandaambila kuti: “Amutalike kwiiya Bbaibbele.” Nokuba kuti tiicakali kundipangila maano, ndakazumina kwiiya aba Gloria abalumi babo ba Bill kutegwa bakaintu bajoke.

Mubandi Wakacinca Buumi Bwangu

Ciindi ba Bill aba Gloria nobakaboola kuŋanda, ndakanyomenena kubona mbobakali kumvwana. Bakandaambila ibana babo bamusela wangu, mbobakali kupona buumi buli kabotu. Eeci cakapa kuti nditalike kuyeeya kuti ambweni Bbaibbele lilakonzya kutugwasya kuba alukkomano mumukwasyi.

Mubuzuba mbweena oobuya, twakabandika ambabo kujatikizya penzi lyangu. Kumane bakanditondezya lugwalo lwa Bagalatiya 6:7, ilwaamba kuti: “Kufwumbwa cintu muntu ncasyanga, ncencico eeco ncayootebula.” Ndakabona kuti, ‘nondakazitobela njiisyo eezyi mubuumi bwangu, nondakayeeleba mapenzi aakandicitikila!’

Mukuya kwaciindi, ndakabona mbondakandigwasya akaambo kakubelesya njiisyo zyamu Bbaibbele mubuumi bwangu. Aboobo, mebo abakaintu bangu twakaleka kufweba alimwi ndakazileka zilengwa zimbi zibyaabi. Notwakazyikuba amwana watatu wazina lya David mu 1985, lyalo ndyotwakali kukosola kuti Davey, ndakacizyiba ncondakeelede kucita kutegwa ndibe muzyali uuli kabotu.

Kubelekela Jehova Antoomwe

Kuyiisya bana besu ikuyanda Jehova, kwakapa kuti andiswe tobazyali tuswene kulinguwe. Twakagwasyigwa kapati kwiiya zintu zinji mubbuku lyamu Cikuwa lyakuti Listening to the Great Teacher! alimwi amabbuku buyo aamwi. Kunze lyaboobo, mikwasyi minji mumbungano yakali cikozyanyo cibotu kumukwasyi wesu.

Mukuya kwaciindi, bana besu boonse bakatalika mulimo wabupainiya. Kumatalikilo aamwaka wa 2004, Lauren wakalongela mumbungano iibelesya mwaambo waci Spanish. Mpoonya Michael wakazyoozwa a Beteli nakali kuyanda kukwata, aboobo aciindi aawa walo amukaintu wakwe Diana bakali kulibambila kuunka ku Guam nkobakatumwa kuti bakakukambaukile nkuko. Awalo Davey iwakali amyaka iili 19, wakazwide aakutalika kubelekela ku Dominican Republic.

Mebo abakaintu bangu twakakkomana kapati akaambo kakuti bana besu bakasala kabotu. Twakalimvwa mbuli majwi aambidwe ku 3 Johane 4 aakuti: “Kunyina cintu cindipa kukkomana kapati kunze lyaceeci: kuti kandimvwa kuti bana bangu balazumanana kweenda mukasimpe.” Nokuba boobo, tiitwakazyi kuti buumi bwesu bwakali kuyoocinca mukulaba kwaliso.

Cintu Cuusisya Kapati Cakacitika

Mu April 24, 2004, mebo abakaintu bangu twakaunka kulesitilanti kuyoolya cakulya cakumangolezya abanabukwetene bamwi. Mbwaanga nkoyakabede kwakali kulampa makkilomita aainda ku 100, toonse notwakali 6 twakabelesya moota wangu. Notwakasika, boonse ndakabasiya alesitilanti kumane ndakaunka kuyoopakiŋa moota. Kandili kokuya mweenzuma wakanditumina fooni, alimwi wakali kulimvwisya kuusa kapati.

Wakandaambila kuti “Kwacitika cintu cibyaabi kapati.” “Davey wacitikilwa ntenda yamumugwagwa.”

Kumwi kandiyoowede kuti naa ulapa bwiinguzi buli buti, ndakamubuzya kuti, “Ino nimpati buti?”

Kusaanguna, wakaumwine buyo. Mpoonya, wakandaambila kuti Davey wafwa.

Nondakamana kubandika anguwe, ndakapaila kuli Jehova kuti andipe nguzu zyakuliyumya. Nondakanjila mulesitilanti ndakaambila beenzuma kuti tupiluke kuŋanda tandilimvwide kabotu. Tiindakayanda kubaambilila abantu bakaintu bangu makani aa Davey.

Musinzo ooyu wamaminiti aali 90 tiiwakali muubauba naaceya. Katulimunzila bakaintu bangu bakalikwiizya abalongwe besu kumwi kabakkomene kujatikizya kuswaya kwa Davey nkotwakali kulangila. Nokuba boobo, kabatanazyiba bakaintu bangu kuti Davey wafwa tugwalo twakatalika kusika twakutumbuulizya afooni yangu.

Notwakamana kusiya balongwe besu kumaanda aabo, twakapiluka kuŋanda. Bakaintu bangu nobakandilanga bakazyiba kuti kuli cinyongene. Aboobo bakandibuzya kuti: “Ino ncinzi cacitika?” Ndakalizyi kuti nconditiibaambile bakaintu bangu cilabanyonganya mizeezo mbubwenya mbocakandinyonganya andime nondakatambula fooni.

Kulwana Penzi Lyakufwidwa

Mebo abakaintu bangu twakalilijanide kale mumapenzi, nokuba boobo, twakalizyi kuti Jehova ulabaumbulizya bantu bakwe. (Isaya 41:10, 13) Pele penzi eeli lyakaliindene kapati. Aboobo ndakatalika kulibuzya kuti, ‘Ino eeci inga cacitika buti kuli Davey walo iwakabelekela Jehova mumbazu ziindene-indene? Nkaambo nzi tanaakamukwabilila?’

Abalo banabokwabo bakausa kapati. Lufwu lwa Davey lwakamucisa kapati Lauren nkaambo wakali mbuli kuti mwanaakwe wakulizyalila. Awalo Michael cakamucisa kapati. Nokuba kuti kwamyaka iili 5 wakali kukkala kumbi, wakaliboolede kuswaya lyalo naakali kulumbaizya Davey akaambo kakuyaambele kumuuya.

Mpoonya-mpoonya bakwesu mumbungano bakatalika kutugwasya. Mucikozyanyo, bakaintu bangu nobakacili kulilauka lufwu lwamwaneesu, bakwesu bakaboola kutugwasya alimwi akupa luumbulizyo. (Tusimpi 17:17) Tandikalulubi luyando ndobakatutondezya bakwesu!

Kutegwa tuliyumye kubuumba bwesu, mebo abakaintu bangu twakazumanana kupaila, kubala Bbaibbele alimwi akujanika kumiswaangano ya Bunakristo. Nokuba boobo, zintu eezyi tiizyakabumana buumba. Pele twakalizyi kuti icakali kuyandika kapati nkuzumanana kucita zintu zyakali kuyootugwasya kuyuma kumuuya.​—Bafilipi 3:16.

Muciindi eeci, Michael alimwi amukaintu wakwe Diana bakalongela munsi-munsi ankotwakali kukkala, kumane Lauren wakajokela mumbungano yesu iibelesya mwaambo wa Cikuwa. Kuba antoomwe abanamukwasyi mumyaka misyoonto yakatobela cakatugwasya kumana buumba. Mukuya kwaciindi, Lauren wakakwatwa kuli ba Justin, balo ibakaugwasya kapati mukwasyi wesu.

Lweendo Lukatazya

Kalitanalampa kuzwa ciindi Davey naakafwa, kuli acimbi ncotwakacita calo icakali kukatazya kapati pele icakazyootugwasya. Amuleke bakaintu bangu bamulwiide.

“Ciindi balumi bangu nobakandaambila kuti Davey wafwa, ndakaziluka, alimwi akulimvwa kuti kunyina nondiyookkomana kabili. Maano oonse akazima cakuti tiindakazyi acakucita. Ndakali kulila lyoonse. Kutabeja, zimwi ziindi ndakali kumunyemena Jehova alimwi abantu boonse ibapona. Ndakalimvwa mbuli kuti ndasondoka.

“Ndakali kuyanda kuunka ku Dominican Republic. Makanze akali akuyoobona nkwakali kukkala Davey akubelekela Jehova. Nokuba boobo, ndakacuuside kapati alimwi tiindakajisi anguzu zyakuti inga ndeenda.

“Ndakaumbulizyigwa kapati ciindi mweenzuma umwi naakandaambila kuti balongwe ba Davey baku Dominican Republic abalo bakali mubuumba akuti bakali kuyanda kubonana amukwasyi wakwe. Zyaakandaambila mweenzuma zyakapa kuti ndicikonzye kuunka.

“Lweendo oolu lwakatuumbulizya kapati mbuli mukwasyi. Twakakkomana kumvwa kuti Davey wakali kuzyibikkila maano kapati zintu zyakumuuya. Mumbungano mwaakabede Davey mwakali buyo mwaalu omwe, walo wakatwaambila kuti lyoonse Davey wakali kusyomeka mumilimo njakali kupegwa mumbungano.

“Notwakali kuyaabweenda kuunka nkwaakali kukkala Davey, bantu bakaboola akutwaaambila zintu zibotu nzyaakali kubacitila. Lyoonse ndakalizyi kuti mwanaangu wakali aluzyalo, pele bantu nobakatwaambila bube bubotu mbwaakajisi, twakakkomana kapati kubona mbwaakali kumwiiya Jesu.

“Kunze lyaboobo, twakaakubonana amwaalumi wakali kwiiya Bbaibbele a Davey, walo iwakali kukkala mukaanda kaniini alimwi watakali kukonzya kuzwa aanze akaambo kakuciswa. Mwaalumi ooyu wakali mucete kapati, pele bakwesu abacizyi bamumbungano mwaakabede Davey bakatwaambila kuti wakali kumweendelezya cabulemu. Eeci cakandikkomanisya kaka!

“Lweendo oolu tiilwakali luuba-uba. Nokuba boobo lwakatugwasya kumana buumba alimwi akutupa coolwe cakuumbulizyanya abaabo bakamuzyi Davey. Kunze lyaboobo lwakapa kuti tutalike kulimvwamvwa kabotu.”

Kukulwaizyigwa Acikozyanyo ca Davey

Sinsimuka! yamu January 8, 2005, yakajisi cibalo cakali kwaamba kujatikizya lufwu lwa Davey amulimo wakwe ku Dominican Republic. Aciindi eeco, mukwasyi wesu tiiwakazyi cibalo eeci mbocakali kuyoobagwasya basikubala. Mucikozyanyo, mu May 2019 mukwesu umwi wazina lya Nick wakatutumina akutwaambila majwi aatobela:

“Kumamanino aamwaka wa 2004, ndakali kukkoleji alimwi tiindakajisi makanze aali woonse aakubekela Jehova. Tiindakakkomene mubuumi. Aboobo ndakapaila kuli Jehova kuti andigwasye kubelesya bukubusi bwangu munzila iili kabotu. Tiilyakalampa, ndakabala cibalo cijatikizya makani aabuumi bwa Davey mu Sinsimuka! Cibalo eeci cakaba bwiinguzi bwamupailo wangu!

“Ndakazwa akkoleji akutalika mulimo wabupainiya. Kumane, ndakalibikkila mbaakani yakwiiya mwaambo waci Spanish mpoonya akulongela kucisi cimbi. Kunze lyaboobo, ndakaakubelekela ku Nicaragua akunjila Cikolo Cabakambausi ba Bwami antoomwe bakaintu bangu. Bantu nobandibuzya cakandikulwaizya ikutalika bupainiya inga ndibaambila cibalo cakaluula makani aa Davey.”

Twakakkomana kapati alimwi ciindi notwakabonana amucizyi wazina lya Abi, walo ngotwakakkede limwi kuhotela notwakali kumuswaangano wamasi mu Buenos Aires ku Argentina mu 2019. Cakatukkomanisya kujatikizya mucizyi ooyu, nduzyalo alimwi akulilemeka kwakwe. Wakatuyeekezya bube bwamwaneesu Davey.

Notwakajokela kuhotela, twakatumina Abi liink ya Sinsimuka! muli cibalo caamba makani aajatikizya Davey. Wakasandula nokwakainda buyo maminiti masyoonto. Wakayandisya kuti tubandike awalo, aboobo twakayana abusena aasikila beenzu. Notwakabonana, Abi wakatalika kulila kumane wakatwaambila kuti icakamukulwaizya kutalika mulimo wabupainiya akuunka kuyoobelekela kubusena bubulide mu September 2011 ncibalo ca Davey. Wakayungizya kwaamba kuti, “Kufwumbwa nondijana buyumuyumu mumulimo, inga ndilaciinduluka kucibala cibalo.” Mane buya wakaliijisi magazini ya Sinsimuka!

Zyakuluula mbuli zyeezyi zitondezya kuti tuli cibeela camukwasyi wanyika yoonse. Kunyina bantu bainda kukamantana mbuli bukamantene bantu ba Jehova!

Cilatuumbulizya mebo abakaintu bangu kuzyiba kuti cibalo ca Davey cakulwaizya bantu banji. Alimwi buya oobu mbocibede kwaambisya kubakubusi babeleka canguzu mumulimo wa Jehova. Ambweni balo kabatazyi, cikozyanyo cabo alimwi abusungu mbobajisi zikulwaizya bamwi kubelekela Jehova kusikila mpobagolela.

“Boonse Mbaumi Kulinguwe”

Ku Luka 20:37, Jesu wakaamba majwi aa Jehova ciindi naamba kuti “Leza wa Abrahamu a Leza wa Izaka a Leza wa Jakobo.” Jehova kunyina nakaamba kuti wakali buyo Leza wabo nobakacili kupona, pele kuti ucili Leza wabo! Nkaambo nzi? Jesu ulatwaambila mukapango 38 kuti: “Boonse mbaumi kulinguwe.”

Jehova ubona babelesi basyomeka boonse ibakafwa mbuli kuti bacipona; kaambo aaka katutondezya buyo mbwayandide kuyoobabusya! (Job. 14:15; Joh. 5:28, 29) Ndilisinizyide kuti Jehova mbwalimvwa kujatikizya Davey, kubikkilizya ababelesi bakwe bamwi ibakafwa.

Ndiliyandide kapati kuyoomubona Davey alimwi. Pele ncondiyandisya kapati nkuyoobona bakaintu bangu mbobayoomutambula. Tandinabwene muntu uuli mubuumba mbuli bakaintu bangu. Nokuba boobo, majwi aali ku Luka 7:15 alanduumbulizya kapati alo aamba kuti: “Mwaalumi iwakafwide wakabuka akukkala akutalika kwaambaula, mpoonya Jesu wakamupa kuli banyina.”

Mu September 2005, ndakabasangana bakaintu bangu mumulimo wabupainiya. Eelo kaka ncoolwe cilibedelede kubeleka mulimo ooyu abakaintu bangu, bana besu alimwi ambobakwetene limwi. Mbuli mukwasyi uukamantene, tulagwasyanya alimwi akubikkila maano kubulangizi bwesu bwakumbele munyika mpya, mwalo mutuyoobonana amuyandwa wesu Davey.