Mabbuku Aaboofwu Mbwaacinca Maumi Aabantu

Ngazi Yamulindizi ya June 1, 1912 yakaamba kuti “kweelede kuti babali besu banji balibazyi boofwu. Balakonzya kutambula mabbuku aakubala kakunyina kubbadela . . . . Mabbuku aaya asimbidwe kubelesya mabala ngobakonzya kubala boofwu.” Ngazi Yamulindizi eeyi yakazumanana kwaamba kuti: “Boofwu banji balalumba kapati akaambo kamulumbe wakuti zilongezyo zibotu ziyooboola anyika.”

Ciindi Ngazi Yamulindizi eeyi noyakalembwa, mabbuku aaboofwu akali kulembwa munzila ziindene-indene. Nokuba boobo, balo Bakamboni ba Jehova bakalitalikide kale kumwaya kasimpe kamu Bbaibbele kuboofwu. Alimwi buya bazumanana kucita oobo! Mazuba aano kuli mabbuku aaboofwu mumyaambo iinda ku 50. Ino apangwa buti?

Kulemba Alimwi Akupanga

Cintu cakusaanguna mukupanga bbuku lyaboofwu nkulemba mabala munzila njobakonzya kubala. Ba Michael Millen ibabelekela ku Text Processing Services ku Patterson, New York bakaamba kuti: “Kaindi, twakali kubelesya mapulogilamu aakkompyuta aakapangwa abantu bambi, pele tanaakali kucikonzya kucita mulimo ooyu mumyaambo yoonse njotwakali kuyanda. Mazuba aano, tubelesya pulogilamu iitegwa Watchtower Translation System, yalo iigwasyilizya kupanga mabbuku aaboofwu mumyaambo minji. Tandisyomi naa kuli pulogilamu iimbi iikonzya kweelana anjiyo.”

Mabbuku aaboofwu alijisi amabala aapandulula zifwanikiso izili mumabbuku aayo. Mucikozyanyo, cifwanikiso icili aacivwumbyo cabbuku lyaboofwu lya Amupone Kukabe Kutamani! cipanduludwe boobu: “Mwaalumi uyaabweenda munzila iiyaabunyona mpoonya mumabali kuli maluba amasamu aaboneka kabotu, tuulu alimwi amalundu.” Ba Jamshed, bakutausi alimwi bapainiya boofwu bakaamba kuti, “Mabala aaya aapandulula zifwanikiso alandikkomanisya kapati.”

Zibalo zyamana kulembwa, zilatumwa kumaofesi aamitabi aapanga mabbuku aaboofwu. Kumaofesi aaya, mabala aaboofwu alasimbwa apepa njumu litakonzyi kudonkauka ciindi nobasimba, kuyauka naa kukokonyana lyanoobelesyegwa bbuku. Kuzwa waawo, mapepa oonse alabikkwa antoomwe akwaajatanya kutegwa bapange bbuku. Kumane mabbuku aaya ngobapanga alatumwa antoomwe amabbuku aambi aambungano, naa kubelesya post office ikuti kacikonzyeka. Nokwayandika, mitabi ilabikka bubambe bwakuti mabbuku afwambaane kusika kubakwesu boofwu kutegwa bakaabelesye kumiswaangano yambungano.

Mulimo oonse ooyu uyandika ciindi cinji alimwi amali. Alimwi buya, pulinta yesu yaku Wallkill, New York ilakonzya kupulinta ma Bbaibbele aatali aaboofwu aali 50,000 muciindi ncocitola kupanga ma Bbaibbele aaboofwu obilo buyo. Bbaibbele lyaboofwu limwi alimwi lijisi mavolyumu aali 25, alimwi zibelesyo ziyandika kutegwa mavolyumu aayo apangwe ziladula kapati kwiinda zeezyo ziyandika nokupangwa ma Bbaibbele aatali aaboofwu. Izivwumbyo buyo zyamavolyumu aali 25 zilapangwa kubelesya zibelesyo zyuulwa mali aatandila ku $150 (U.S.)!

Ino balimvwa buti aabo bagwasyilizya kupanga mabbuku aaboofwu? Ba Nadia, ibabelekela kumutabi waku South Africa bakaamba kuti: “Buumi mbobapona bakwesu alimwi abacizyi boofwu tabuli buuba-uba, aboobo ndicibona kuti ncoolwe ikupanga cintu cimwi cibagwasya. Cilalibonya kuti Jehova ulabayanda kapati.”

Amwiiye Mbwaabalwa Mabala Aaboofwu

Pele ino mbuti kuti moofwu katacikonzyi kubala? Mumyaka misyoonto yainda, twakamwaya bbuku lyamu Cikuwa lyakuti Learn to Read Braille lyaboofwu, lyalo ilijisi amabala aasimbidwe. Lipangidwe munzila yakuti bantu batali boofwu alimwi aboofwu kabacikonzya kulibelesya antoomwe. Bbuku eeli lili akati kazibelesyo nzyapegwa moofwu kutegwa aiye mbokusimbwa naa kulemba mabala apepa lyaboofwu. Muntu wiiya kulemba mabala aaboofwu kubelesya zibelesyo eezyi ulagwasyigwa kuyeeya bbala limwi alimwi akuti kaazyiba mabala mbwaajatila buyo.

“Ncilengwa Nconditakonzyi Kuleka”

Ino mbuti bakwesu abacizyi boofwu mbobagwasyigwa amabbuku aaya? Ba Ernst, ibakkala ku Haiti, bakali kujanika kumiswaangano yambungano pele tiibakajisi mabbuku aboofwu aali woonse. Aboobo bakali kuswatila buya zintu kutegwa bacikonzye kupa makani aabasicikolo alimwi akupa bwiinguzi lyamiswaangano. Bakaamba kuti: “Pele lino, ndilacikonzya kupa bwiinguzi kufwumbwa ciindi. Ndilimvwa kuti tulikamantene abakwesu abacizyi. Toonse tutambula cakulya cakumuuya comwe buyo!”

Ba Jan, imwaalu moofwu waku Austria alimwi uusololela Ciiyo ca Ngazi Yamulindizi a Ciiyo ca Bbaibbele Cambungano wakaamba kuti: “Mabbuku eesu mauba-uba kwiinda mabbuku aambi aaboofwu ngondakabala kale. Mucikozyanyo, ncuuba-uba kujana manamba aamapeeji, bupanduluzi buyungizyidwe alimwi amabala aapandulula zifwanikiso.”

Ba Seon-ok, bapainiya ku South Korea, mboofwu alimwi mbasyataambi. Kaindi kumiswaangano bakali kubelesya mwaambo wakutambaika wakujatana buya waboofwu, pele lino balalibalila mabbuku aaboofwu aamba zyamu Bbaibbele. Bakaamba kuti: “Mabbuku aambi aaboofwu alakatazya kubala akaambo kakuti mabala aamwi taako, mizila imwi ilanjilana, alimwi mapepa mauba. Pele balo Bakamboni ba Jehova babelesya mapepa mayumu alimwi mabala asimbwa kabotu calo cipa kuti kacinduubila kubala.” Bakayungizya kuti: “Kaindi tiindakali kucikonzya kubala mabbuku aamu Bbaibbele kakunyina lugwasyo lwabantu bambi. Pele lino, ndilalibalila ndelikke. Cilandikkomanisya kapati kuti ndilacikonzya kulibambila miswaangano ya Bunakristo alimwi akutola lubazu cakumaninina. Ndilaakwaabala mabbuku oonse aaboofwu. Inga ndati ncilengwa nconditakonzyi kuleka.”

Mbubwenya mbuli mabbuku eesu aasimbidwe, mabbuku eesu aaboofwu aalo alijisi amabala aakuti: “Ibbuku eeli talili lyakusambala pe. Lilamwaigwa kalili cibeela camulimo wakuyiisya Bbaibbele iwanyika yoonse uugwasyilizyigwa akusanga kwakuliyandila.” Tulamulumba akaambo kakusanga kubelesya nzila zili a donate.jw.org. Bwaabi bwanu bwagwasyilizya kupa kuti bantu boonse, kubikkilizya aboofwu, babe acakulya cakumuuya.