Bwabili, September 16
Twasyoma alimwi twazyiba kuti yebo ndonduwe Musalali wa Leza.—Joh. 6:69.
Mwaapostolo Petro wakali kusyomeka; tanaakalekela cintu cili coonse kumutyompya cakumaninina. Wakatondezya kuti ulasyomeka aciindi cimwi Jesu naakaamba cintu cimwi ncobatakamvwisya basikwiiya bakwe. (Joh. 6:68) Kakunyina kulindila bupanduluzi, banji bakacileka kutobela Jesu. Pele kutali Petro. Wakali kusyomeka alimwi wakaamba kuti Jesu alikke ngowakajisi “majwi aapa buumi butamani.” Jesu wakalizyi kuti Petro alimwi abaapostolo bamwi bakali kuyoomutija. Nokuba boobo, Jesu wakali aalusyomo lwakuti Petro wakali kuyoopiluka akuzumanana kusyomeka. (Lk. 22:31, 32) Jesu wakalizyi kuti “moyo . . . ulapya, pele mubili unyina nguzu.” (Mk. 14:38) Nokuba kuti Petro wakamukaka kuti tamuzyi, Jesu kunyina naakacileka kumukkomanina mwaapostolo ooyu. Ciindi Jesu naakabusyigwa wakalibonya kuli Petro, kweelede kuti aciindi eeci Petro wakali alikke. (Mk. 16:7; Lk. 24:34; 1Kor. 15:5) Amuciyeeyele buyo eeci mbocakamuyumya Petro iwakauside akaambo kancaakacita! w23.09 22 ¶9-10
Bwatatu, September 17
Balikkomene aabo bajatilwa milandu yabo abaabo bajisi zibi izyavwumbwa.—Rom. 4:7.
Leza ulabalekelela zibi aabo bamusyoma. Ulabajatila cakumaninina alimwi kunyina nabikkilila zibi zyabo. (Int. 32:1, 2) Ubabona kuti tabakwe kampenda alimwi akuti mbalulami akaambo kalusyomo lwabo. Nokuba kuti Abrahamu, Davida alimwi abakombi ba Leza bambi basyomeka bakaambwa kuti mbalulami, tiibakalondokede. Aboobo akaambo kalusyomo lwabo, Leza wakababona kuti bakanyina kampenda kwaambisya kuti beezyanisyigwa abaabo ibatakajisi lusyomo mulinguwe. (Ef. 2:12) Mulugwalo ndwaakalembela bana Roma, Mwaapostolo Paulo wakapandulula kuti tweelede kuba alusyomo kutegwa tube balongwe ba Leza. Eeci ncaakacita Abrahamu a Davida, alimwi andiswe ncotweelede kucita. w23.12 3 ¶6-7
Bwane, September 18
Lyoonse katutuulila Leza cipaizyo cantembauzyo, nkokuti, micelo yamilomo yesu iyaambilizya zina lyakwe antangalala.—Heb. 13:15.
Mazuba aano, Banakristo boonse balijisi coolwe cakupa zituuzyo kuli Jehova kwiinda mukubelesya ciindi, nguzu alimwi amali aabo ikutola ambele ziyandika zya Bwami. Tulakonzya kutondezya kuti tulalumba kucoolwe ncotujisi cakukomba Jehova kwiinda mukumupa zituuzyo ziinda kubota. Mwaapostolo Paulo wakaamba zintu nzyotweelede kunoocita lyoonse ciindi notukomba Jehova. (Heb. 10:22-25) Eezyi zibikkilizya kupaila kuli Jehova, kukambaukila bamwi, kuswaangana alimwi akukulwaizyanya ‘ikapati mbotubwene kuti buzuba bwa Jehova bwaswena afwaafwi.’ Kumamanino abbuku lya Ciyubunuzyo, mungelo wa Jehova kasola kukankaizya wakaamba kwaziindi zyobilo majwi aakuti “Komba Leza.” (Ciy. 19:10; 22:9) Aboobo, atuzumanane kukayeeya kasimpe aaka ikajatikizya tempele lya Jehova lipati lyakumuuya alimwi acoolwe ncotujisi cakukomba Leza wesu mupati! w23.10 29 ¶17-18