1 Samuele
29 Ba Filisiti+ bakabunganya basikalumamba babo boonse ku Afeki, ciindi bana Israyeli nobakayakide nkambi afwaafwi akasensa kamaanzi ikakali ku Jezreeli.+ 2 Alimwi bami baba Filisiti bakali kwiinda munkamu zyamyaanda amunkamu zyazyuulu, eelyo Davida abaalumi bakwe bakali kutobela musyule antoomwe a Akisi.+ 3 Pele basilutwe baba Filisiti bakati: “Ino ba Hebrayo aaba bayanda nzi okuno?” Amvwe boobo Akisi wakaingula basilutwe baba Filisiti kuti: “Ooyu ngu Davida, mubelesi wa Mwami Saulo wa Israyeli, iwali kukkala andime kwamwaka omwe naa kwiinda waawo.+ Kunyina bubi buli boonse mbondajana mulinguwe kuzwa buzuba naakaboola kulindime kusikila sunu.” 4 Pele basilutwe baba Filisiti bakanyema akaambo kanguwe, eelyo bakati kulinguwe: “Mwaambile apiluke.+ Kapiluka kubusena bwakwe mbookamupa. Utamulekeli kuti aunke andiswe kunkondo nkaambo inga waakutubukila ciindi cankondo.+ Ino uyeeya kuti muntu ooyu inga wacita nzi kuti ayandwe asimalelaakwe kunze lyakukosola mitwe yabaalumi besu? 5 Sena ooyu tali ngo Davida ngobakali kwiimba munyimbo nibakali kuzyana kabaamba kuti:
‘Saulo wajaya bantu bali zyuulu,
Pele Davida wajaya makumi aazyuulu’?”+
6 Aboobo Akisi+ wakaita Davida akumwaambila kuti: “Masimpe Jehova mbwali muumi, uliluleme alimwi ndilayanda kuti uunke ampi yabasikalumamba yangu kunkondo,+ nkaambo kunyina bubi buli boonse mbondajana mulinduwe kuzwa buzuba mbookaboola kulindime kusikila sunu.+ Pele bami baba Filisiti tabakusyomi pe.+ 7 Aboobo kopiluka muluumuno, alimwi utaciti cili coonse citakookkomanisya bami baba Filisiti.” 8 Pele Davida wakati kuli Akisi: “Ino ncinzi ncindacita? Ino mbubi nzi mboojana mulindime ndemubelesi wako kuzwa buzuba nindakaboola kulinduwe kusikila sunu? Ino nkaambo nzi nconditeelede kuunka anduwe kuyoolwana basinkondonyina bamwami simalelaangu?” 9 Mpoonya Akisi wakaingula Davida kuti: “Kulindime uli muntu uuli kabotu, mbuli mungelo wa Leza.+ Pele basilutwe baba Filisiti baamba kuti, ‘Utamuzumizyi kuti aunke andiswe kunkondo pe.’ 10 Lino ukabuke mafwumofwumo ababelesi basimalelaako mbookaboola limwi; weelede kuyoobuka akuunka mbobutiikacede buyo.”
11 Aboobo Davida abaalumi bakwe bakafwuma kubuka kuti bapiluke kunyika yaba Filisiti, eelyo abalo ba Filisiti bakaunka ku Jezreeli.+