Jobu

 3 Nkaambo nzi ncotweelede kubonwa mbuli banyama+

Akubonwa mbuli kuti tuli bafwubafwuba* mumeso aanu?

 4 Kunyina makani akuti yebo omwini walizazaula mubukali bwako,

Sena nyika ilalekelezyegwa akaambo kanduwe,

Alimwi sena ndomba ilaswenzyegwa abusena bwayo?

 5 Masimpe mumuni wamuntu mubi uyoozimwa,

Alimwi mabangabanga aamulilo wakwe taakamweki pe.+

 6 Ncobeni mumuni uyooba mudima mutente lyakwe,

Alimwi lampi limumunikila ilili atala lyakwe liyoozimwa.

 7 Intaamu zyakwe zyanguzu ziyoofwiimpa,

Alwalo lulayo lwakwe luyoomupa kuwa.+

 8 Nkaambo maulu aakwe ayoomunjizya mulunsabwe,

Alimwi uyakwiingaila akunjila mubuzambo bwandulo.

 9 Kooze kayoomujata kukasindi;

Uyoocegwa mukakole.+

10 Uliteedwe ntambo ansi,

Alimwi akakole munzila yakwe.

11 Koonse-koonse, zintu ziyoosya zilamutilimuna+

Alimwi zilimujisi kumutandaanya oomu amoomu.

12 Nguzu zyakwe zilamana,

Alimwi mapenzi+ ayoomupa kudadalika.*

13 Lukanda lwakwe lwaligwa;

Cilwazi cijaya* kwiinda zyoonse cilya maanza amaulu aakwe.

14 Wazyulwa mutente lyakwe mwaakali kukkala kaliibide+

Akutolwa kumwami uuyoosya.*

15 Beenzu* bayookkala mutente lyakwe;

Sulufa uyoosansailwa aŋanda yakwe.+

16 Miyanda yakwe iyooyuma ansi,

Ayalo mitabi yakwe iyooneta atala lyakwe.

17 Takayeeyegwi limbi munyika,

Alimwi zina lyakwe talikazyibwi* mumugwagwa.

18 Bayoomutandila mumudima kuzwa mumumuni

Alimwi uyootandwa munyika mbotu.

19 Takabi abana alimwi aluzubo akati kabantu bakwe,

Alimwi takabi amuntu uuyoofwutuka mubusena mwakkala.*

20 Bwaakusika buzuba bwakwe bantu ba Kumbo bayoogambwa kapati

Abalo bantu ba Kujwe bayooyoowa kapati.

21 Eeci ncecicitikila matente aasimucita zibi

Alimwi ncecicitika kubusena bwamuntu uutamuzyi Leza.”