“Abuboole Bwami Bwako”

Jehova wakasyomezya kuti: ‘Kunyina nokuyooba limbi kulila, kucisa, kuciswa, naa kufwa. Ndiyoosindula misozi yoonse kumeso aabo. Zintu zyoonse zibyaabi izyakaindi ziyoolubwa.’

Jehova wakabikka Adamu a Eva mumuunda wa Edeni kuti kabakkala muluumuno alimwi kabakkomene. Bakeelede kukomba Usyi wabo wakujulu alimwi akuzyala bana kuzuzya nyika. Adamu a Eva tiibakamumvwida Jehova, pele makanze aakwe taakwe naakacinca pe. Mubbuku eeli twabona kuti zyoonse nzyasyomezya Leza zilazuzikizyigwa. Bwami bwakwe buyooleta zilongezyo zibotu kapati anyika, mbubwenya mbwaakasyomezya Abrahamu.

Ino-ino, Saatani, madaimona aakwe alimwi abantu babi boonse bayoonyonyoonwa. Bantu boonse ibanoopona banookomba Jehova. Tatunoociswi naa kufwa. Muciindi caboobo, tunoobuka buzuba abuzuba katujisi nguzu alimwi katukkomene abuumi. Nyika iyooba paradaiso. Boonse banoojisi cakulya cibotu alimwi aŋanda iili kabotu. Bantu banooli basilubomba ikutali basilunya naa basinkondo. Banyama bamusyokwe tabanootuyoowi, alimwi andiswe tatunoobayoowi.

Cinookkomanisya kapati ciindi Jehova aakutalika kubusya bantu. Tuyoobatambula bantu bakaindi mbuli Abelo, Nowa, Abrahamu, Sara, Musa, Rute, Esita alimwi a Davida. Tuyoobelekela antoomwe ambabo kupanga nyika eeyi kuba paradaiso. Lyoonse kunooli milimo minji iikkomanisya yakucita.

Jehova uyanda kuti mukajanike. Muyoomuzyiba munzila njomutakonzyi kuyeeyela. Atuswene kuli Jehova buzuba abuzuba, lino mane kukabe kutamani!