Sena kuli nomwakayandide kubala Bbaibbele mpoonya mwakaleka akaambo katwaambo itwaambwa atala aawa? Kubantu banji, kubala Bbaibbele kulabayoosya. Pele ino mbuti kuti mwamvwa kuti Bbaibbele lilakonzya kumugwasya kujana lukkomano alimwi akumupa kukkutila mubuumi? Alimwi mbuti kuti mwajana kuti kuli nzila nzyomukonzya kubelesya kulibala zyalo izikonzya kupa kuti kalikkomanisya kapati? Sena inga tiimwayanda kulilanga-langa Bbaibbele kutegwa mubone mbolikonzya kumugwasya?

Amubone nzyobakaamba aabo ibakajana kuti lilagwasya Bbaibbele ciindi nobakatalika kulibala.

Ezekiel, uujisi myaka iili kuma 20, wakaamba kuti: “Kaindi, ndakali mbuli muntu iweenzya mootokala uutazyi nkwaya. Pele kubala Bbaibbele kwandigwasya kuba abuumi bulaampindu. Lilijisi lulayo lugwasya ndondikonzya kubelesya buzuba abuzuba.”

Frieda, awalo uujisi myaka iili kuma 20 wakapandulula kuti: “Ndakali kufwambaana kunyema. Pele akaambo kakubala Bbaibbele, ndaiya kulijata. Eeci candigwasya kapati kumvwana abantu, aboobo lino ndilijisi balongwe banji.”

Kujatikizya Bbaibbele, mukaintu uujisi myaka iili kuma 50 wazina lya Eunice wakaamba kuti: “Lyandigwasya kuba muntu uuli kabotu, kuleka tumpenda twangu tubyaabi.”

Kweelana anzyobakajana basikubala aabo alimwi abambi banji, kubala Bbaibbele kulakonzya kumugwasya kupona buumi bukkomanisya kapati. (Isaya 48:17, 18) Akati kazintu nzyomukonzya kujana, lilakonzya kumugwasya (1) kusala kabotu, (2) kujana balongwe beni-beni, (3) kuliyumya nomutyompedwe, alimwi (4) ciinda zyoonse, kwiiya kasimpe kajatikizya Leza. Lulayo lwamu Bbaibbele luzwa kuli Leza, aboobo lulakonzya kumugwasya kuti mwalutobela. Leza kunyina napa lulayo lutali kabotu.

Cintu iciyandika kapati nkutalika. Ino ntwaambo nzi tugwasya itukonzya kupa kuti cuube-ube kutalika alimwi akuti kalikkomanisya kapati kulibala?

Ino ninzila nzi iikonzya kupa kuti kubala Bbaibbele kwanu kakukkomanisya alimwi akumugwasya kapati? Amubikkile maano kutwaambo tosanwe itwabagwasya bantu banji.

Amusale busena buli kabotu. Amusole kujana busena bunyina coongo. Amuzigwisye zintu zikonzya kumunyonganya kutegwa mubikkile maano kuzintu nzyomubala. Kuba abusena aali mumuni uuli kabotu alimwi aainda muwo mubotu kulakonzya kumugwasya kujana mpindu kapati kuzintu nzyomubala.

Amube amizeezo iili kabotu. Mbwaanga Bbaibbele lyakazwa kuli Taateesu wakujulu, muyoogwasyigwa kapati kuti kamujisi muuya mbuli wamwana walo uulibambilide kwiiya kumuzyali siluyando. Ikuti kamujisi mizeezo iili yoonse iitali kabotu kujatikizya Bbaibbele, amuleke kwiibikkila maano kutegwa Leza amuyiisye.—Intembauzyo 25:4.

Amupaile kamutanatalika kubala. Bbaibbele lijisi mizeezo ya Leza, aboobo tacigambyi pe kuti tuyandika lugwasyo lwakwe kutegwa tulimvwisye. Leza usyomezya kubapa “muuya uusalala aabo ibamulomba.” (Luka 11:13) Muuya uusalala ulakonzya kumugwasya kumvwisya mizeezo ya Leza. Mukuya kwaciindi, uyoojalula mizeezo yanu kutegwa muzimvwisye “noziba zintu zisisidwe zya Leza.”—1 Bakorinto 2:10.

Amubale kutegwa mumvwisye. Mutabalili buyo akaambo kakuyanda kumana cibalo. Amuzinzibale kuyeeya zintu nzyomubala. Amulibuzye mibuzyo mbuli yakuti: ‘Ino mbube nzi mbondibona kujatikizya muntu ngondibala? Mbuti mbondikonzya kububelesya mubuumi bwangu?’

Amulibikkile mbaakani zigaminide. Kutegwa mugwasyigwe mukubala Bbaibbele kwanu, amulibikkile mbaakani yakwiiya cintu cimwi calo iciyoomugwasya kubotya buumi bwanu. Mulakonzya kulibikkila mbaakani mbuli zyeezi zitobela: ‘Ndiyanda kwiiya zinji kujatikizya Leza kumugama.’ ‘Ndiyanda kuba muntu uuli kabotu, mulumi naa mukaintu uuli kabotu.’ Mpoonya amusale zibalo zyamu Bbaibbele izikonzya kumugwasya kuzuzikizya mbaakani zyanu.a

Twaambo ootu tosanwe tuyoomugwasya kutalika. Pele ino mbuti mbomukonzya kupa kuti kubala kwanu kakukkomanisya kapati? Cibalo citobela cilaamba twaambo tumwi tukonzya kugwasya.

Ino kubala Bbaibbele kwanu kunooli buti? Sena kunookkomanisya naa takunookkomanisyi? Ciyeeme buyo anzila nzyomubelesya mukubala kwanu. Atulange-lange nzyomukonzya kucita kutegwa muyungizye luyandisisyo lwanu lwakubala alimwi akuti kakumukkomanisya kapati.

Amusale busanduluzi bwa Bbaibbele busyomeka, bwamwaambo wamazuba aano. Ikuti mubala cibalo cijisi mabala manji aakatazya naa aatacibelesyegwi alo ngomutazyi, nkokuti tamukakukkomanini kubala cibalo eeco. Aboobo amuyandaule Bbaibbele ilibelesya mwaambo uutakatazyi kumvwa walo uyoomusika amoyo. Pele kulubazu lumwi, lyeelede kuti kalisanduludwe munzila iiluzi alimwi cakulomya.a

Amubelesye mincini yamazuba aano. Mazuba aano Bbaibbele lilajanika kalili bbuku lisimbidwe mpoonya alimwi kalili bbuku likonzya kubalwa aamincini. Ma Bbaibbele amwi alakonzya kubalwa a Intaneti naa kwaakkopa kutegwa kamulibalila amakkompyuta, amatabbuleti naa amafooni. Busanduluzi bumwi bulabikkilizya azibelesyo zimwi izikonzya kumugwasya kujana tupango tumwi cakufwambaana kutegwa mubale muma Bbaibbele aambi makani ngamunya naa ambweni kweezyanisya abusanduluzi bwiindene-indene. Kuti kamuyanda kuswiilila muciindi cakubala, Bbaibbele ilyakalekkoodwa alyalo lilajanika mumyaambo imwi. Bantu banji balakkomana kuswiilila ciindi nobali mulweendo, nobawasya, naa nobacita milimo imwi iizumizya kuswiilila. Sena inga tiimwasola kubelesya nzila iikonzya kumugwasya kweelana abukkale bwanu?

Amubelesye zibelesyo izigwasya kwiiya Bbaibbele. Zibelesyo izigwasya kwiiya Bbaibbele zilakonzya kumugwasya kujana mpindu kapati mukubala kwanu. Kuli mamaapu aatondezya masena aambidwe mu Bbaibbele, alo akonzya kumugwasya kujana masena aali mucibalo ncomubala alimwi akumugwasya kweezeezya zintu mbozyakali kucitika. Zibalo mbuli zyeezyi izili mumagazini eeyi naa izili mucibeela cakuti “Njiisyo Zyamu Bbaibbele” icijanika awebbusaiti ya jw.org, zilakonzya kumugwasya kumvwisya zibeela zinji zyamu Bbaibbele.

Amubelesye nzila ziindene-indene. Ikuti kubala Bbaibbele kuzwa kumatalikilo kusikila kumamanino kulamuyoosya, sena tamukonzyi kuyungizya luyandisisyo lwakubala kwiinda mukutalika acibalo icimukkomanisya kapati? Ikuti kamuyanda kuzyiba bantu baambidwe mu Bbaibbele ibadumide kapati, mulakonzya kutalika kwiinda mukubala zibalo zyaamba mbabo. Nzila izikonzya kumugwasya zyabikkilizyigwa mukabbokesi kakuti “Amulimvwisye Bbaibbele Kwiinda Mukuzyiba Bantu Baambidwe Mulindilyo.” Naa ambweni muyanda kubala Bbaibbele kweelana acibalo naa kweelana ambozyakali kucitika zintu. Sena inga tiimwasola nzila yomwe akati kanzila eezyi?

Bbaibbele talili bbuku-bbuku buyo. Ndibbuku lijisi lulayo luzwa ku Mulengi wesu. (2 Timoteyo 3:16) Mulumbe wandilyo ulakonzya kutugwasya kapati. Alimwi buya Bbaibbele lyaamba kuti: “Jwi lya Leza lilaabuumi alimwi lilaanguzu.” (Bahebrayo 4:12) Lilaanguzu zyakucinca buumi bwesu munzila zyobilo ziyandika—kutupa busolozi mubuumi bwesu bwabuzuba abuzuba alimwi akutugwasya kuzyiba Leza azisyomezyo zyakwe.—1 Timoteyo 4:8; Jakobo 4:8.

Kucinca buumi bwanu lino. Bbaibbele lilakonzya kumugwasya mumakani aamujatikizya nywebo lwanu kumugama. Lilapa lulayo lugwasya kujatikizya makani aatobela.

• Kumvwana abantu.—Baefeso 4:31, 32; 5:22, 25, 28, 33.

• Buumi bwanu ambomulimvwa.​—Intembauzyo 37:8; Tusimpi 17:22.

• Kulilemeka.​—1 Bakorinto 6:9, 10.

• Kujana nzyomuyandika mubuumi.​—Tusimpi 10:4; 28:19; Baefeso 4:28.a

Banabukwetene ibacili bana-bana baku Asia bakakkomana kapati kubona mbolugwasya lulayo lwamu Bbaibbele. Mbubwenya mbuli banabukwetene banji bapya, bakajisi buyumuyumu bwakumvwisya bube bwaumwi amweenzinyina alimwi apenzi lyakubandika cakulikwaya. Pele bakatalika kuzibelesya nzyobakali kubala mu Bbaibbele. Ncinzi cakatobela? Balumi, ba Vicent, bakaamba kuti: “Nzyondakabala mu Bbaibbele zyakandigwasya kulwana buyumuyumu caluyando mbotwakajisi mucikwati cesu. Kupona kweelana ancolyaamba Bbaibbele kwatugwasya kuba abuumi bukkomanisya.” Bakaintu babo, ba Annalou, bakazuminizya akwaamba kuti: “Kubala zikozyanyo zyamu Bbaibbele kwakatugwasya kapati. Lino ndilikkomene alimwi akukkutila mucikwati cesu alimwi tulijisi mbaakani mubuumi.”

Kuzyiba Leza. Kunze aazintu nzyobakaamba kujatikizya cikwati, ba Vicent alimwi bakaamba kuti: “Kwiinda mukubala Bbaibbele, lino ndilimvwa kuba acilongwe ciyumu a Jehova kwiinda kaindi.” Ncobakaamba ba Vicent citondezya kaambo kayandika kapati—Bbaibbele lilakonzya kumugwasya kumuzyiba kabotu Leza. Kwiinda mukucita boobo, tamukagwasyigwi buyo alulayo lwakwe pele alimwi muyoomuzyiba kabotu mbuli mulongwe. Alimwi muyoobona kuti ulayubununa twaambo tujatikizya bubotu bwakumbele, ciindi nomuyookkomana ‘abuumi bwini-bwin’—bwalo ibunooliko mane kukabe kutamani. (1 Timoteyo 6:19) Aaya makani aatakonzyi kujanika mubbuku limbi lili lyoonse.

Ikuti mwalibikkila mbaakani yakubala Bbaibbele alimwi akuzumanana, andinywe mulakonzya kujana mpindu eezyo—nkokuti kucinca buumi bwanu lino alimwi akuzyiba Leza. Nokuba boobo, nomuzumanana kubala Bbaibbele, kulalangilwa kuti muyooba amibuzyo minji. Alimwi nomucita boobo, amuyeeye cikozyanyo cibotu camuna Etiopiya iwakapona myaka iisika ku 2,000 yainda. Wakajisi mibuzyo minji kujatikizya Bbaibbele. Ciindi naakabuzyigwa kuti naa wakali kucimvwisya ncaakali kubala, wakaingula kuti: “Mubwini mbuti mbondinga ndacizyiba ikuti kakunyina uundipandulwida?”b Kumane camoyo woonse wakazumina kugwasyigwa amuntu iwakalicibwene kale kuyiisya Bbaibbele, Filipo, sikwiiya wa Jesu. (Milimo 8:30, 31, 34) Mbubwenya buyo, kuti naa muyanda kuzyiba zinji kujatikizya Bbaibbele, tumukulwaizya kuti mutume kulomba kwanu a Intaneti kubelesya webbusaiti ya www.pr2711.com naa amulembele kukkeyala iili afwaafwi ankomukkala iili apeeji 2 mumagazini iino. Alimwi mulakonzya kubandika a Bakamboni ba Jehova bakubusena nkomukkala naa kuunka ku Ŋanda ya Bwami iili kubusena nkomukkala. Sena inga tiimwatalika sunu kubala Bbaibbele, akulilekela kuti limusololele kubuumi buli kabotu?