Ino Buumi Bujisi Mpindu Nzi?

Bwiinguzi bwamu Bbaibbele

Mubuzyo ooyu ulakonzya kubuzyigwa munzila zinji, mucikozyanyo, “Nkaambo nzi ncotuli waano?” naa kuti, “Ino buumi bwangu bujisi mulimo nzi?” Bbaibbele litondezya kuti ncotuponena nkuba acilongwe a Leza. Amulange-lange twaambo ootu twamasimpe tuyandika tujanika mu Bbaibbele.

• Leza Mulengi wesu. Bbaibbele lyaamba kuti: ‘[Leza] ngonguwe iwakatulenga, tuli bakwe.’​—Intembauzyo 100:3; Ciyubunuzyo 4:11.

• Leza ulijisi makanze kujatikizya zyintu zyoonse nzyalenga, kubikkilizya andiswe.​—Isaya 45:18.

• Leza wakatulenga katujisi luyandisisyo ‘lwazyintu zyakumuuya’, lwalo lubikkilizya akuyanda kuzyiba ncotuponena. (Matayo 5:3) Leza uyanda kuti tuluzuzikizye luyandisisyo oolu.​—Intembauzyo 145:16.

• Tulajana zyintu zyakumuuya nzyotuyanda kwiinda mukuba acilongwe a Leza. Nokuba kuti bamwi bayeeya kuti tacikonzyeki kuba acilongwe a Leza, Bbaibbele litukulwaizya kuti: “Amuswene kuli Leza, eelyo awalo uyooswena kulindinywe.”​—Jakobo 4:8; 2:23.

• Kutegwa tube acilongwe a Leza, tweelede kupona kweelana amakanze ngajisi kujatikizya ndiswe. Bbaibbele lilaamba makanze aaya mulugwalo lwa Mukambausi 12:13 noliti: “Lemeka Leza akubamba milazyo yakwe, nkaambo kucita obo nceelelo coonse camuntu.”

• Kumbele, tuyoobona kuzuzikizyigwa kwamakanze aa Leza aakusaanguna aakugwisya mapenzi alimwi akubapa buumi butamani balongwe bakwe bamukomba.​—Intembauzyo 37:10, 11.