Jehova Utusyomezya Kuti Uyoopanga Nyika Kuba Paradaiso

1. Ino musinsimi Isaya wakali kubaambila nzi bana Israyelinyina?

MUSINSIMI Isaya wakapandulula Jehova kuti ngu “Leza wakasimpe.” Ibbala lyakasandululwa kuti ‘kasimpe,’ mu Chihebrayo lyaamba kuti “Ameni.” (Is. 65:​16, bupanduluzi buyungizyidwe) Mpoonya bbala lyakuti “ameni” lyaamba kuti “akube boobo” naa “masimpe.” Ciindi bbala lyakuti “ameni” nolibelesyegwa mu Bbaibbele kwaamba Jehova naa Jesu, ncisinizyo cakuti cintu cimwi ncamasimpe. Aboobo, Isaya wakali kwaambila bana Israyeli kuti: Kufwumbwa cintu ncaamba Jehova, cilacitika ncobeni. Alimwi buya, Jehova wakatondezya kale kuti majwi aaya ngamasimpe kwiinda mukuzizuzikizya zisyomezyo zyakwe.

2. Nkaambo nzi ncotukonzya kuzisyoma zisyomezyo zya Jehova zijatikizya buumi bwesu bwakumbele? Mibuzyo nzi njotutiilange-lange?

² Sena andiswe tulakonzya kusyoma kuti zisyomezyo zya Jehova zyakumbele ziyoozuzikizyigwa? Nokwakainda myaka iitandila ku 800 kuzwa ciindi Isaya naakali kupona, mwaapostolo Paulo wakaamba kaambo ncotukonzya kusyoma kuti zisyomezyo zya Leza ziyoozuzikizyigwa ncobeni. Wakaamba kuti: ‘Tacikonzyeki kuli Leza kubeja.’ (Heb. 6:18) Mucikozyanyo, mukasensa komwe kamaanzi tamukonzyi kuzwa maanzi mabotu amaanzi aajisi sautu. Mbubwenya buyo, mbwaanga Jehova ngu Leza wakasimpe, takonzyi kubeja pe. Aboobo tulakonzya kuzisyoma cakumaninina zyoonse nzyaamba, kubikkilizya azisyomezyo izijatikizya buumi bwesu bwakumbele. Mucibalo eeci, tulalanga-langa mibuzyo eeyi iitobela: Ino Jehova usyomezya kuyoocita nzi kumbele? Alimwi ncinzi citondezya kuti uyoocizuzikizya ncobeni cisyomezyo cakwe?

INO JEHOVA USYOMEZYA NZI?

3. (a) Ncisyomezyo nzi ncobakkomanina babelesi ba Leza boonse? (Ciyubunuzyo 21:​3, 4) (b) Ino bamwi balimvwa buti ciindi notubabalila cisyomezyo eeci?

³ Cisyomezyo ncotuyanda kulanga-langa balacikkomanina kapati babelesi ba Leza boonse. (Amubale Ciyubunuzyo 21:​3, 4.) Jehova usyomezya ciindi ‘lufwu nolutakabi limbi, akwalo koomoka, kulila nokuba kucisa nokutakabi limbi pe.’ Bunji bwesu tulalubelesya lugwalo oolu kuumbulizya bantu mbotukambaukila alimwi akubatondezya buumi mbobunoobede mu Paradaiso. Pele ino bamwi balimvwa buti ciindi notubabalila cisyomezyo eeci? Ibamwi baladooneka akwaamba kuti, “Mwati eeci ciyoocitika ncobeni?”

4. (a) Ino ncinzi Jehova ncaakazyi? (b) Kunze lyakwaamba buyo cisyomezyo, ncinzi acimbi Jehova ncaakaamba?

⁴ Ciindi Jehova naakasololela mwaapostolo Johane kulemba cisyomezyo eeci cijatikizya Paradaiso, wakalizyi kuti tunoocaambila bamwi mazuba aano ciindi notukambauka mulumbe wa Bwami. Alimwi wakalizyi kuti bantu banji cakali kuyoobayumina kucisyoma cisyomezyo eeci cijatikizya “zintu zipya.” (Is. 42:9; 60:2; 2Kor. 4:​3, 4) Aboobo, mbuti mbotukonzya kugwasya bamwi kusyoma kuti zilongezyo zyaambidwe kulugwalo lwa Ciyubunuzyo 21:​3, 4 ziyoocitika ncobeni? Alimwi mbuti mbotukonzya kuyumya lusyomo lwesu muli Jehova azisyomezyo zyakwe? Jehova wakaamba twaambo tulimvwisya ncotweelede kusyoma kuti uyoocizuzikizya cisyomezyo eeci. Ino ntwaambo nzi ooto?

JEHOVA WAKASINIZYA KUTI CISYOMEZYO CAKWE CIYOOZUZIKIZYIGWA

5. Ntwaambo nzi itutupa kusyoma cisyomezyo ca Leza ca Paradaiso? Ino tutujana kuli?

⁵ Tulatujana twaambo itutupa kusyoma kuti cisyomezyo ca Jehova ca Paradaiso ciyoozuzikizyigwa ncobeni mutupango ootu tutobela. Tubala kuti: “Mpoonya ooyo uukkede acuuno cabwami wakati: ‘Amubone! Ndilengulula zintu zyoonse kuti zibe zipya.’ Alimwi, waamba kuti: ‘Kolemba, nkaambo majwi aaya alasyomeka alimwi ngamasimpe.’ Alimwi wakandaambila kuti: ‘Zyacitika! Ndime Alefa a Omega, imatalikilo amamanino.’”—Ciy. 21:​5, 6a.

6. Nkaambo nzi majwi aali ku Ciyubunuzyo 21:​5, 6 ncaayumya lusyomo lwesu mucisyomezyo ca Leza?

⁶ Nkaambo nzi cibalo eeci camu Bbaibbele ncociyumya lusyomo lwesu mucisyomezyo ca Leza? Bbuku lyakuti Revelation Climax lyaamba boobu kujatikizya tupango ootu: “Cili mbuli kuti Jehova lwakwe wakasaina cipepa icitupa cisinizyo cakuti uyoocizuzikizya ncobeni cisyomezyo cakwe.”b Cisyomezyo ca Leza cilajanika ku Ciyubunuzyo 21:​3, 4. Pele mukapango 5 a 6 ubikkide ciganto citugwasya kusyoma kuti zisyomezyo zyakwe ziyoozuzikizyigwa ncobeni. Atulange-lange majwi ngaakabelesya Jehova mbwaatondezya kuti ulisinizyide.

7. Nkaambo nzi majwi aali kumatalikilo aakapango 5 ncaalibedelede? Ino eeci citondezya nzi?

⁷ Kapango 5 katalika amajwi aakuti: “Ooyo uukkede acuuno cabwami wakati.” (Ciy. 21:5a) Aaya majwi alilibedelede nkaambo ali akati kaziindi zyotatwe zyaambidwe mubbuku lya Ciyubunuzyo, ciindi Jehova lwakwe naakaambaula muzilengaano. Kunyina naakabelesya mungelo naa Jesu iwakabusyigwa, pele lwakwe kumugama nguwakaamba. Aboobo eeci citondezya kuti tulakonzya kwaasyoma cakumaninina majwi aatobela ngaakaamba. Nkaambo nzi? Nkaambo Jehova ‘takonzyi kubeja.’ (Tit. 1:2) Aboobo majwi ngotubala ku Ciyubunuzyo 21:​5, 6 ayoozuzikizyigwa ncobeni.

“AMUBONE! NDILENGULULA ZINTU ZYOONSE KUTI ZIBE ZIPYA”

8. Mbuti Jehova mbwatondezya kuti ulisinizyide kujatikizya cisyomezyo cakwe? (Isaya 46:10)

⁸ Kumane Jehova waamba kuti “Amubone!” (Ciy. 21:5) Ibbala lya Chigiriki lyakasandululwa kuti “amubone!” lilabelesyegwa cakwiinduluka-induluka mubbuku lya Ciyubunuzyo. Bbuku limwi lyakaamba kuti bbala eeli lilabelesyegwa kaili “nzila yakupa kuti mubali abikkile maano kumajwi aatobela.” Ino majwi nzi aatobela Leza ngaakaamba? Wakaamba kuti: “Ndilengulula zintu zyoonse kuti zibe zipya.” Masimpe kuti, Jehova uyoozicita kumbele zintu eezyi. Pele akaambo kakuti ulisinizyide kuti uyoocizuzikizya cisyomezyo cakwe, wakaamba mbuli kuti wakazicita kale.—Amubale Isaya 46:10.

9. (a) Ino majwi aakuti ‘kulengulula zintu zyoonse kuti zibe zipya,’ aamba zintu nzi zyobilo? (b) Ncinzi ciyoocitikila ‘julu anyika’ ziliko?

⁹ Lino atulange-lange cintu citobela ncaakaamba kubbuku lya Ciyubunuzyo 21:5 kuti: “Ndilengulula zintu zyoonse kuti zibe zipya.” Ino majwi aaya aamba nzi? Mucaandaano eeci camu Bbaibbele, majwi aaya aamba zintu zyobilo Jehova nzyayoocita. Cakusaanguna, uyoonyonyoona bweende oobu bwakaindi. Kumane cabili, uyooleta bweende bupya. Ku Ciyubunuzyo 21:1 tubala kuti: “Julu lyakaindi anyika yakaindi zyakamana.” “Julu lyakaindi” lyaamba mfwulumende zyamunyika eeyi iziyungwa a Saatani amadaimona aakwe. (Mt. 4:​8, 9; 1Joh. 5:19) Bbala lyakuti “nyika” kweelana ambolibelesyegwa mu Bbaibbele, lilakonzya kwaamba bantu bakkala mpawo. (Matl. 11:1; Int. 96:1) Aboobo “nyika yakaindi” yaamba bantu babyaabi. Jehova takabambululi buyo “julu” alimwi “anyika” ziliko kale pe, pele uyoozinyonyoona buya cakumaninina. Kumane uyoopa kuti zinjililwe busena ‘ajulu lipya alimwi anyika mpya,’ calo caamba kuti bantu baluleme banooyendelezyegwa amfwulumende mpya.

10. Ncinzi Jehova ncayoolengulula kuti cibe cipya?

¹⁰ Ku Ciyubunuzyo 21:​5, tubala cintu Jehova ncaamba kujatikizya zintu nzyayoolengulula kuti zibe zipya. Amubone kuti Jehova tanaakaamba kuti: “Ndilengulula zintu zyoonse zipya.” Pele wakaamba kuti: “Ndilengulula zintu zyoonse kuti zibe zipya.” Aboobo, Jehova uyoopanga nyika kuti ibe mpya alimwi akupa kuti bantu balondoke. Isaya wakaambila limwi kuti, Jehova uyoopa kuti nyika yoonse ibote mbuli mbowakabede muunda wa Edeni. Alimwi andiswe uyootupa kuti tube bapya kwiinda mukutuponya cakumaninina. Balema, boofwu abasinkematwi boonse bayooponesyegwa alimwi nobaba bafwide bayoobusyigwa.—Is. 25:8; 35:​1-7

“MAJWI AAYA ALASYOMEKA ALIMWI NGAMASIMPE. . . . ZYACITIKA!”

11. Ino Jehova wakamwaambila kucita nzi Johane? Alimwi nkaambo nzi?

¹¹ Ncinzi acimbi Jehova ncaakaamba kutegwa atugwasye kumusyoma? Jehova wakaambila Johane kuti: “Kolemba, nkaambo majwi aaya alasyomeka alimwi ngamasimpe.” (Ciy. 21:5) Jehova tanaakaile kumwaambila buyo kuti ‘alembe.’ Pele wakamwaambila akaambo ncaakeelede kucitila boobo. Wakaamba kuti: “Nkaambo majwi aaya alasyomeka alimwi ngamasimpe,” ikutondezya kuti majwi aakwe aaya aliluzi alimwi alakonzya kusyomwa. Eelo kaka tulalumba kapati kuti Johane wakaatobela malailile aakuti ‘alembe!’ Akaambo kaceeci, tulakonzya kucibala cisyomezyo ca Leza ca Paradaiso alimwi akuzinzibala kuyeeya zilongezyo zibotu nzyotulangila.

12. Nkaambo nzi Jehova ncaakaambila kuti: “Zyacitika!”

¹² Ino majwi nzi aatobela Leza ngaakaamba? Wakaamba kuti: “Zyacitika!” (Ciy. 21:6) Jehova wakaamba zintu zyoonse zijatikizya Paradaiso mbuli kuti zyacitika kale. Nkaambo nzi? Akaambo kakuti kunyina cikonzya kumulesya kuzuzikizya makanze aakwe. Kumane Jehova wakaamba cintu acimbi icitugwasya kusyoma kuti cisyomezyo cakwe ciyoozuzikizyigwa ncobeni. Ino ncintu nzi eeco?

“NDIME ALEFA A OMEGA”

13. Nkaambo nzi Jehova ncaakalyaamba kuti: “Ndime Alefa a Omega”?

¹³ Mbubwenya mbokwaambwa kale, Jehova lwakwe wakaambaula a Johane ziindi zyotatwe kwiinda muzilengaano. (Ciy. 1:8; 21:​5, 6; 22:13) Ziindi zyoonse eezyi Jehova wakalyaamba kuti: “Ndime Alefa a Omega.” Alefa ndibbala lili kumatalikilo mualufabbeti ya Chigiriki mpoonya Omega lili kumamanino. Kwiinda mukulyaamba kuti ndime “Alefa a Omega,” Jehova utugwasya kubona kuti, ikuti watalika cintu cimwi, ulacimana kucicita.

14. (a) Amupe cikozyanyo citondezya ciindi Jehova naakaamba kuti “Alefa” munzila yamaambilambali alimwi anayakwaamba kuti “Omega.” (b) Ino majwi aali kulugwalo lwa Matalikilo 2:​1-3 atwaambila nzi?

¹⁴ Ciindi Jehova naakamana kulenga Adamu a Eva, wakabaambila makanze ngaakajisi kujatikizya nyika abantu. Bbaibbele lyaamba kuti: “Leza wakabalongezya akubaambila kuti: ‘Amuzyalane muvwule, muzuzye nyika akuyeendelezya.’” (Matl. 1:28) Ciindi Jehova naakaamba makanze aakwe ciindi cakusaanguna, cakali mbuli kuti wakaamba kuti “Alefa.” Cakusalazya, wakaatondezya makanze aakwe aakuti: Ciindi cakali kuyoosika cakuti bana ba Adamu a Eva balondokede bazuzye nyika akwiicinca kuba paradaiso. Aboobo makanze aakwe aakuzuzikizyigwa, cinooli mbuli kuti waamba kuti “Omega.” Jehova naakamana kulenga “julu anyika azili mumo zyoonse,” wakaamba cintu cimwi ikutondezya kuti makanze aakwe akali kuyoozuzikizyigwa ncobeni. Cilajanika kulugwalo lwa Matalikilo 2:​1-3. (Amubale.) Jehova wakaamba buzuba bwaciloba kuti bulisetekene. Ino eeci caamba nzi? Caamba kuti makanze aakwe kujatikizya nyika abantu, akali kuyoozuzikizyigwa cakumaninina kumamanino aabuzuba bwaciloba.

15. Nkaambo nzi ncocakali kukonzya kulibonya mbuli kuti Saatani waanyonganya makanze aa Leza kujatikizya bantu?

¹⁵ Ciindi Adamu a Eva nobakazanga, bakaba basizibi akuyambukizya bana babo cibi alufwu. (Rom. 5:12) Akaambo kaceeci, cakalibonya mbuli kuti Saatani waanyonganya makanze aa Leza aakuti nyika izule bantu balondokede alimwi ibamvwida. Pele sena masimpe kuti Saatani wakali kukonzya kupa kuti Jehova, aalilwe kuzuzikizya cisyomezyo cakwe? Ambweni Saatani wakali kuyeeya kuti Jehova tanaakali kuyoocikonzya kucizuzikizya cisyomezyo cakwe. Andiza wakali kuyeeya kuti Leza ulaile buyo kumujaya Adamu a Eva, mpoonya akulenga banabukwetene bambi balondokede kutegwa azuzikizye makanze aakwe kujatikizya bantu. Ikuti Leza naakacita oobo, Diabolosi naakamwaamba kuti mubeji. Nkaambo nzi? Nkaambo kweelana ambokulembedwe kulugwalo lwa Matalikilo 1:​28, Jehova wakaambilide Adamu a Eva kuti bana babo bakali kuyoozula munyika.

16. Nkaambo nzi Saatani ncaakali kuyeeya kuti Jehova ulaalilwa kuzuzikizya makanze aakwe?

¹⁶ Ncinzi cimbi Saatani ncaakali kuyeeya kuti Leza ulacita? Ambweni wakali kuyeeya kuti ulabalekela ba Adamu a Eva kuzyala bana, balo ibatakali kulangilwa kuyoolondoka. (Muk. 7:20; Rom. 3:23) Ikuti eeci nocakacitika, Diabolosi naakaamba Jehova kuti waalilwa kuzuzikizya makanze aakwe. Nkaambo nzi? Nkaambo nyika noyatakazula bantu balondokede.

17. Ino Jehova wakaalanganya buti makani aabuzangi bwa Saatani abanabukwetene bakusaanguna? Ncinzi ciyoocitika kumbele? (Amubone acifwanikiso)

¹⁷ Jehova wakaalanganya makani aabuzangi bwa Saatani abanabukwetene bakusaanguna munzila yakamuyumya mate Saatani. (Int. 92:5) Jehova wakabazumizya ba Adamu a Eva kuba abana, alimwi kwiinda mukucita boobo wakaazuzikizya majwi aakwe nkaambo tabeji pe. Kunze lyaboobo, wakatondezya kuti kunyina cikonzya kumupa kwaalilwa kuzuzikizya makanze aakwe. Wakabona masimpe kuti makanze aakwe ali mukuzuzikizyigwa kwiinda mukupa ‘lunyungu’ ilwakali kuyoovwuna bana ba Adamu a Eva bamvwida. (Matl. 3:15; 22:18) Kweelede kuti Saatani wakagambwa kapati akaambo kabubambe bwa Jehova bwa cinunuzyo. Nkaambo nzi? Nkaambo cinunuzyo mbubambe buyeeme aluyando lwini-lwini. (Mt. 20:28; Joh. 3:16) Saatani tabujisi bube oobu, walo ulaliyanda kapati. Aboobo, ncinzi ciyoocitika akaambo kabubambe bwacinunuzyo? Kumamanino aa Myaka Iili 1,000 ya Bulelo bwa Kristo, bana ba Adamu a Eva balondokede alimwi bamvwida bayookkala munyika yaparadaiso mbubwenya mbuli Jehova mbwaakakanzide kumatalikilo. Aciindi eeco, cinooli mbuli kuti Jehova waamba kuti “Omega.”

MBOTUYUMYA LUSYOMO LWESU MUCISYOMEZYO CA JEHOVA CA PARADAISO

18. Ntwaambo nzi totatwe Leza ntwatwaambila? (Amubone akabbokesi kakuti “Twaambo Totatwe Itutupa Kusyoma Cisyomezyo ca Jehova.”)

¹⁸ Mucibalo eeci, twalanga-langa twaambo itutupa kusinizya kuti nyika iyooba Paradaiso. Aboobo ncinzi ncotukonzya kwaambila bamwi kutegwa abalo basyome kuti eeci ciyoocitika ncobeni? Cakusaanguna, Jehova lwakwe nguwakacaamba cisyomezyo eeci. Lugwalo lwa Ciyubunuzyo lwaamba kuti: “Ooyo uukkede acuuno cabwami wakati: ‘Amubone! Ndilengulula zintu zyoonse kuti zibe zipya.’” Leza ulijisi busongo, nguzu alimwi aluyandisisyo lwakuzuzikizya cisyomezyo cakwe. Cabili, Jehova ulisinizyide kuti cisyomezyo cakwe ciyoozuzikizyigwa ncobeni, cakuti kulinguwe cili mbuli kuti cazuzikizyigwa kale. Nkakaambo kaako wakaamba kuti: “Majwi aaya alasyomeka alimwi ngamasimpe. . . . Zyacitika!” Catatu, kunyina cikonzya kulesya Jehova kumanizya kucita cintu ncaakatalika. Nkakaambo kaako wakaamba kuti: “Ndime Alefa a Omega.” Aboobo Jehova uyootondezya kuti Saatani mubeji alimwi takonzyi kulesya makanze aakwe kuzuzikizyigwa.

19. Ikuti umwi wacidooneka cisyomezyo ca Leza ca Paradaiso, ncinzi ncomukonzya kucita?

¹⁹ Amuyeeye kuti, ciindi nomwaambila bantu kuti zisyomezyo zya Jehova ziyoozuzikizyigwa ncobeni, lusyomo lwanu muzisyomezyo eezyo lulayuma kapati. Aboobo ciindi ciboola mwaakubala cisyomezyo cikulwaizya cijanika ku Ciyubunuzyo 21:4 kujatikizya Paradaiso, mpoonya muntu umwi akaambe kuti, “Mwati eeci ciyoocitika ncobeni?” Ncinzi ncomuyoocita? Mulakonzya kumubalila akumupandulwida kapango 5 alimwi a 6. Amukamutondezye mbwasinizyide Jehova kuti uyoocizuzikizya ncobeni cisyomezyo eeci nkaambo wakacisaina naa kucibikka ciganto cacikozyanyo.—Is. 65:16.